Policija (22.03.21)
Kolesowarka ćežko zranjena
Narć. Na zwjazkowej dróze B 96 w Narću sta so sobotu dopołdnja ćežke wobchadne njezbožo, při kotrymž je so 79lětna kolesowarka strašnje zraniła. Wona bě po wokrjesnej dróze ze směra Noweje Łuki přijěła a chcyše zwjazkowu dróhu přeprěčić, zo by so na kolesowansku šćežku na tamnym boku puća dóstała. Wona pak přewidźa z Wojerowskeho směra přijěduce wosobowe awto typa Suzuki, kotrehož 62lětny wodźer zražce hižo zadźěwać njemóžeše. Při tym njeje so jenož rentnarka ćežko zraniła, tež šofer Suzukija snadne zranjenja poćerpje. Wěcna škoda wučinja po informacijach Zhorjelskeje policajskeje direkcije tysac eurow. Njezbožowa słužba dokładnu přičinu njezboža přepytuje.
W komunalnym lěsu štomy pušćeja
Domjace firmy bjez nadawka
Twarske dźěła za ponowjenje Šule Ćišinskeho rozdawali
Pančicy-Kukow (SN/MWj). Dalše ponowjenje Šule Ćišinskeho w Pančicach-Kukowje budźe lětsa sobu najwjetše předewzaće gmejny. Za to su jeje radźićeljo na posedźenju minjeny štwórtk we Wotrowje wjacore twarske nadawki rozdawali. Wone maja wobjim cyłkownje nimale 420 000 eurow. Dalše losy twarskich dźěłow přichodny čas slěduja.
Wo zarjadowanje twarnišća w hódnoće 58 000 eurow stara so předewzaće z Kinsporka. Wonkowne sćěny wuchodneho dźěla šulskeho twarjenja ma firma z Zwickauwa za 25 000 eurow. Nadawk za tepjenje, přewětrjenje a sanitarne přepodachu zawodej z Haselbachtala za 114 000 eurow. Elektroinstalaciske dźěła we wobjimje 175 000 eurow změje firma ze Zhorjelca na starosći. A wonkowny woclowy schód jako druhi wuchowanski puć ma kowarnja z Klětnoho za nimale 44 000 eurow twarić.
86 namjetow za město zapodali
Třeći raz ma město Wojerecy lětsa wobydlerski etat. Mjeztym zo je wosebita dźěłowa skupina wo idejach za wokolne wsy hižo wuradźowała, stejachu njedawno namjety za město same w srjedźišću.
Wojerecy (AK/SN). Za Wojerowski wobydlerski etat je za město same 86 namjetow dóšło. „To je wjele mudrych a dobrych idejow. Kóždy namjet je hódny, zo wo nim rěčimy“, měni nawoda dźěłoweje skupiny Uwe Blazejczyk. Tak jedna so wo wobswětowe temy runje tak kaž wo zachowanje pomnikow a ponowjenje hrajkanišćow a twarjenjow.
Ludźo mjez druhim namjetuja, restawrować skulpturu „Čorna róža“ w bydlenskim kompleksu VI w nowym měsće. Pod hołym njebjom je wona minjene lěta poćerpjeła, čehoždla chcedźa ju nětko ponowić. Samsny namjet běchu wobydlerjo hižo 2019 zapodali. Tehdy pak wuslědk wothłosowanja dosahał njeje. Dalša ideja měri so na park při wopomnišću na Bonhoefferowej. Tam pobrachuja ławki a papjerniki. Tež schód a přijězd za chorobne stoły, dźěćace wozyčki a kolesa dyrbjeli ponowić.
Lubowarjow historiskeje železniskeje techniki ćehnješe sobotu ke ...
Krótkopowěsće (22.03.21)
Wolóženja cofnjene
Zhorjelc. Po třoch dnjach za sobu z incidencu nad 100 je Zhorjelski wokrjes předwčerawšim z nowym powšitkownym postajenjom reagował. Wolóženja buchu cofnjene, kontakty zaso wobmjezowane. Wčera mějachu tam 36 nowonatyknjenjow z koronu, incidenca po RKI dźensa bě 165,8. Budyski wokrjes rozprawješe přez kónc tydźenja wo 223 dalšich infekcijach a wo smjertnymaj padomaj. RKI poda dźensa incidencu 123,8.
Kamjenska Boršć přiwzata
Berlin. Konferenca kulturnych ministrow krajow je minjeny pjatk rozsudźiła, Kamjensku Boršć do zwjazkoweho zapisa imaterielneho kulturneho namrěwstwa přiwzać. Před lětom bě Sakska ju jako jedyn z najwjetšich šulskich a domizniskich swjedźenjow swobodneho stata z wjace hač 300 lět trajacej tradiciju nominowała. Dohromady 20 nowych do nětko 126 zapisow wopřijaceje němskeje lisćiny imaterielneho kulturneho namrěwstwa su wobzamknyli.
Do Pólskeje žane ćahi njejězdźa
Wšitko so nachwatać njehodźi
Delanska gmejna wodźiznow druheho rjadu dla chětro wužadana
Ralbicy (JK/SN). Hotowe marathonowe posedźenje w zymnej Ralbičanskej sportowej hali dyrbjachu čłonojo gmejnskeje rady Ralbicy-Róžant wčera zmištrować. Hłowny dypk bě předstajić koncept za hladanje a wuwiće wodźiznow druheho rjadu na teritoriju gmejny. Inženjer Andreas Stowasser z planowanskeho běrowa w Radebeulu bě hromadźe z někotrymi radźićelemi plan zdźěłał, po kotrymž měła a móhła gmejna postupować, swoje wodźizny wotpowědnje zakonskim žadanjam a přirodnej potrjebje hladać a wuwić. To budźe z njemałymi wudawkami zwjazane, byrnjež fachowc delanskej gmejnje hižo dobry staw při hladanju wodźiznow wobkrućił. Ale Europska unija sej žada, zo maja w čłonskich krajach hač do lěta 2027 wšitke wodźizny na čiste wukmanjene być. To je, kaž Stowasser potwjerdźi, utopiske a njebudźe so zwoprawdźić hodźeć.
Wobstaraja měrjensku připrawu
Kamjenc (BG/SN). Ze skału w Kamjenskim měšćanskim dźělu Bambruchu (Bernbruch) a z jeje wuskutkami na wobydlerjow zaběraše so předwčerawšim Kamjenska měšćanska rada. Najwjetši dźěl wobydlerjow nochce so hižo dlěje z prochom, haru a střasenjemi wotnamakać. Tohodla je Wolerske zjednoćenstwo za Kamjenc a měšćanske dźěle namjetowało wobstarać měrjensku připrawu, kotraž ma najprjedy raz lěto najwšelakoriše daty ze skały zběrać a protokolować. Wudawki za to přewozmje Freibergski wyši hórniski zarjad. Tomu su radźićeljo Lessingoweho města nětko jednohłósnje přihłosowali.
Wobydlerjo so nadźijeja, zo změja z nazběranymi datami lěpše šansy, při móžnych jednanjach ze zarjadami abo z mějićelemi skały swoje zajimy zastupować. Hdźe měrjensku připrawu nastaja, dotal hišće jasne njeje. Přiwšěm bě Mario Pelzer z wolerskeho zjednoćenstwa spokojom, zo so po wulkich prócowanjach w tym nastupanju na dobro wobydlerjow skónčnje něšto hiba.
Film wo misionje
Chrósćicy. Film wo zakónčacym nyšporje Chróšćanskeho wosadneho misiona w lěće 2001 je w interneće přistupny. Lětsa je tomu dwaceći lět, zo su misionarojo z rjadu oblatow bjezhrěšneje knježny Marije prěni raz mision we Łužicy přewjedli. Franc Šołta bě něhdźe poł hodźiny trajacy film zestajał. Link na njón je pod www.posol.de wozjewjeny.
Za lěpšu a spěšnišu pomoc
Kamjenc. Nowu techniku je Kamjenska skupina Techniskeho pomocneho skutka dóstała. Jeje čłonojo přewzachu nakładne awto kaž tež transportne jězdźidło za wosom wosobow. Tak móža nětko přidatne nadawki spjelnić, za čož wutworichu skupinu nuzoweho zastaranja. Mjez druhim móža w katastrofowym padźe nuzowe kwartěry za wjetšu ličbu ludźi natwarić.
Lisćiki nětko na předań
Policija (19.03.21)
Drogi připadnje namakali
Běła Woda. Při zasadźenju předwčerawšim krótko do połnocy w Běłej Wodźe namakachu zastojnicy w jednym bydlenju mału konopjowu plantažu. Poprawom běchu policistow do bydlenja 34lětneho strowotniskich problemow dla wołali. Tam pak napadny jim blachowa tyza ze 40 gramami marihuany. Statny rěčnik na to přikaza, zo maja zastojnicy stwu wobydlerja dokładnje přepytać. W kamorje namakachu woni skónčnje připrawu za plahowanje konopje, w kotrejž steješe połnje kćějaca rostlina. Ju kaž tež plahowansku připrawu nablaku sćazachu, 34lětneho wobydlerja dowjezechu k dalšemu zastaranju do chorownje.
