Poslednje dny stareho a prěnje dny nowe­ho lěta su na mnohich městnach składnosć, na dźěło zašłych měsacow zhladować. Serbske Nowiny rozhladuja so po dwurěčnych komunach, što su tam zdokonjeli.

Kulow (AK/SN). Najebać koronapandemiju móžeše město Kulow lětsa swoje planowane naprawy zwoprawdźić, kaž měšćanosta Markus Posch (CDU) w swojim zhladowanju 2020 podšmórnje. „Wažne najprjedy raz bě, zo smy nowu pěstowarnju w Kulowje dotwarili a za wužiwanje přepodali. Dale smy saněrowanje Krabatoweje zakładneje šule dokónčili“, sćehnje Posch prěnju bilancu. W zakładnej kaž tež we wyšej šuli „Korla Awgust Kocor“ je město do digitalneje infrastruktury inwestowało. Klětu chcedźa hišće kónčne nastroje kaž tablety, laptopy a digitalne tafle wobstarać. Wonkownje najwočiwidniše je nowowuhotowane Kulowske torhošćo.

Štóž so čestnohamtsce na dobro swojich sobučłowjekow zasadźa, sej tež zjawny dźak zasłuža. To płaći za kulturne cyłki a Domowinske skupiny runje tak kaž za čłonow gmejnskich a wjesnych radow. Kelko časa woni lěto wob lěto za swoje skutkowanje nałožuja, zwonka­stejacy lěd­ma spóznawaja. To dźě njejsu jeno zjawne posedźenja parlamenta, ale tež zhromadźizny wuběrkow a gremijow kaž zarjadniskeho abo wopłóčkoweho zwjazka. A potom dyrbja sej snano hišće po­hórški wšelkich wobydlerjow naposkać, hdyž raz něšto tak njefunguje, kaž měło być. Ja znajmjeńša symbolisce swój kłobuk před wšěmi zejmuju, kotřiž so takle angažuja a so sobu wo to staraja, zo by naše wšědne žiwjenje na wsach a w gmejnach derje fungowało. Wosebity dźak zasłuža sej wězo tón, kiž tajke čestnohamtske dźěło hižo dołho na so bjerje, kaž Stefan­ Rjeda w Pančicach-Kukowje. Njesprócniwych duchow kaž jeho njemóžeš w gmejnje dosć měć. Marian Wjeńka

Zhorjelc (SN/JaW). Přezcyłnje policija we wo­krjesomaj Budyšin a Zhorjelc kontroluje, hač so wobydlerjo po postajenjach wo škiće před koronawirusom maja.­ To wobkrući na naprašowanje medijo­wy rěčnik Zhorjelskeje policaj­ske­je direkcije Kai Siebenäuger. „Kolegojo a koleginy dźiwaja při tym na komuni­kaciju, wabja wo akceptancu za naprawy a sensibi­lizuja ludźi za płaćiwe prawidła. Hakle w druhej kročeli wuprajeja chłostanja.“ Při­wšěm zastojnicy zwěsćeja, zo so wjetšina po postajenjach ma.

W serbskich a dwurěčnych gmejnach a městach su wot spočatka decembra wjac hač 120 přeńdźenjow přećiwo škitnym naprawam koronawirusa dla zwěsćili. Najwjace z nimale sto bě jich we Wojerecach, w Rakecach wjac hač dźesać, w Njeswačidle nimale dwaceći a w Ralbičansko-Róžeńčanskej gmejnje znajmjeńša jedyn pad. „Detaile njemóžemy podać. W dalšich dwurěčnych gmejnach njejsmy dotal žane přeńdźenja zwěsćili. To pak awtomatisce njerěka, zo so wšitcy wobydlerjo po přepisach maja, ale zo dotal ničo zwěsćili njejsmy“, Kai Siebenäuger rozłoži.

Sakska da Serbam wjace pjenjez

Drježdźany. Naćisk za dwójny etat Swobodneho stata Sakskeje 2021/2022 je financne ministerstwo wčera krajnemu sejmej přepodało. Přisłušne ministerstwo za wědomosć, kulturu a turizm planuje za financowanje Załožby za serbski lud dohromady 7,972 milionow eu­row.­ Předwidźana cyłkowna suma je 1,761 mio. eurow wyša hač lětuša.

Pjećina padow w hladarnjach

Budyšin. 352 nowych natyknjenjow z koronawirusom su wčera w Budyskim wokrjesu zwěsćili. Kaž krajnoradny zarjad zdźěli, registrowachu něhdźe pje­ćinu aktualnych padow w hladarnjach abo zarjadnišćach za ludźi ze zbraše­njemi. Z 3 429 schorjenych (+288) lěkuja 201 (+6) w klinice. Wokrjes Zhorjelc je wčera 249 nowoinfekcijow a 14 smjertnych padow wozjewił.

Nowostka online přistupna