Ateljej Wapplera přistupny był
W mjeńšim wobjimje hač hewak su swjatki akciju wotewrjenych wuměłskich ateljejow wotměli. W Sćijecach pola Budyšina móžachu zajimcy do dźěłarnje znateho molerja pohladać.
Budyšin (CS/SN). We wobłuku akcije wotewrjenych ateljejow je swjatkowničku wuměłstwowa historikarka Astrid Wappler ateljej swojeho lěta 2010 zemrěteho nana dr. Dietmara Wapplera w Sćijecach pola Budyšina zjawnosći spřistupniła. Wona přeprosy wopytowarjow k indiwiduelnym wodźenjam a rozłoži jim wuměłske zaměry Dietmara Wapplera, molowaceho žónskeho lěkarja. Wón prócowaše so wo najwjetšu jednorosć a wobhladowaše so sam w tradiciji Pabla Picassa a Kazimira Malewiča. Kaž křinja z pokładami wopřijima ateljej twórby z rozdźělnych tworićelskich dobow wuměłca. Dokelž bě wón bywšu blidarnju kupił, je wšitko hišće tak zachowane, kaž bě to Wappler něhdy zawostajił. Hdys a hdys jeho dźowka a wudowa Astrid a Roswitha Wappler ateljej wočinitej, zo móhli zajimcy do njeho pohladać. Dokelž bě wjedro swjatkowničku měnjate, njemóžachu wobrazy wonka prezentować.
Spěšnje jednać dyrbjał
Dróhotwarske naležnosće sej wuwzaćne rjadowanje žadali
Rakecy (JK/SN). Na minjenym posedźenju Rakečanskeje gmejnskeje rady wjesnjanosta Swen Nowotny (CDU) radźićelow prošeše, přihłosować spěšnemu rozsudej, kotryž bě nuznje trěbny, zo njebychu so dźěła při Jitkowskim puću dale dlijili. Z objektiwnych přičin bě trjeba wutworić dalšu, přidatnu nachwilnu dróhu, zo bychu předewzaća podłu Jitkowskeje dróhi za čas twarskich naprawow docpějomne byli a paralelnje twarske dźěła njemylene pokročowali. Pomocna dróha wjedźe přez gmejnsku ležownosć, ale zawinowaše přiwšěm přidatne wudawki 85 000 eurow. Tež hdyž je Rakečanska gmejna kmana tutu sumu zwjesć, so wjesnjanosta nadźija, zo dóstanje za přidatne wudawki spěchowanje. Wón liči z 75 procentami. Tak su dróhotwarskej firmje najprjedy raz podźěl we wobjimje 59 000 eurow zapłaćili, zo njebychu so dźěła při wažnym předewzaću gmejny dlijili a zo by firma dróhu w planowanym času zhotowiła. Mjeztym su tež próstwu wo spěchowanje zapodali a so nadźijeja, zo ze strukturneho fondsa spěchowanje přizwolene dóstanu.
Změja dale mjeno basnika
Šulerjo a wučerjo Wojerowskeje zakładneje šule „Handrij Zejler“ w swojim dotalnym twarjenju hižo předołho njebudu. Woni na nowe městno přećahnu a něšto wažne sobu wozmu.
Wojerecy (AK/SN). Wojerowska Zakładna šula „Handrij Zejler“ Při Worjole přećehnje do twarjenja bywšeje wyšeje šule „Na kromje města“. Na nowej městnosći wobchowa zakładna šula dale mjeno Handrija Zejlerja. To su Wojerowscy měšćanscy radźićeljo na swojim wčerawšim posedźenju jednohłósnje wobzamknyli. Z tym wotpowědowachu přeću staršiskeje přirady, poručenju šulskeje konferency a stejišću krajneho zarjada za šulu a kubłanje. „Smy prašenje tež w šulerskim parlamenće rozjimali. Tež tam bě přezjednosć, zo ma naša šula mjeno Handrija Zejlerja nosyć“, podšmórny jeje nawodnica Petra Šenkowa. Wojerowske kubłanišćo je wot lěta 2001 po serbskim fararju a basniku pomjenowane.
Krótkopowěsće (26.05.21)
Incidenca dźensa niša hač 50
Budyšin. Sydomdnjowska incidenca je dźensa w Hornjej Łužicy marku 50 podkročiła. Roberta Kochowy institut mjenowaše za Budyski wokrjes 41,4 a za Zhorjelski 25,3. Skedźbnja pak na to, zo njebě swjatkow dla telko testow. Ličba smjertnych padow je we wokrjesomaj Budyšin wo tři na 893 a Zhorjelc wo dwaj na 1 110 rozrostła.
Konferencny spis wušoł
Brüssel. Nowa jendźelskorěčna publikacija Serbskeho instituta je pod titulom „Dimensions of Cultural Security for National and Linguistic Minorities“ w nakładnistwje Peter Lang wušła. Wudali su spis na zakładźe mjezynarodneje wědomostneje konferency „Dimensije kulturneje wěstoty w etniskich a rěčnych mjeńšinach“ lěta 2016 w Budyšinje Jean-Rémi Carbonneau, Ines Kellerowa a Fabian Jacobs.
Wo Romach na nowe wašnje
Zo bychu insekty městno měli
Přičina rozmnoženja krokawow dosć jednora
Stróža (SN/MWj). Z tym ani sobudźěłaćerjo zarjadnistwa biosferoweho rezerwata Hornjołužiska hola a haty ličili njeběchu. Jeničce 26. měrca 2021 dósta so wjace hač 8 000 kobołkowych krokawow (Knoblauchkröte) k 500 metrow dołhemu amfibijowemu płotej pola Stróže w Malešanskej gmejnje. Sobudźěłaćerjo přirodneje straže mějachu tójšto dźěła, zo bychu je přez puć znosyli, informuje nowinska rěčnica biosferoweho rezerwata Christina Schmidt.
Při mjenowanym škitnym płoće su wot 25. februara hač do 12. meje dohromady nimale 19 500 amfibijow zličili. Tale ličba je ćim zajimawša, dokelž bě jich loni při cyłkownje wosom kilometrach płotu w biosferowym rezerwaće jeničce 21 000 amfibijow. W mokrych lětach bě to tež hižo raz 120 000 amfibijow.
Za prózdniny so přizjewić
Njeswačidło. Wotnětka smědźa so dźěći za štyri wšelake prózdninske campy Njeswačanskeje přirodoškitneje stacije přizjewić. Na wuběr steja slědźerske lěhwo wot 25. do 29. julija, insektowy přebytk wot 29. do 31. julija, zelowy camp wot 1. do 6. awgusta a ornitologiske lěhwo wot 8 do 13. awgusta. Nadrobniše informacije dóstanu zajimcy internetnje pod . Přizjewjenja přijimuja pod telefonowym čisłom 035933/ 31 900, hdźež tež na prašenja wotmołwjeja.
Knihu wirtuelnje předstaja
Budyšin. Na wirtuelne knižne předstajenje z awtorom Benediktom Dyrlichom štwórtk, 27. meje, w 19 hodź. přeproša Ludowe nakładnistwo Domowina wšitkich zajimcow. Awtor čita ze swojeje knihi „Doma we wućekach 2“, kotraž je nazymu 2019 wušła. Přizjewić móža so zajimcy přez link na shopje LND pod .
Maja čaru za rolery
Brězowka. Kołowokoło noweho hrajkanskeho nastroja maja w Brězowskej pěstowarni „Baćonjace hnězdo“ nětko tež čaru za rolery. To zdźěli Dźěwinski wjesnjanosta Helmut Krawc (SPD) na minjenym posedźenju gmejnskeje rady. Financowali su ju z komunalnej pawšalu a swójskim dźěłom wobydlerjow. Čara hodźi so za dwu- a třikolesa.
Policija (25.05.21)
W Strowotnej studni kóncowali
Budyšin. Kaž wandalojo zachadźachu njeznaći předwčerawšim w Budyskej Strowotnej studni. Tam rozbichu škleńcu busoweho zastanišća a wobškodźichu třěchu za nakupowanske wozyčki bliskeje kupnicy. Škoda wučinja 2 000 eurow.
Kózły za třěchu pozdźišo dóstanu
Kubšicy (CS/SN). Dźěła na najwažnišim inwesticiskim objekće Kubšiskeje gmejny, powjetšenju Zakładneje šule Bošecy, dale derje postupuja. Přitwar je w hrubym hotowy. Wot spočatka meje nastawa mjezytwarjenje. Před tydźenjom je metalotwarska firma aluminijowu a škleńčanu fasadu nowotwara zhotowjeć započała. Po tym maja so samsne dźěła na mjezytwarje zahajić.
Poprawom chcychu dźensa staru třěchu wotnošować započeć. Dokelž pak kózły za nowu třěchu hakle z časowym zastatkom dóstanu, dyrbjachu tónle termin na 31. meju přestorčić, zdźěli wjesnjanosta Olaf Reichert (njestronjan).
Historiska bróžnja wuchowana
Na Šusterec statoku w Trjebinje nastanje dalše twarjenje. Hač do pózdnjeho lěća natwarja tam pod pomnikoškitom stejacu bróžnju, kotraž je wjele lět na hinašim městnje stała.
Trjebin (JoS/SN). Skónčnje tak daloko je. Wjace hač sto lět stara tykowana bróžnja z bywšeho Trjebinskeho wjesneho dźěla Za Goru (Hinterberg) dóstanje na Trjebinskim Šusterec statoku nowy domicil. Natwariła bě ju před dobrym lětstotkom Jurkojc serbska swójba na swojej ležownosći. Jako bě jasne, zo dyrbješe so Za Goru brunicy dla zminyć, da Redec swójba bróžnju pod škit pomnikow stajić. Zaměr bě, rědke twarjenje dalšim generacijam zachować. Ale kajki móhł jeje přichod być a předewšěm hdźe? Rozrisanje nańdźechu w Trjebinje. Tamniši Šusterec statok je połny stawizniskich zajimawostkow. K bydlenskemu domej ludoweho herca a dudaka Hanza Šustera by so snano tež Redec bróžnja hodźała.
