Koronapandemija je minjene měsacy wšudźe wšitko změniła. Ale na ...
Krótkopowěsće (22.01.21)
Ličbje zemrětych přiběrałoj
Budyšin. W Budyskim wokrjesu su wčera 56 dalšich natyknjenjow z koronu zwěsćili. Ličba smjertnych padow rozrosće wo sydom na cyłkownje 444. Wot 1 246 schorjenych (+19) lěkuja 120 (-20) w chorowni. Tudyša incidenca wučinja 279,66. Zhorjelski wokrjes wčera rozprawješe wo 98 infekcijach a wosom w zwisku z koronu zemrětych. Incidenca tam je 213,28.
Kritizuja komisiju EU
Berlin. Mjeńšinowa rada Němskeje namołwja zwjazkowe knježerstwo a sejm, so dale wo lěpši škit mjeńšin zasadźeć. To zdźěli wčera mjeńšinowy běrow w Berlinje. Zdobom kritizuje mjeńšinowa rada rozsud komisije EU, žane prawniske rjadowanja za lěpši škit mjeńšin njezawjesć. Je njezrozumliwe, zo Europska unija politiku zwjazanosće we wšěch wobłukach zwoprawdźa, jenož nastupajo mjeńšiny ju wuzamkuje.
Chcedźa podpěru cofnyć
W Prawočanskim pralěsu dale za šnórami ćahaja
Digitalny debit jolka-swjedźenja jako wuslědk wuspěšneho spjećowanja
Kajka to ironija: Runje zarjadowanje, za kotrež su organizatorojo w minjenych lětach z pokazku „tež lětsa bjez livestreama“ wabili, je so hladajo na ličbu wobdźělnikow z dotal najwuspěšnišim wirtuelnym serbskim swjedźenjom stało. Što tajkale pandemija tola wšitko zamóže ... Hewak so korona w programje 23. jolki pod hesłom „Korutanska – Z korejtu přez dolinu“ nimale njejewješe, wothladajo wot na tři ducenty štučkow wopřijacy spěw Luciana Kaulfürsta, kiž – zastupujo takrjec tradicionalny jolka-chór – ze swójskimi hrónčkami we wobłuku tak mjenowaneho warm-upa zwěsći, zo tuchwilu postajeny radius aktiwitow 15 kilometrow za Łužicu njedosaha.
Nic najrjeńši, ale najstarši
Archiwny zwjazk swój onlinowy poskitk rozšěrja
Budyšin (SN/MWj). Posledni kwartal lěta 2020 su w Budyskim archiwnym zwjazku za to wužiwali, zo bychu swój onlinowy poskitk dale rozšěrili. Tam nimaja jenož wopisma, zapiski stawnistwa, radne protokole, zapiski wo křćeńcach, wěrowanjach a zemrětych a wšelake chroniki. Wot najnowšeho je nětko tež register dawkow jednotliwych wosobow digitalnje přistupny, rěka w nowinskim wozjewjenju měšćanskeho zarjadnistwa.
Tak mjenowany wosobowy dawk bu w lěće 1766 zawjedźeny, 1835 stupi na jeho městno přemysłowy a personalny dawk, pozdźiši dochodowy dawk. W nětko zjawnje přistupnych hamtskich knihach su zapisani w měsće a přisłušacych wsach bydlacy kaž tež jich dawk, kotryž mějachu płaćić. Štóž so ze swójbnymi stawiznami zaběra, móhł rešeršować, hač a hdźe su předchadnicy w měsće abo na wsach bydlili. Knihi pak su tohorunja za najwšelakoriše domiznowědne a za socialno-historiske slědźenje wažne žórło. Wone mjenujcy podawaja dohlad do struktury a hospodarskeje mocy wobydlerstwa města Budyšina we 18. a 19. lětstotku.
Policija (21.01.21)
Wobšudnistwo při telefonje
Hodźij. Sobudźěłaćerka Hodźijskeje tankownje je so předwčerawšim z woporom wobšudnika stała. Při telefonje wudawaše so muska wosoba jako serwisowy sobudźěłaćer. Wón přistajenej kazaše, zo měła jemu čisła we wobchodźe tankownje na předań poskićenych dobropisnych kartow podać. To je wažne, tak muž při telefonje žonje dale napowěda, zo móhli sumy aktualizować. Po tychle instrukcijach so sobudźěłaćerka měješe a njeznatemu jednotliwe čisła telefonisce poda. Kaž Zhorjelska policajska direkcija zdźěli, nasta tankowni na te wašnje něhdźe 900 eurow škody. Budyska kriminalna słužba pad nětko přepytuje. Policija wuraznje před tym warnuje, čisła tajkich dobropisnych kartow cuzym přez telefon přeradźić.
Milina w nuzy wotwonka
Wosrjedź Rownoho nastawa moderna wohnjowoborna gratownja
Rowno (AK/SN). Z nowej gratownju wosrjedź Rownoho změja tamniši wohnjowi wobornicy wjele lěpše dźěłowe wuměnjenja. Tak pisa jich nawoda Andreas Pudel w aktualnym hamtskim łopjenu Slepjanskeje gmejny. Komuna a wobornicy so nadźijeja, zo móža spočatk měrca do gratownje zaćahnyć.
Dotal wužiwa wobora nachwilny kwartěr w bywšej Tschammerec pjekarni, za čož su wobornicy jara dźakowni. Nastawacy nowotwar je naprawa inwesticiskeje potrjeby po změnjenym rewěrowym koncepće koncerna LEAG. Tak nastawa w centrumje Rownoho funkcionalna a technisce moderna gratownja. Nimo toho, zo změja za techniske wuhotowanje a za jězdźidła wjace městna, budźe twar potom tež lěpše móžnosće dalekubłanja a porjadne předrasćenske a sanitarne rumnosće skićić. Wosebitosć je eksterne zastaranje z milinu w nuzowym padźe. Dyrbjała-li we wsy dlěši čas milina wupadnyć, móža gratownju nuzowemu agregatej přizamknyć. W tym padźe by so wona z komunikaciskim srjedźišćom we wsy stała, zo móhli pomoc organizować.
Puknjeny wodowód zwuporjedźeli
Krótkopowěsće (21.01.21)
Znowa wjace padow
Budyšin. 208 dalšich natyknjenjow z koronawirusom su wčera w Budyskim wokrjesu zwěsćili. To je znowa wjace padow, kotrež maja tež ze 141 nowoinfekcijemi w Zhorjelskim wokrjesu. Tam rozprawjachu wčera wo 16 wozjewjenych smjertnych padach a wo incidency 227,52. W Budyskim wokrjesu je pjeć pacientow zemrěło, incidenca tu wučinješe 309,66.
Kretschmer strowi serbske dźěći
Drježdźany. Sakski ministerski prezident Michael Kretschmer (CDU) strowi z widejom serbske dźěći k ptačemu kwasej. W poselstwje, kotrež serbsce započina, wón wobžaruje, zo njemóža dźěći jeho lětsa w statnej kencliji na ptači kwas wopytać. Tak wjeseli so na klětu, hdyž zawěsće zas dźěći na ptačim kwasu w sakskej stolicy powita. Postrow je pod www.youtube.com/watch?v=fyJMih8nnRI widźeć.
Nowe wuslědki předstajiła
Policija (20.01.21)
Dwójce błyskali
Prěčecy. Dodźerženje maksimalneje spěšnosće 50 km/h su předwčerawšim dopołdnja w Prěčecach kontrolowali. 14 přespěšnych šoferow při tym lepichu. Zwjetša wosta při warnowanju, jenož jenički změje pokutu płaćić. dokelž błysknychu jeho z 78 km/h. Samsny dźeń popołdnju natwarichu policisća swoje nastroje w Błohašecach. Tam bě wot 865 jězdźidłow 16 přespěšnych. Rekord docpě Budyski Opel z 81 km/h.
