Znowa nachribjetniki pjelnili
Budyšin (CS/SN). Mjeztym hižo pjatnaty raz přewjeduja tuchwilu nachribjetnikowu akciju ewangelskeho cyrkwinskeho wobwoda Budyšin/Kamjenc za partnerski wobwod Meru w Tansaniji. Byrnjež lětuše wobstejnosće koronapandemije dla trochu wobćežniše byli, su wěriwi z wjacorych wosadow kaž tež dźěći ze šulow a pěstowarnjow něhdźe 3 000 šulskich nachribjetnikow napjelnili.
Wosebje wuzběhnyć smě so Serbska zakładna šula Budyšin. Tam su hižo krótko po zahajenju akcije 11. nowembra 2020 na wšěch 76 nachribjetnikow spakowali. Dalše tysac nachribjetnikow móžachu dźakowano pjenježnym daram kupić a pjelnić. Kóžda toboła wobsahuje šalku, taler, łžicu kaž tež trjenjo, zešiwki a wšelake pisaki.
Nachribjetniki dowjezechu minjene dny do bróžnje w Smochćicach. Dźesać dobrowólnych pomocnikow spakowa je tam do přećahowanskich kartonow. Něhdy běchu za to bananowe kisty wužiwali. To pak hižo dowolene njeje, dokelž mějachu wone dźěrki za přewětrjenje. Nowe kartony je nětko přećahowanska firma Gäbler ze sprjewineho města sponserowała.
Serbski sejm so zetka
Budyšin. 22. posedźenje Serbskeho sejma budźe sobotu, 13. měrca w 11 hodź. Na zakładźe situacije poruča prezidij wobdźělenje přez livestream. Za to zarjaduja dwě rumnosći. Štóž ma techniske problemy, so njech prošu hodźinu do posedźenja pod telefonowym čisłom 01 78 / 1 40 16 94 (Hagen Domaška) přizjewi. Za zawolenje z telefonom budźe PIN na posedźenskim dnju wot 10 hodź. k dispoziciji a hodźi so pola Hagena Domaški naprašować. Posedźenje je zjawne. Kóždy hósć móže tam swoje naležnosće a nastorki zdźělić. Rumnosć za posedźenja nańdu zajimcy pod http://posejzenje.serbskisejm.de, rumnosć z přełožkom pod http://pselozk.serbskisejm.de.
Nominuja kandidata
Wojerecy. Za wólby zwjazkoweho sejma we wólbnym wokrjesu 156 Budyšin I nominuje CDU swojeho kandidata pjatk, 12. měrca, we 18 hodź. we Wojerowskej Łužiskej hali. Na to su wšitcy wólbokmani čłonojo CDU přeprošeni. Wuměnjenje je, zo su 18. žiwjenske lěto zakónčili a zo w mjenowanym wólbnym wokrjesu bydla. Hižo w 17 hodź. wotměje so na samsnym městnje wokrjesny stronski zjězd křesćanskich demokratow.
Chcedźa wobydlerjow zapřijeć
Prócuja so wo koncept za přichodne wužiwanje Mułkečanskeho nasypa
Slepo (AK/SN). Prjedy hač móža nasyp pola Mułkec na někajkežkuli wašnje wužiwać a twarske plany za njón nastajić, chce Slepjanska gmejna zasadne prašenja rozrisać. W nich dźe wo wobdźělenje wobydlerjow, wo wobswětoškitny aspekt, wo škit dźiwiny a wo dalše wobłuki. To je wuslědk wčerawšeho wurjadneho posedźenja Slepjanskeje gmejnskeje rady w tamnišim Serbskim kulturnym centrumje.
Hdźe nowu pěstowarnju twarić?
Njeswačidło (JK/SN). Přihoty za twar noweje pěstowarnje w Njeswačidle nabywaja dźeń a konkretniše formy. Na wčerawšim posedźenju tamnišeje gmejnskeje rady informowaše wjesnjanosta Gerd Schuster (CDU) radźićelow wo njedawnym wuradźowanju z młodźinskim zarjadom Budyskeho wokrjesa. Tón předpołoži Njeswačanskej gmejnje ličby, kelko dźěći přichodnje tam budźe. Ličby su zakład za to, postajić wulkosć domu, štož je zdobom wuchadźišćo planowanja kaž tež nastork, wotpowědnu ležownosć namakać.
Po tuchwilnym stawje chcedźa dnjowe přebywanišćo za 120 dźěći twarić. Wokomiknje hišće wo tym rozmysluja, zaplanować 30 městnow za hort. W zakładnej šuli maja tuchwilu 87 hortowych dźěći, a jich je dźeń a wjace. Wjace městna za hort měli tež po słowach nawodnicy twarskeho zarjada gmejny Kerstin Ullrich wobkedźbować. Hewak dyrbjeli w šuli jednu rumnosć na hort přetworić, štož pak njeje spomóžne, dokelž je tež ličba rjadowniskich stwow w šuli dale trěbna.
Wjetše mnóstwo wotpadkow je tele dny něchtó při puću ze ...
Masowy test derje přiwzaty
Budyšin/Wojerecy (SN/JaW). Na připowědźenym masowym tesće na koronawirus we Wojerecach je so wčera hač do připołdnja 244 ludźi wobdźěliło, informuje Budyski krajnoradny zarjad. „Poskitk su ludźo tuž derje přiwzali. Smy wčera jenički pozitiwny wuslědk testa zwěsćili“, wottam dale rěka.
Masowy test su we Wojerowskej zarjadowanskej hali „Vis-à-Vis“ – prjedy běše to žurla lutowarnje – na Hrodowskej dźensa hač do 18 hodź. dale wjedli. Za to móžachu so zajimcy internetnje přizjewić a sej termin dojednać, abo so jednorje na žurlu podać. Dźensa připołdnju běchu hišće wjacore internetne terminy za test swobodne. Kaž strowotniski zarjad powěsćerni dpa zdźěli, móhli we Wojerecach hač do 600 testow na koronawirus wob dźeń přewjesć. Masowy test we łužiskim měsće su wčera a dźensa přewjedli, zo bychu mutacije koronawirusa spěšnišo zwěsćili a jich rozpřestrěću zaměrnje zadźěwali.
Mjeztym tež šćěpjenje pře koronu derje postupuje. Kaž Roberta Kochowy institut pisa, su ludźom w Sakskej dotal 390 500 dozow seruma ludźom šćěpili.
Krótkopowěsće (10.03.21)
Měrowe myto do Wostrowca
Köln. Němska biskopska konferenca je iniciatiwje Wostrowčanskeho měroweho swjedźenja katolske „Myto přećiwo njepřećelskosći napřećo cuzym a rasizmej“ spožčiła, kaž Domradio Köln informuje. Ze swjedźenjom spřećiwjeja so prawicarskemu festiwalej na kromje městačka Wostrowca mjeztym sydom lět. TCM je hižo wjacore razy wobdźělenje serbskich wěriwych organizowało.
Zdźěłuja koncept za spěšnotesty
Budyšin. W Budyskim wokrjesu dźěłaja na decentralnym koncepće za spěšnotestowanje ludnosće, kotryž ma tón tydźeń hišće předležeć. We wokrjesu zwěsćichu wčera sydom dalšich koronanatyknjenjow a jědnaće smjertnych padow. Dźewjeć z nich bě hižo minjene tydźenje. Incidenca je 100,33, po RKI dźensa 70,1. We wokrjesu Zhorjelc běchu wčera 46 nowoinfekcijow, dwaj smjertnej padaj a incidenca 86,26, po RKI dźensa 78,3.
HSV znowa jenož remis hrał
Ratarjo nětko pola hnoja
Při Třižonjanskim jězoru wotpočnišćo zanjerodźili
Štóž je we łužiskej jězorinje pěši abo z kolesom po puću, so nad wotpočnišćom wjeseli. Při Třižonjanskim jězoru pak su njeznaći tajku škitnu hětu nětko złowólnje zanjerodźili.
Łaz (AK/SN). Wuskutki wandalizma je pućowacy minjene dny na wuchodnym boku Třižonjanskeho jězora we Łazowskej gmejnje wuhladał. Wotpočnišćo za pěškow, kolesowarjow a skaterow, natwarjene w lěće 2014, bě wšo druhe hač přiwabliwe. Hětu a kartu běchu njeznaći z grafitijemi pomórali, papjernik wisaše skóncowany na štomje a wotpadki běchu rozmjetane. „Hdyž su tajke městna skóncowane, njeje to jeno za wobydlerjow mjerzace, ale předewšěm za hosći“, hněwa so jednaćel zaměroweho zwjazka Łužiska jězorina Sakskeje Daniel Just.
Nastali běchu tajke městna před lětami z wulkej prócu a dźakowano spěchowanju. Něhdźe 16 000 eurow tajka škitna hěta z wuhotowanjom płaći. „Wot 2012 do 2015 je na teritoriju našeho zwjazka dźewjeć tajkich hětow nastało“, Daniel Just rozłožuje. Na dalšich štyrjoch městnach natwarichu wotpočnišćo bjez hěty, za to z blidom, ławku, třěchu a ze stejakom za kolesa. Dohromady inwestowachu tehdy 200 000 eurow.
Policija (09.03.21)
„Wudźerjej“ granatu namakałoj
Delnja Hórka. Tak mjenowane magnetowe wudźenje ma po wšěm zdaću tež w Hornjej Łužicy přiwisnikow. Tejle zaběrje staj so mužej předwčerawšim w Delnjej Hórce wěnowałoj a ze sylnym magnetom w Sprjewi za pokładom pytałoj. Namakałoj pak staj něšto cyle hinaše, mjenujcy powostanku z Druheje swětoweje wójny. Z magnetom wućahnyštaj tam 30 centimetrow dołhu a wosom centimetrow šěroku granatu z rěki. Rozbuchadło ruskeho pochada přizjewištaj namakarjej pola policije. Fachowcy granatu přewzachu a wotwjezechu.
