Krótkopowěsće (31.05.21)
Incidenca zaso stupa
Budyšin. Wuwiće incidency korony dla w Budyskim wokrjesu tuchwilu dalše wolóženja znjemóžnja. Dźensniša hódnota 65,4 po RKI je třeći dźeń za sobu wyša hač 50. We wokrjesu informowachu wot pjatka hač do wčerawšeho wo 118 koronanatyknjenjach a dalšich třoch smjertnych padach. Zhorjelski wokrjes rozprawješe wčera wo 11 infekcijach. Incidenca po RKI tam je dźensa 62,1.
Michel na druhim městnje
Lipsk/Kamjenc. Direktnu kandidatku SPD we wólbnym wokrjesu 156 Kathrin Michel su wobdźělnicy krajneje wólbneje konferency strony sobotu w Lipsku na druhe městno krajneje lisćiny za wólby zwjazkoweho sejma 26. septembra wuzwolili. Michel sama ma wuslědk za pozitiwne znamjo za wuchodnu Saksku. Na načolnym lisćinowym městnje steji Lipšćan Holger Mann.
Kritizuja plany za maut
W klóšterskej zahrodźe wěnuja so lětsa mjatwičce
Pančicy-Kukow (SN/MWj). Lubowarjo přirody a wšitcy, kotřiž chcedźa na wuchodźowanju něšto přinawuknyć, smědźa so wjeselić. Štyri tydźenje pozdźišo hač planowane móže zajutřišim, njedźelu, klóšterska zahroda w zežiwjenskim a zelowym centrumje Křesćansko-socialneho kubłanskeho skutka (CSB) w klóštrje Marijinej hwězdźe w Pančicach-Kukowje pod wobkedźbowanjom koronowych postajenjow zaso wočinić. Pilni sobudźěłaćerjo su tam minjeny čas něhdźe 4 000 lětnich kwětkow we wšelakich kombinacijach nasadźeli. Tež wulka ličba kerkow skići nětko w nalěću wosebje rjany wobraz.
Lětsa wěnuja so w klóšterskej zahrodźe wosebje mjatwičce (Minze). Wo jeje wšelakich družinach a wo jich plahowanju tam nadrobnje zhoniš. W pawiljonje poskićeja wulku ličbu regionalnych wudźěłkow z iniciatiwy „Łužica słodźi“. Lětsa maja prěni raz rozšěrjeny poskitk hojenskich a hladanskich produktow regionalnych poskićowarjow. Tohorunja prěni raz poskićeja Menschelec limonadu z Hainewaldy we wšelakich družinach, rěka w nowinskej zdźělence CSB.
Wopomnišćo online wopytać
Budyšin. Na digitalnym wopyće Budyskeho wopomnišća móža so zajimcy njedźelu, 30. meje, w 16 hodź. wobdźělić, a to pod . Bastian Hempel a Ulrich Ingenlath rozprawjataj wo wosudźe Dietera Hötgera. Wón je 1962 ze Zapadneho Berlina tunl do wuchoda twarił, bu pak přeradźeny. Dźewjeć lět trajace chłostanje wotsedźa wón w Budyšinje. Tu so jemu 1967 jako jeničkemu poradźi, přez dźěru we wonkownej sćěnje ćeknyć. Dźewjeć dnjow pozdźišo pak jeho lepichu.
Poskića šulerske protyki
Kamjenc. Šulerske protyki Sakskeho krajneho sejma za šulske lěto 2021/2022 poskića zapósłanc Alojs Mikławšk (CDU) w swojim Kamjenskim běrowje na Zapadnej 4 wot póndźele do pjatka stajnje wot 8 do 14 hodź. Nimo praktiskeho tydźenskeho planowarja informuje protyka zajimcow wo parlamentariskim dźěle.
Přijimuja skazanki
Nowoslicy. Za nalětni grilowanski wječor pjatk, 4. junija, wot 18 do 23 hodź. móža so zajimcy hač do 2. junija pola Dinarjec w Nowoslicach přizjewić. Za bifej přihotuja tam najwšelakoriše předjědźe, přiłohi a hłowne jědźe. Wo hudźbne wobrubjenje stara so kapała Brankatschki. Wobdźělenje na wosobu płaći 25 eurow.
Policija (28.05.21)
Wulku škodu načinili
Ćisk. Njeznaći běchu so w nocy na srjedu do jednoho Ćišćanskeho zawoda zadobyli. Tam wottwarichu wšelake elektriske nastroje a so zminychu. Ryzy wěcna škoda wučinja po informacijach policije 4 000 eurow. Pokradnjene techniske dźěle pak maja hódnotu šěsćcyfroweje sumy. Kriminalna policija pad přepytuje.
Wobornicy kołpjej pomhali
Nad wjesku maja truty lětać
Inowatiwny projekt zbudźa zajim, ale tež wobmyslenja radźićelow
Njebjelčicy (JK/SN). Nad Njebjelčicami móhli bórze truty lětać. Tajka znajmjeńša bě tendenca tamnišich gmejnskich radźićelow na wčerawšim posedźenju. K tomu bě Peter Pfeiffer z firmy 3D-Aero, kotraž ma swoje sydło na Kamjenskim lětanišću, radźićelam wobsahi a zaměry inowatiwneho projekta rozłožił.
Wobšěrne předewzaće, kotrež zjednoća wšelake z lětarstwom zaběrace so zawody a kubłanišća z Němskeje a Francoskeje, chce wuwić móžnosće za transport a zawěsćenje wěstoty z elektriskimi lětacymi nastrojemi. Za to tuchwilu z trutami wšelakich wulkosćow jich nošnosć a techniske wuhotowanja testuja, štož chcedźa přichodnje tež wokoło Kamjenskeho lětanišća činić. Njebjelčicy ze swojim sportnišćom so za tajke testy derje hodźa.
Nowe wustawki wotpokazuja
Přirodoškitne prašenja běchu jedna z hłownych temow zašłeho posedźenja Budyskich měšćanskich radźićelow. Kaž so w diskusiji pokaza, pak su měnjenja wo škiće přirody jara rozdźělne.
Budyšin (CS/SN). Špatnu powěsć dyrbješe Budyski wyši měšćanosta Alexander Ahrens (SPD) radźićelam sprjewineho města předwčerawšim na jich posedźenju sposrědkować. Lětuše Budyske nalěćo, kotrež běchu hižo na september přestorčili, su nětko doskónčnje wotprajili. Za to budźe přichodny měšćanski swjedźeń klětu nalěto ćim rjeńši, wón přilubi. Přičina wotprajenja je, zo bě so Němski zwjazk městow za to wuprajił, hač do oktobra žane wulkozarjadowanja njepřewjesć.
Za dom kata, kotryž su loni w Lišej Horje wotnjesli a nětko při ...
Krótkopowěsće (28.05.21)
Třeći dźeń za sobu pod 50
Budyšin. Ze sydomdnjowskej incidencu 46,4 po Roberta Kochowym instituće (RKI) wostanje Budyski wokrjes dźensa třeći dźeń za sobu pod hódnotu 50. Hač do wčerawšeho zwěsćichu tu 62 natyknjenjow z koronawirusom. Ličba smjertnych padow powjetši so wo dalši na 898. Wo 33 nowoinfekcijach rozprawjachu wčera we wokrjesu Zhorjelc. Incidenca po RKI je tam z 55,8 dźensa zaso wyša.
Medijowe dny online
Waršawa/Szczecin. Lětuše 14. Němsko-Pólske medijowe dny pod hesłom „Pandemija – Kak dołho medialny wuwzaćny staw hišće traje?“ su so dźensa pandemije dla online wotměli. Mjez druhim rozjimachu wobdźělnicy na zakładźe 30 lět wobstejaceho němsko-pólskeho zrěčenja wo dobrym susodstwje a přećelskim zhromadnym dźěle wužadanja kaž tež šansy w krizy a hač so poradźi zhromadnje jednać.
Dyrlich online čitał
