Wjace nowonarodźenych, zdobom pak tež smjertnych padow
Budyšin (SN). W Budyšinje zwěsćeja tuchwilu přiběracu ličbu porodow. Loni w decembru, dźewjeć měsacow po jutrach 2020, zličichu w sprjewinym měsće 48 nowonarodźenych. W decembru 2019 bě jich 29, zdźěli komisariski nowinski rěčnik města Budyšina Markus Gießler. W cyłku je loni 322 holcow a hólcow w Budyšinje na swět přišło. To je 6,6 procentow wjac hač lěto do toho. Móžna přičina toho móhł lońši nalětni lockdown w zwisku z koronawirusom być.
Koronawirus pak njeje so jeničce wo wjace porodow starał. W měsće mějachu loni tež wjace smjertnych padow hač 2019. 694 muži a žonow je zemrěło, 22 procentow z nich w decembru. To je 2,6 króć wjace hač přerězk za posledni měsac lěta.
31. decembra 2020 bydleše w Budyšinje 38 556 ludźi, štož je 1,1 procent mjenje hač lěto do toho. Trend wo pomjeńšenju wobydlerstwa pak je přiwšěm trochu wosłabił. W lěće 2019 zličichu statistikarjo hišće 1,7 procentow ludźi, kotřiž běchu sprjewine město wopušćili. Při tym napadnje, zo su so předewšěm młode swójby z města na wsy Budyskeho wokrjesa přesydlili.
Dale derje wotwažować
Planowanje šulskeje syće Budyskeho wokrjesa delanskich radźićelow wužaduje
Ralbicy (JK/SN). Na dnjowym porjedźe mnohich, tež serbskich gmejnow steja tele dny plany šulskeje syće Budyskeho wokrjesa. W gmejnam předležacych podłožkach k wobzamknjenju wšak wokrjes zawěsća, zo maja wšitke šule dalewobstaće zawěsćene. W trěbnym wobzamknjenju dźe jeničce wo to, zo šulski nošer, přewažnje su to na serbskich wsach gmejny, tele rjadowanje na wědomje bjerje a swoje plany na přichod kubłanišća wusměri.
Serbske a dwurěčne šule maja při planowanju šulskeje syće wosebje wobkedźbować. Hižo zestawa rjadownjow kaž tež jich wulkosć a čarowosć lětnikow ma so runje tak wobkedźbować kaž planowanje trěbnych busowych čarow.
Achim Mič z delnich Sulšec je našemu wječornikej posrědkował ...
Sportowy pilotowy projekt
Budyšin (SN/MiR). Kak dale ze sportowymi towarstwami Budyskeho wokrjesa? Prašenje to, kotrež dźeń a wjetšeje wažnosće nabywa.
Budyski krajny rada Michael Harig (CDU) je so minjeny štwórtk z iniciatiwu sportowcow wokoło Budyšana Maika Petzolda kaž tež z wokrjesnym sportowym zwjazkom zetkał. Čłonojo iniciatiwy zarjaduja tuchwilu wobstajnje digitalnje organizowane sportowe podawki. Tak tež zaso njedźelu, 28. februara, pod hesłom „Mobilizujemy za sport a zběramy zhromadnje kilometry“. Po móžnosći měli sportowcy 10 000 krokow běžeć, štož wučinja něhdźe šěsć do sydom kilometrow“, rjekny čłon iniciatiwy, Budyski triatlet Maik Petzold. Tež ći, kotřiž chcedźa skerje w sportowym studiju trenować, móža sej wotbyte kilokalorije na kilometry přeličić dać. Wobdźělenje na mjeztym třećej tajkej akciji płaći euro. Dalše informacije steja na internetnej stronje www.vereinszukunft-gestalten.de.
Žona sej pomhać wědźała
Krótkopowěsće (23.02.21)
Přirada załožby wuradźowała
Budyšin. Financne połoženje Załožby za serbski lud, serbske projekty we wobłuku strukturneje změny, digitalizacija a trěbny dorost wučerjow w serbskich šulach a kubłarjow w pěstowarnjach běchu hłowne temy wčerawšeho internetneho wuradźowanja parlamentariskeje załožboweje přirady, kaž jeje předsyda přirady Marko Šiman (CDU) informuje.
Hakle krótko do termina přińć
Budyšin. Zo bychu dlěšemu čakanju zadźěwali, prosy Budyski wokrjesny zwjazk DRK ludźi, kotřiž dadźa so w Kamjenskim šćěpjenskim centrumje pře koronu šćěpić, tam hakle krótko do swojeho termina přińć. Budyski wokrjes rozprawješe wčera wo šěsć nowonatyknjenjach a pjeć smjertnych padach, incidenca wučinješe 86. Zhorjelski wokrjes měješe jednoho zemrěteho a incidencu 63,31.
Delnjoserbski film myto dóstał
Policija (22.02.21)
Dróha zawrjena była
Šešow. Sobotu něhdźe w 23.30 hodź. je 26lětna šoferka awta marki VW Golf na wokrjesnej dróze ze Šešowa do směra na zwjazkowu dróhu B 96 z jězdnje zjěła a do štoma zrazyła. Při tym je so awto wo 180 stopnjow zwjertło a do směra na Šešow stejo wostało. Njeswačanska dróha bě dlěje hač hodźinu zawrjena. Ćežko zranjenu žonu lěkuja w chorowni.
Kino chce tradicionalnu žurlu saněrować
Budyšin (CS/SN). Wšitke sydła na nowej žurli 3 Budyskeho kina su z foliju zakryte. Wot 2. nowembra je kino zawrjene. Jeho nawoda Andreas Schneider a jeho třo kruće přistajeni su w krótkodźěle. „Dźeržimy temperaturu na wšěch žurlach pola dźesać stopnjow, zo njebychu přejara wustudnyli“, wón rozłožuje, „tak tež sćěny plěsniwić njemóža. Andreas Schneider zaběra so nětko z dźěłami, kotrež su po zakónčenym saněrowanju a nowotwarje žurle 3 zbyli. Nimo toho ma na to dźiwać, zo płaći wšitke dochadźace zličbowanki. Spokojom wšak runje njeje, zo njemóže tuchwilu žanych wopytowarjow witać. „Nadźijam so, zo móžemy hnydom po jutrach zaso započeć filmy pokazować. Dorěčane je, zo wšitke kina po cyłej Němskej runočasnje dźěłać započnu. Andreas Schneider wjeseli so najnowši James-Bond-film a wě, zo tón hakle w oktobrje do němskich kinow přińdźe. Tež prjedy njesmědźa jón na Netflix abo druhich streaming-kanalach předstajić.
Wobchod na městno hotela
Komunam wjele přicpěwaja
Gmejna Njeswačidło chce so po terminjach měć a nadawki spjelnić
Njeswačidło (JK/SN). Njejsu to jeničce sakske komuny, ale wšitke po cyłej Němskej bědźa so z wotličenjom minjenych lět po nowym systemje dopik, někotre samo hišće ze zahajenskej bilancu k 1. januarej 2013, kotruž maja po zakonju nastajić. Tež Njeswačanski gmejnski zarjad je sej předewzał, swoje nadawki k postajenym terminam spjelnić a njelubowane financne rozprawy a bilancy sčasom předpołožić. Kónclětne wotličenje Njeswačanskeje gmejny za 2013 hakle w běhu 1. kwartala hotowe. Po tym zo su zahajensku bilancu dokónčili, steji na planje, kónclětne wotličenja wot lěta 2013 hač do 2019 zaměrnje zhotowić. To cyłu chwilu traje, wšako ma dokładne być a před krutym wóčkom oficialneho pruwowarja wobstać.
