„Swěrny přewodnik“ za kubłanišćo
Smochćicy (SN). W biskopstwje Drježdźany-Mišno jězdźi nowy BONI-bus. Smochčanske kubłanišćo swj. Bena dósta jón wot Bonifacijoweho skutka katolikow Němskeje, kotryž ma swoje sydło w Paderbornje. Kanonik dr. Bernhard Dittrich a nawoda zarjadnistwa Smochčanskeho kubłanišća Thomas Kadenbach staj tam jězdźidło wotewzałoj.
„Naše busy zwjazuja ludźi, dokelž su swěrni přewodnicy za farske wosady a zarjadnišća cyrkwje w regionach diaspory, kotrež Bonifacijowy skutk spěchuje. Wone su widźomne znamjo solidarity za jednu cyrkej, kiž pohibuje a zwjazuje“, rjekny generalny sekretar skutka, monsignore Georg Austen.
Bonifacijowy skutk podpěruje nakup tajkeho BONI-busa po dwěmaj třećinomaj kóštow za farske wosady a cyrkwinske zarjadnišća w diaspornych regionach z podźělom katolikow hač do 20 procentow.
Lětsa dwě mejiw Němcach
Loni bě Němčanski młodźinski klub wulke wubědźowanje wo najrjeńšu mejku organizował. Tak mějachmy nahladnu ličbu 21 mejkow. Lětsa bě tomu cyle hinak. Póndźelu na pózdnim popołdnju su mužojo na zahrodźe Kummerec swójby krasnu meju přihotowali. Dokelž njemějachu serbsku chorhoj, přijědźechu ke mni, a móžach jim wupomhać. Nětko tajka nad Kummerec zahrodu zmawuje.
Dalšu meju mamy na wjesnym swjedźenišću, nic tajku wysoku kaž hewak, ale tohorunja ze serbskej chorhoju pyšenu. Někotři młodostni běchu so na koronu testować dali, a móžachu na te wašnje tradiciju zachować. Mamy tuž lětsa w Němcach dwě meji. Foto: Achim Nowak
Planuja wotnětka wosebity projekt
Bóščanska gmejnska rada a wjesnjanosta Stanij Ryćer planujetaj přichodnje tójšto, štož žiwjensku kwalitu wobydlerjow we wšitkich gmejnje přisłušacych wsach polěpši.
Bóšicy (SN/MiR). Gmejnska rada Bóšicy je so na swojim wčerawšim posedźenju w tamnišej gratowni na to dojednała, přewjesć lětuše wólby wjesnjanosty 21. nowembra. Amtěrowacy wjesnjanosta Stanij Ryćer (rjemjesło Bóšicy) bu 27. januara 2008 prěni króć ze 97 procentami hłosow za wjesnjanostu wuzwoleny a 23. nowembra 2014 z 58 procentami hłosow na dalše sydom lět w zastojnstwje wobkrućeny.
Namjetowanemu terminej za lětuše wólby radźićeljo wčera jednohłósnje přihłosowachu. Stanij Ryćer zwurazni, zo chce znowa nastupić a na dobro gmejny dalše sydom lět skutkować. Na to wothłosowachu radźićeljo wo wosobach, kotrež maja we wólbnym wuběrku skutkować a wólby přihotować.
Wysokonasypy zachować
Chcedźa w Mułkecach přirodu a bohatosć družin škitać
Slepo (AK/SN). Wobydlerjo gmejny Slepo spjećuja so planam za twar wulkeje fotowoltaikoweje připrawy w Mułkecach. Wjace hač 80 wobydlerjow, přewažnje ze Slepoho, Mułkec a Rownoho, je wutoru do posedźenja gmejnskeje rady před Serbskim kulturnym centrumom demonstrowało. Ludźo chcedźa Mułkečanske wysokonasypy, hdźež ma připrawa nastać, z jeho přirodu a bohatosću družin škitać a zachować. Woni dwěluja na trajnym wužitku solarnych připrawow za Slepjansku gmejnu, za předewzaća a wobydlerjow. Na próstwu gmejnskeho radźićela Marca Jainscha (CDU) su tuž předwčerawšim štyri problematiku nastupace dypki z dnjoweho porjada wzali.
Nalětnje wjedro do přirody wabi
Maja społnomócnjenu za zbrašenych
Kamjenscy měšćanscy radźićeljo su wčera na swojim posedźenju planowanja šulskeje syće wobkrućili a prěni raz měšćansku społnomócnjenu za naležnosće zbrašenych wuzwolili.
Kamjenc (BG/SN). Gymnazialne twarjenje na Henselowej w Kamjencu bě mnohe lěta zawrjene a hrožeše rozpadnyć. Zo bu nětko zaso wotewrjene, bě wuslědk dołhich debatow a politiskich jednanjow. Lessingowe město a Budyski wokrjes inwestujetej wjele pjenjez, zo by nutřkoměšćanske gymnazialne stejnišćo z wulkim dosahom nastało. Zakład za to běchu statistiske prognozy. Tam pak so ćeže započinaja, kaž bě na wčerawšim posedźenju Kamjenskeje měšćanskeje rady słyšeć. „Tajke předpowědźe su nastupajo Kamjenc zrědka přitrjechili abo ženje“, zahaji wyši měšćanosta Roland Dantz (njestronjan) debatu wo planowanju šulskeje syće.
Krótkopowěsće (06.05.21)
Incidenca dale wysoka
Budyšin. W Budyskim wokrjesu rozprawjachu wčera wo 225 dalšich natyknjenjach a wo dwěmaj zemrětymaj w zwisku z koronawirusom. Dźensniša incidenca po RKI je 206,8. We wokrjesu Zhorjelc zwěsćichu hač do wčerawšeho 127 infekcijow a dwaj smjertnej padaj. Incidenca po RKI wučinja tam dźensa 175,7. Twarske wiki w Sakskej smědźa swoje wotdźěle za zahrodu zaso wotewrěć.
Dalše wjelki ze sćelakom
Drježdźany. Dalše tři wjelki su nalěto w Sakskej z našijnikom wuhotowali, w kotrymž je sćelak. Hromadźe z jednym wjelkom, kotryž bě loni w aprylu tajki sćelak dóstał, dodawaja aktualnje tři daty za sakski wjelči monitoring. Jedyn wjelk bě swój sćelak hižo po krótkim času zaso zhubił, kaž fachowa městnosć wjelk Sakskeho krajneho zarjada za wobswět, geologiju a wobswět zdźěli.
Mjenje kolesow kradnyli
Policija (05.05.21)
Pod wliwom drogow awto wodźił
Budyšin. Na Tzschirnerowej w Budyšinje su policisća póndźelu wječor krótko do wosmich šofera Škody kontrolowali. Woni zwěsćichu, zo steješe 24lětny pod wliwom drogow. Zakazachu jemu na to, dale jěć a přizjewichu jeho přestupjenja wobchadneho porjada dla.
Tragiske njezbožo na A4
Akcija dyrbi bjez pjenježneje podpěry města wuńć
Budyšin (CS/SN). Financny wuběrk města Budyšina je 8 000 eurow za přihot tudyšeho staroměšćanskeho festiwala přizwolił. Tón ma so lětsa wot 27. do 29. awgusta wotměć. Pjenjezy dóstanje nałožkowe towarstwo za čas přihotow a wuhódnoćenja swjedźenja. Němcy a Serbja chcedźa jón wuhotować. Festiwal ma wotbłyšćować hospodliwosć a swětawotewrjenosć kaž tež žiwjenske wjeselo. Přewažnje chcedźa jón na Hrodźe a w rozwalinje mnišeje cyrkwje přewjesć. Zarjadowarjo liča korony dla z wobmjezowanjemi. Někotre podawki chcedźa digitalnje wusyłać.
Towarstwo Majak dóstanje njecyłe 5 000 eurow za přihot lětušeju Interkulturneju tydźenjow wot 17. septembra do 3. oktobra. Towarstwo planuje wšelake zarjadowanja kaž tež poradźowanske poskitki a wustajeńcy. Zaměr je mjezsobnosć wobydlerjow z a bjez migraciskeho pozadka sylnić kaž tež hidu přećiwo cuzym a předsudki přewinyć. Na interkulturnych dnjach změja tohorunja digitalne poskitki.
