Salow bjez předstejićerja
Nowowuzwolena Kulowska měšćanska rada so skonstituowała
Kulow (AK/SN). Z 15 radźićelemi startuje 26. meje wuzwolena Kulowska měšćanska rada do wólbneje doby 2019–2024. To je jedne městno mjenje hač dotal. Přičina je, zo bě AfD při wólbach dosć hłosow za dwě městnje dóstała. Dokelž pak měješe jenož jednoho kandidata, wostanje jedne městno njewobsadźene. „Nadźijam so, zo wšitcy derje hromadźe dźěłamy“, rjekny wčera měšćanosta Markus Posch (CDU). Za prěnjeho zastupowaceho měšćanostu wuzwolichu Georga Szczepanskeho (CDU). Salowčan wot lěta 1994 parlamentej přisłuša a je wot 2009 zastupowacy měšćanosta. Druha zastupowaca měšćanostka je Kulowčanka Birgit Bjeńšowa (Powšitkowne wobydlerske zastupnistwo/ABV), kotraž prěni raz radźe přisłuša.
Podobneje předawarnje njebyło
Něhdy bě w nimale kóždej wsy nakupowanišćo, hdźež poskićachu twory wšědneje potrjeby. Runočasnje běchu to socialne centrumy, hdźež so wjesnjenjo rady k bjesadźe zetkawachu. W našej lětnjej seriji na něhdyše wjesne wobchody dopominamy.
Dźensa: Radwor (20/kónc)
Hdyž rozhladuješ so dźensa w Radworju z jeho něhdźe 700 wobydlerjemi za wobchodom z tworami wšědneje potrjeby, to žane zbožo nimaš. Runje tak kaž we Worklecach, w Chrósćicach a druhdźe njemóža tež Radworčenjo w swojej wsy nakupować. W Młynskich chěžach bydlaca 94lětna Marja Wudyjowa, kotraž bě wot 1964 do 1976 zastupowaca wjesnjanostka Radworja, powěda, zo mějachu tam za čas jeje dźěćatstwa třoch pjekarjow. Mjeztym zo ludźo w Rječkec a Kubańkec pjekarni chlěb a całty kupowachu, mějachu w Bělkec pjekarni nimo toho wobšěrny poskitk kolonialnych tworow. Tež po Druhej swětowej wójnje je so tam Franc Čornak hišće dlěši čas wo dobry poskitk za zastaranje ludnosće starał. „Tam sy wšo dóstał, štož sy trjebał. Hač drjewjancy, kisykał abo jerje, hač piwo abo nowy kofejowy serwij“, so duchownje hibićiwa Marja Wudyjowa dopomina.
Wobydlerjo Němcow, ale tež wšitcy ći, kotřiž minjene měsacy ...
Předawarnje zbližił
Krótkopowěsće (05.09.19)
Społnomócnjeny powołany
Budyšin. Załožba za serbski lud je Měrka Šenka za społnomócnjeneho za digitalizaciju powołała. To zdźěli dźensa sobudźěłaćerka załožby Marija Šimanowa. 41lětny poradźowar za IT-procesy a digitalne projekty z Drježdźan je dźensa hač do kónca lěta 2020 płaćiwe zrěčenje podpisał. K jeho prěnim nadawkam słuša přihot digitalneje konferency dnja 29. nowembra 2019 w Budyšinje.
Pytaja noweho přirjadnika
Wojerecy. Město Wojerecy pyta noweho přirjadnika wyšeho měšćanosty. Zastojnstwo chcedźa spočatk februara znowa wobsadźić, zdźěla město na swojej internetnej stronje. Dotalny přirjadnik-měšćanosta Thomas Delling poda so na wuměnk. 67lětny diplomowy matematikar bu 2001 do zastojnstwa powołany. Přirjadnika powołuje měšćanska rada na dobu sydom lět.
Skórnik kontra klawěry
Swěčki a smólnicy park wobswětlili
Policija (04.09.19)
Młodostnych paduchow lepili
Wojerecy. Sydom młodostnym w starobje 15 do 19 lět móžeše Wojerowska policija nětko nimale 30 deliktow dopokazać. Wot lońšeho junija hač do lětušeho januara běchu so woni we Wojerecach do zawodow, pěstowarnjow, praksow a předawanišćow zadobywali a z nich zwjetša pjenjezy, alkohol a cigarety kradnyli. Hódnota rubizny wučinja něhdźe 5 500 eurow, cyłkownje načinjena wěcna škoda pak 30 000 eurow.
Nowosće a znate na swjedźenju
Bórk (JoS/SN). Stajnje nowe ideje zapřijeć spyta Bórkowski wjesny klub při wuhotowanju swojeho wjesneho swjedźenja. To bě tež minjeny kónc tydźenja widźeć. Po dlěšej přestawce běchu před štyrjomi lětami we wsy w gmejnje Sprjewiny Doł swjedźeń wozrodźili. Štož su něhdy ze stanom a tombolu poměrnje jednorje znowa zahajili, ma mjeztym wjetše struktury. Nowosć lětsa bě, zo mějachu tři atrakcije na hermanku a zo přewjedźechu dartowy turněr. Znate ze zašłych lět porno tomu bě, zo móžachu wopytowarjo zaso trochować. Tónraz dyrbjachu zwěsćić, kelko jabłukowych póčkow w škleńcy bě. Kulturny wjeršk bě wustup Bórkowskich dźěći a Wojerowskeje skupiny linedance.
Přihotuja Nowy Miłoraz
Pohrjebnišćo znowa wuhotować budźe wosebite wužadanje
Slepo (AK/SN). Přesydlensku městnosć za Nowy Miłoraz sewjernje Slepoho při Dźěwinskim puću su nětko wotkrywać započeli. To zdźěli nawoda Slepjanskeho twarskeho zarjada Steffen Seidlich na wčerawšim posedźenju tamnišeje gmejnskeje rady. „13. awgusta wotmě so prěnje wuradźowanje wšitkich wobdźělenych partnerow, planowarjow a zastupjerjow twarskeje firmy z Krušwicy“, rjekny Seidlich. Twarskich dźěłow dla je spěšnosć na puću wot Slepoho do Lěska (Lieskau) na 30 km/h wobmjezowana. Přičina je, zo dyrbja twarske mašiny jězdnju časćišo přeprěčić.
Direktnje při Slepjanskim pohrjebnišću, ale na separatnej płoninje nastanje pohrjebnišćo za Nowy Miłoraz. „Předwidźane płoniny chcemy hišće lětsa napjelnić a zrunać. Wuhotować budźemy je hakle klětu, dokelž dotal žanu dowolnosć nimamy“, twarski nawoda rozłoži. W juliju je gmejna Slepo próstwu Zhorjelskemu wokrjesej zapodała.
Kak za sebje lěpje wabić?
Chrjebja (SK/SN). Partnerska iniciatiwa biosferoweho rezerwata Hornjołužiska hola a haty, kotraž stara so wo lěpše zwičnjenje prózdninskich domow a dowolowych bydlenjow, zetka so njedawno na Ladušec ratarskim statoku w Chrjebi. Iniciatiwa je jedna z 23 tajkich po wšej Němskej a jej přisłuša wjace hač 20 prózdninskich přebywanišćow. Hłownje zaběrachu so wobdźělnicy z prašenjom, kak móža małe předewzaća na polu turizma lěpje zwičnjeć a kak hodźi so za nje lěpje wabić. Ladušec ratarski statok – tam kombinuja aktiwne ratarstwo z hóstnymi stwami a předawanjom domjacych wudźěłkow – bě jedyn z prěnich, kotrež su we wobłuku biosferoweho rezerwata dowolowe přebytki poskićeli.
Serenada w zelenym
