Kmane jězdźidło namakali
Wjesna wohnjowa wobora dóstanje mustwowy transporter
Chrósćicy (JK/SN). K zawěsćenju wohnjoškita a zo bychu planej wohnjoškitneje potrjeby w gmejnje wotpowědowali, ma wjesna wohnjowa wobora Chrósćicy nowy mustwowy transporter dóstać. To su tamniši gmejnscy radźićeljo wčera wobzamknyli. Dokelž pak Budyski krajnoradny zarjad tuchwilu tajki transporter njespěchuje a nětčiše jězdźidło žane wuhlady na technisku dowolnosć TÜVa nima, so w Chrósćicach rozsudźichu, za kmanym trjebanym awtom so rozhladować. A mějachu wuspěch. W Parchimje w specielnym zawodźe, kotryž tajke jězdźidła poskića, su po wulkosći a płaćiznje kmane awto namakali. Radźićel Beno Hojer, kiž je sej z dalšimi wobornikami jězdźidło na městnje wobhladał, je swojim kolegam dobry techniski a wuhotowanski staw jězdźidła wobkrućił. Tuž gmejnska rada jednohłósnje wobzamkny, awto za nimale 26 000 eurow kupić. W hospodarskim planje dźě bě hižo 27 000 eurow za to zaplanowane.
Přihłosowanje bjez alternatiwy
Bóščanska gmejnska rada měješe so srjedu z prašenjom rozestajeć, hač dojednanju z komunalnej towaršnosću (KBO) přihłosuje. Dźe wo perspektiwu při zaručenju dotalnych dochodow z dobytkow zastaraćela z energiju.
Njewšědnje rjenje w róžojtej barbje kćějace štomy kaž tule we ...
Krótkopowěsće (16.04.21)
Testować bjez přizjewjenja
Budyšin. Terminy za mobilne testowanske teamy w Budyskim wokrjesu online knihować njeje so wudaniło. Kaž krajnoradny zdźěli, móžeš so tam nětko bjez přizjewjenja testować dać. We wokrjesu rozprawjachu wčera wo 200 natyknjenjach z koronu. RKI mjenowaše dźensa incidencu 262,5. Zhorjelski wokrjes měješe wčera 123 infekcijow a štyri smjertne pady. Incidenca po RKI je 216,8.
Podpěra domizniskim muzejam
Budyšin. Předsydstwo župy „Jan Arnošt Smoler“ Budyšin ma za trěbne, zo ma so zamołwity wo serbske domizniske muzeje nastupajo koncept, nošerstwo a financy starać. Potrjechene su na přikład muzej Ćišinskeho w Pančicach, šulski muzej w Stróži a dom Měrćina Nowaka w Njechornju. Za to měli snadź nowe dźěłowe městno wutworić. Župa Budyšin wobroći so w naležnosći na radźićelow Załožby za serbski lud.
Biden–Putin w čěskej stolicy?
Při jězoru ma hotel w formje wóčka nastać
Hamor (AK/SN). Krajinowej wuměłskej twórbje „Wucho“ při Hamorskim sewjernym přibrjohu Bjerwałdskeho jězora ma so dalša atrakcija přidružić. Hač do lěta 2023 ma tam swójbny hotel w formje wóčka nastać. Firma Elldus Resort natwari hotelowu připrawu z gastronomiju a wellnessowym wobłukom. Nimo toho maja golfowa připrawa z 18 dźěrkami, teren za třělenje z kłokom a prokom kaž tež mały coo nastać. Hamorscy gmejnscy radźićeljo su na swojim zašłym posedźenju rozsudźili dwě ležownosći předać, a to Drježdźanskej imobilijowej firmje, kotraž jej dale přenaja.
Kaž jednaćel Elldus Resort Jens Ellinger rozłoži, ma swójbne předewzaće hižo hotel w Oberwiesenthalu. Při Bjerwałdskim jězoru chcedźa dźesać milionow eurow inwestować a najprjedy raz 35 dźěłowych městnow kaž tež wosom wukubłanskich městnow wutworić. Pozdźišo móhło 20 dalšich městnow k tomu přińć. Lětsa w oktobru chcedźa twarić započeć, klětu w aprylu ma hruby twar hotowy być a potom nutřkowny wutwar slědować. Za dwě lěće móhli hotel a wonkowne připrawy dotwarjene być.
Wodowód pod pućom so puknył
Policija (15.04.21)
Muž dalšemu z nožom hrozył
Budyšin. Swědk je předwčerawšim, wutoru, na Lotzowej w Budyšinje rozkoru dweju muži wobkedźbował a policiju informował. 38lětny muž hrožeše tam 34lětnemu z nožom. Policisća staršeho z njeju pozdźišo na Walskej dosahnychu a zwěsćichu pola njeho 2,2 promilej alkohola w kreji. Wužiwany nóž sćazachu. Dokelž so podhladny agresiwnje zadźeržeše, wzachu jeho sobu na policajski rewěr, zo njeby k móžnym dalšim njeskutkam dóšło. Kriminalna słužba pad nětko dale přepytuje.
Wo škit před wulkej wodu šło
Sćijecy (CS/SN). Hdźe měli so přichodnje posedźenja wjesneje rady Sćijecy wotměć, bě předwčerawšim jedna z temow wuradźowanja jeje sobustawow. Woni njemóžachu rozumić, zo dyrbja za to tak mjenowanu wjerchowsku stwu w sukelnicy wužiwać, hačrunjež je ta mjeńša hač žurla wohnjoweje wobory. Do gratownje pak smědźa po přikazu města jenož hišće w padźe nuzy. Zjawne posedźenja wjesneje rady tam dowolene njejsu. Kaž jeje čłonojo zwuraznichu, chcedźa přichodny raz znajmjeńša w předrumnosći wjerchowskeje stwy wuradźować, dokelž je ta wjetša hač stwa sama.
Dróhotwar radźićelow zaběrał
Najebać problemy wutwar Jitkowskeho puća derje postupuje
Rakecy (JK/SN). W Rakečanskej gmejnje chcedźa lětsa šěsć komunalnych pućow ponowić. Nadawk we wobjimje 55 000 eurow přepodachu gmejnscy radźićeljo na swojim wčerawšim posedźenju firmje Kutter z durinskeho Plaue pola Arnstadta. Mjez druhim ponowja Krabatowy puć w Jitku a Pstruhowy puć w Psowjach. Wobmyslenja radźićelki Annemarie Rentsch (Njestronscy wolerjo), zo so planowana metoda saněrowanja njewudani, złahodźi wjesnjanosta Swen Nowotny (CDU) z dobrymi nazhonjenjemi, kotrež z firmu a jeje metodu hižo maja. Rakečanski puć k hatam ma firma ETD ze Sepic za 11 400 eurow skrućić.
Žadyn pozitiwny pad njezwěsćili
Budyšin (SN/JaW). Budyski krajnoradny zarjad je minjenej pjatk a sobotu na cyłkownje štyrjoch městnach lětušim křižerjam móžnosć poskićił, so hišće raz dobrowólnje na koronu testować dać. Kaž zarjad na naprašowanje dźěli, je so cyłkownje 278 křižerjow na tychle městnach testować dało. Dwanaćo dalši su so druhdźe testowali, na přikład na dźěle, a posrědkowachu wuslědk strowotniskemu zarjadej, z čimž wučinja ličba testowanych křižerjow cyłkownje 290, štož njeje ani třećina lětušich křižerjow. „We wobłuku wospjetneho testowanja křižerjow njejsmy ani jenički pozitiwny pad korony zwěsćili. To pokazuje na zamołwite wobchadźenje we wobłuku pandemije. Tež nastupajo kontaktne wosoby křižerjow njeje dotal žadyn pozitiwny pad natyknjenja na koronawirus znaty“, pisa nowinska rěčnica Mandy Noack na naprašowanje našeho wječornika.
