Ličba zemrětych dale přiběra

Budyšin. W Budyskim wokrjesu zwěsćichu wčera w zwisku z koronawirusom 50 nowonatyknjenjow a sydom smjertnych padow. 467 wosobow (+31) je schorjenych. Incidenca je 106. Zhorjelski wo­krjes informowaše wčera wo 43 nowych infekcijach a dalšich 13 zemrětych pacientach za dobu wot 28.11. 2020 hač do 4. februara. Incidenca tam je 95,36.

Wabja digitalnje wo šulerjow

Worklecy. Worklečanska wyša šula „Michał Hórnik“ wabi nětko digitalnje wo nowych šulerjow. Pod hesłom „zetkawanski dźeń za 4. lětnik“ předstajitej šulerce Lea a Pia w njecyłych dźewjeć minutach swoju šulu. Mjez druhim rěčitej ze šulskej socialnej dźěłaćerku a z nawodu kubłanišća. Tež nowa sportowa hala, kabinet za wučbu chemije a šulerska kuchnja hraja rólu.

Nowy poskitk Serbskeho muzeja

Budyšin. Smolerjec kniharnja w Domje Ludoweho nakładnistwa Domowina na Budyskej Sukelnskej drje je koronoweje pandemije dla dale zawrjena. Wot póndźele, 15. februara, pak poskića tam service „Click & collect“. Skazanki zajimcow přijimuja pod telefonowym čisłom 03591/577 288, e-mailnje pod abo w online-wobchodźe pod www.domowina-verlag.de. Wotewzać hodźa so skazane twory ze zličbowanku wot póndźele do pjatka wot 9 do 16.30 hodź w Smolerjec kniharni. Kupcy měli klinkačk při zachodźe do kniharnje wužiwać.

Šulerjow přizjewić

Ralbicy. Podobnje kaž na druhich wyšich šulach maja tež na Ralbičanskej starši šulerjow lětsa dwě móžnosći, swoje dźěći do přichodneho 5. lětnika přizjewić. Z póštu je to hač do 17. februara móžno. Wosobinsce móža starši swoje dźěći hišće hač do 16. februara přizjewić, a to jutře, pjatk, wot 10 do 13 hodź., póndźelu wot 8 do 14 hodź. a wutoru wot 10 do 17 hodź. We woběmaj padomaj trěbne su přizjewjenski formular, kubłanske doporučenje, ­porodne wopismo, połlětna informacija a dopokaz šćěpjenja pře wosypicy.

Mosty skóncowane

Wojerecy (SN/MWj). Dźensniši dźeń europskeho nuzoweho telefona dopomina na wažne dźěło, kotrež na njeličomnych městnach wšudźe tam wukonjeja, hdźež nuzowe telefonaty dochadźeja. Jedne z tychle městnow je wuchowanska dispatchernja we Wojerecach. Tam dochadźeja wšitke telefonaty pod čisłom 112 z Budyskeho a Zhorjelskeho wokrjesa. Disponenća dźěłaja tam w 24hodźinskim rytmusu. Wjacehodźinske zasadźenja wotměnjeja so z přestawkami. Wšědnje je 14 sobudźěłaćerjow zasadźenych. Kóždy z nich ma dwójnu kwalifikaciju a něhdźe 5,5 lět wukubłanja za sobu. Woni su wukubłani powołanscy wohnjowi wobornicy a nuzowi sanitetarjo.

Alarm na rewěrje

Budyšin. W normalnym padźe přismali policija k městnu njeskutka, njezboža abo tež wohenja. Wčera připołdnju bě tele městno Budyski policajski rewěr na Dwórnišćowej sam. Štwórć po dwanaćich přizjewi awtomatiska připrawa woheń na rewěrje a alarmowaše powołanskich wobornikow runje tak kaž dalšich dobrowólnych kameradow. Zastojnicy twarjenje bjezposrědnje na to wopušćichu a so na předpisanych městnach zhromadźichu. Wobornicy so na terenje a w twarjenjach rozhladowachu a přičinu alarma spěšnje wuslědźichu. Jednaše so wo techniski defekt tepjenskeje připrawy. Bórze na to móžachu policisća w swojej słužbje pokročować.