Krótkopowěsće (04.06.21)
Kardinal Marx chce wotstupić
Mnichow. Mnichowsko-Freisingski arcybiskop, kardinal Reinhard Marx, je bamža Franciskusa prosył jeho ze zastojnstwa wuwjazać. Katolska cyrkej je „mortwy dypk“ docpěła, rěka w dźensnišej zdźělence biskopstwa. „Mi dźe wo to, sobuzamołwitosć za katastrofu splažneho znjewužiwanja přez dostojnikow cyrkwje w minjenych lětdźesatkach přewzać.“
Dalšej wobkrućenskej městnje
Budyšin. Wot noweho tydźenja tež apotece při Garnizonskim naměsće w Kamjencu a na Wojerowskim Hrodowym naměsće šćěpjenje pře koronu digitalnje wobkrućatej. W Budyskim wokrjesu zwěsćichu hač do wčerawšeho 33 natyknjenjow a dwaj smjertnej padaj. Incidenca tu je po RKI dźensa 39,0. 16 infekcijow a ličbu štyrjoch zemrětych wozjewichu wčera we wokrjesu Zhorjelc. Incidenca tam je po RKI dźensa 28,5.
Muzej Budyšin zaso wotewru
Dyrbja dom jenož hišće wotewrěć
Wosrjedź Wětrowa čaka wjacegeneraciske zetkanišćo na to, zo by tam žiwjenje zaćahnyło. Hdźež něhdy ludźo nakupować chodźachu, chcedźa so přichodnje wjesnjenjo zetkać.
Wulka swětła rumnosć wopytowarja wobdawa. Na sćěnach wisaja mólby Wětrowčanki, wuměłče Ingrid Konschakoweje. Jeje swójba je we wsy přez lětdźesatki zasydlena a derje znata. Konschakowa hižo njesćerpnje na to čaka, zo móže w zetkanišću z dalšimi wobydlerjemi wuměłsce tworić, čitać, hrać abo ručne dźěła zhotowjeć. Wšako chce dom čestnohamtsce nawjedować. „Wuměnjenja za bohatu zaběru su date“ rozłožuje wjesnjanosta Stanij Ryćer (Rjemjesło Bóšicy). „Mjez druhim mamy dosć wobšěrnu biblioteku.“
Polcy z knihami sobu pjelnić
Hladaš-li na polcy, ći napadnje, zo njesteja tam jeničce zestarjene knihi, ale tež nowše wudaća a to wšelkich literarnych žanrow, wot leksikona hač ke krimijej, wot lubosćinskeho romana hač k pokazkam, kak pjec abo warić. Štóž ma knihi, kotrež chcył druhim přewostajić, njech je Bóščanskej gmejnje da, zo móhli je do polcow zarjadować.
Dom za mnohich
Poskića shuttle potrěbnym
Njewšědny projekt Bóščanskeho wjesnjanosty Stanija Ryćerja
Bóščanska gmejnska rada je sej přezjedna, zo trjebaja wobydlerjo, kotřiž njejsu sami hižo mobilni, podpěru. Milenka Rječcyna je so z wjesnjanostu Stanijom Ryćerjom (Rjemjesło Bóšicy) rozmołwjała, kak jim pomhać.
Kak sće ideju zrodźił, pomhać wobydlerjam, kotřiž njejsu wobstajnje mobilni, sej wšědneje potrjeby wobstarać?
S. Ryćer: Sym přewšo wjesoły, zo gmejnscy radźićeljo projekt podpěruja. Wobydlerjo našeje gmejny maja na swojich wsach lědma móžnosć, nakupować abo sej něšto wobstarać. Přichodna składnosć za nakup, abo na přikład tež k lěkarjej abo do apoteki hić, je Njeswačidło. Mamy tohorunja tójšto ludźi, kotřiž hižo sami z awtom njejězdźa, wosebje we Wětrowje. A busy zjawnych linijow jězdźa w njepřihódnych časach. Tuž sym so rozsudźił jich podpěrać.
Kak je k tomu dóšło? Su Was ludźo na to narěčeli?
Policija (03.06.21)
Wopita znjezbožiła
Poršicy. Pře wšu měru alkoholej přirěčała bě žona, kotraž předwčerawšim wodźidło swojeho awta hižo pod kontrolu njeměješe. 32lětna wodźerka Peugeota je na awtodróhowym mosće w Poršicach w Kubšiskej gmejnje najprjedy do praweho a na to do lěweho wobhrodźenja zrazyła. Wona pak dale jědźeše a w Poršicach do wjacorych nakromnych kamjenjow zajědźe. Wobškodźenjow awta dla wšak skónčnje hižo dale jěć njemóžeše. Policisća naměrichu pola njeje 2,3 promile alkohola.
Dźěłaćerjo w tunlu maja lěpje škitani być
Bóšicy (SN/MiR). Na hłownym dźělu Wětrowskeje deponije, kotraž słuša předewzaćelskej skupinje Preiss-Daimler, na tak mjenowanym Bóščanskim polu, ma w tam připrawjenym tunlu za kontrolu a hladanje jězdźidłow škitna šćežka za pěškow nastać. Radźićeljo gmejny Bóšicy njemějachu w tej naležnosći na swojim wčerawšim posedźenju žanežkuli wobmyslenja a su předłoze jednohłósnje přihłosowali. Postupowanje je dźěłoškitnych žadanjow dla trěbne. Wšako je tunl tak twarjeny, zo móža nakładne awta do njeho zajěć, njemóža pak přez njón jěć. Tam dźěłacy trjebaja tuž přiměrjeny škit a dyrbja tunl z wobeju bokow spěšnje wopušćić móc. Kaž wjesnjanosta Stanij Ryćer (Rjemjesło Bóšicy) na naprašowanje rjekny, njejsu z tym za Bóščansku dobrowólnu wohnjowu woboru někajke wosebite nadawki zwjazane.
Tež při starowni pomału jězdźić
W młynje směš so zaso posydnyć
Na wodźenje po parku
Smochćicy. Na štyrjoch terminach poskića kubłanišćo swjateho Bena w Smochćicach kulturnohistoriske a botaniske wodźenje po tamnišim hrodowym parku. Z wopytowarjemi chcedźa so podać na najwšelakoriše slědy zašłosće, zo bychu jim měnjate stawizny hrodu a parka zbližili. Prěni termin je sobotu, 5. junija, w 15 hodź. Zajimcy měli so pod telefonowym čisłom 035935/ 220 přizjewić. Zetkanišćo je při studni před seminarnym domom. Wobdźělenje na wodźenju płaći na wosobu pjeć eurow, kotrež wobdźělnicy na městnje zapłaća.
Bulwar wobchad poćežuje
Kubłanje z přirodu zwjazać
Slepo (AK/SN). Hort w loni wotewrjenym Němsko-serbskim šulskim centrumje Slepo chce dołhodobnje tež přirodowu a lěsnu pedagogiku do swojeho koncepta zapřijeć. Za to wjedu rozmołwy z přirodoškitnym zwjazkom a ze statnym zawodom Sakski lěs. „Chcemy rady lěsnu skupinu w horće wutworić. To ma pilotowy projekt ze statnym zawodom być“, podšmórny nawodnica šulskeho horta Christin Becker na wčerawšim posedźenju Slepjanskich gmejnskich radźićelow. Za swój zaměr chcedźa najprjedy raz šulski teren wužiwać. Pozdźišo móhli sej předstajić, bliski lěs sobu zapřijeć. Dwě kubłarce so tuchwilu zaměrnje dale kubłatej, zo byštej sej certifikat za lěsnu pedagogiku zdobyłoj. Swój projekt chce hort ze skupinu 30 šulerjow zahajić. Za nich twarski wóz wotpowědnje wuhotuja. Šulerjo a kubłarki móža jón potom po potrjebje za wuknjenske wobsahi wužiwać.
Cyrkej dóstanje nowu třěchu
Hdyž něhdźe cyrkej přetwarjeja abo ponowjeja, njeje to jeno z wjele pjenjezami zwjazane, ale tež wulki podawk za cyłu wosadu. Tajki projekt nětko w Njeswačidle zwoprawdźeja.
Njeswačidło (ES/SN). Spočatk meje započachu Njeswačansku ewangelsku cyrkej zaróštować. Nimo ducym zdaše so Boži dom hišće w dobrym stawje, ale runje to bě zamylace. Wšako dyrbiš za twarskimi dźěłami daloko do zašłosće hladać. W aprylu 1945 bu Njeswačanska cyrkej nimale dospołnje zničena. Tež wěža tehdy swoju hawbu zhubi.
