Radnica dale zawrjena
Budyšin. Měšćanske zarjadnistwo Budyšina wostanje tež dale za publikum zawrjene. Kaž w nowinskej zdźělence rěka, płaći to tak dołho, doniž lockdown njezběhnu, najprjedy raz hač do 14. februara. Zarjadnistwo porno tomu dale regularnje dźěła. Wobydlerjo měli so ze swojimi naležnosće prěnjorjadnje telefonisce na jednotliwe wobłuki wobroćić. Dokumenty móža tam z póštu abo e-mailnje słać. Wěstotnych přičin dla pak žane word- abo excel-dataje njepřiwozmu, pdfki su móžne. We wuwzaćnych nuznych padach hodźa so wosobinske terminy telefonisce dojednać.
Za swjedźeń so přizjewić
Pančicy-Kukow. Najebać tuchwilne połoženje korony dla planuje Křesćansko-socialny kubłanski skutk za 13. junij lětuši klóšterski a swójbny swjedźeń w Pančicach-Kukowje. Za njón móža so wuměłcy, kulturne skupiny a towarstwa hač do kónca februara přizjewić. Swjedźeń na klóšterskim dworje a w klóšterskej zahrodźe ma stać pod hesłom ,,Regionalnosć ma hódnotu“. Přizjewjenja su móžne na internetnych stronach gmejny, klóštra a Budyskeho wokrjesa.
Chcedźa wobchody wožiwić
Na rozdźělne zajimy reagować
Kubłanska koncepcija Ralbičanskeje pěstowarnje wobkrućena
Ralbicy (JK/SN). Po napjatym komunalnym dźěle kónc minjeneho lěta je so gmejnska rada Ralbicy-Róžant wčera wječor k prěnjemu lětušemu posedźenju zešła. Před lětom běchu kubłarjo a zastupjerjo Serbskeho šulskeho towarstwa, nošerja Ralbičanskeje pěstowarnje „Dr. Jurij Młynk“, kubłansku koncepciju dźěćaceho dnjoweho přebywanišća předstajili. Wčera nětko su delanscy radźićeljo koncepciju wobkrući. K tomu wobdźělichu so na posedźenju nawodnica pěstowarnje Jadwiga Nukowa, jeje naměstnik René Bětnar a zastupjerka Serbskeho šulskeho towarstwa Marlis Młynkowa. Woni kaž tež radźićeljo běchu sej přezjedni, zo je koncepcija zaměrej zarjadnišća přiměrjena a je so po jednym lěće jako dobry zakład kubłanja wopokazała. Gmejnska rada pak dojedna so po namjeće radźićela Tomaša Bjeńša (Swobodne wolerske zjednoćenstwo Delany) na to, koncepciju najpozdźišo po pjeć lětach znowa posudźować, je-li trjeba, tež hižo zašo.
Potajnstwo kule wuslědźene
We wobłuku wobšěrneho ponowjenja wěže Grodkowskeje radnicy běchu loni 8. oktobra tři kasety z kule na wjeršku wěže wzali. Nětko su je fachowsce wočinili.
Grodk (JoS/SN). Wulka napjatosć knježeše předwčerawšim na žurli Grodkowskeje radnicy. Hromadźe z nowinarjemi su tam kasety z kule radnicoweje wěže wočinili. Po lětach 1791, 1899 a 1987 wěžu radnicy tuchwilu štwórty raz w jeje stawiznach ponowjeja. Ručež bě wěža w oktobru zaróštowana, su wjeršk a z nim tež kulu z dokumentami dele wzali.
Kaž měšćanostka Christine Herntier (njestronjanka) rjekny, nichtó prawje njewě, što w kasetach je. Nowa kaseta pak bě hižo přihotowana. Do njeje po tradiciji wšitke stare a přidatnje nowe dokumenty tyknu. Přitomni drje tajki wokomik hišće raz njedožiwja.
Nawoda Delnjołužiskeho holanskeho muzeja Eckbert Kwast bě jako wěcywustojny přitomny. Po jeho słowach je radnica jedne z mało starodawnych twarjenjow Grodka, kotrež su hač do dźensnišeho zachowane.
Přihotuja šulu na digitalny čas
Chrósćicy (SN/MWj). Digitalny swět poněčim tež do Chróšćanskeje zakładneje šule „Jurij Chěžka“ zaćehnje. Tam tuchwilu datowu syć kładu, tak zo kóžda rjadowniska rumnosć wotpowědny přizamk dóstanje. Přichodny tydźeń maja dźěła wotzamknjene być. Wo tym informowaše wjesnjanosta Marko Kliman (CDU) na wčerawšim posedźenju Chróšćanskeje gmejnskeje rady. Dźěła wukonja samsne předewzaće, kotrež je tež hižo při přetwarje bywšeje srjedźneje šule na gmejnske a kulturne srjedźišćo datowu syć kładło. „Tak nastanje zmysłapołna infrastruktura, kotraž zwjazuje wjacezaměrowu halu, šulu a gmejnski a kulturny centrum“, Kliman rozłoži.
Koronapandemija je minjene měsacy wšudźe wšitko změniła. Ale na ...
Krótkopowěsće (22.01.21)
Ličbje zemrětych přiběrałoj
Budyšin. W Budyskim wokrjesu su wčera 56 dalšich natyknjenjow z koronu zwěsćili. Ličba smjertnych padow rozrosće wo sydom na cyłkownje 444. Wot 1 246 schorjenych (+19) lěkuja 120 (-20) w chorowni. Tudyša incidenca wučinja 279,66. Zhorjelski wokrjes wčera rozprawješe wo 98 infekcijach a wosom w zwisku z koronu zemrětych. Incidenca tam je 213,28.
Kritizuja komisiju EU
Berlin. Mjeńšinowa rada Němskeje namołwja zwjazkowe knježerstwo a sejm, so dale wo lěpši škit mjeńšin zasadźeć. To zdźěli wčera mjeńšinowy běrow w Berlinje. Zdobom kritizuje mjeńšinowa rada rozsud komisije EU, žane prawniske rjadowanja za lěpši škit mjeńšin njezawjesć. Je njezrozumliwe, zo Europska unija politiku zwjazanosće we wšěch wobłukach zwoprawdźa, jenož nastupajo mjeńšiny ju wuzamkuje.
Chcedźa podpěru cofnyć
W Prawočanskim pralěsu dale za šnórami ćahaja
Digitalny debit jolka-swjedźenja jako wuslědk wuspěšneho spjećowanja
Kajka to ironija: Runje zarjadowanje, za kotrež su organizatorojo w minjenych lětach z pokazku „tež lětsa bjez livestreama“ wabili, je so hladajo na ličbu wobdźělnikow z dotal najwuspěšnišim wirtuelnym serbskim swjedźenjom stało. Što tajkale pandemija tola wšitko zamóže ... Hewak so korona w programje 23. jolki pod hesłom „Korutanska – Z korejtu přez dolinu“ nimale njejewješe, wothladajo wot na tři ducenty štučkow wopřijacy spěw Luciana Kaulfürsta, kiž – zastupujo takrjec tradicionalny jolka-chór – ze swójskimi hrónčkami we wobłuku tak mjenowaneho warm-upa zwěsći, zo tuchwilu postajeny radius aktiwitow 15 kilometrow za Łužicu njedosaha.
Nic najrjeńši, ale najstarši
Archiwny zwjazk swój onlinowy poskitk rozšěrja
Budyšin (SN/MWj). Posledni kwartal lěta 2020 su w Budyskim archiwnym zwjazku za to wužiwali, zo bychu swój onlinowy poskitk dale rozšěrili. Tam nimaja jenož wopisma, zapiski stawnistwa, radne protokole, zapiski wo křćeńcach, wěrowanjach a zemrětych a wšelake chroniki. Wot najnowšeho je nětko tež register dawkow jednotliwych wosobow digitalnje přistupny, rěka w nowinskim wozjewjenju měšćanskeho zarjadnistwa.
Tak mjenowany wosobowy dawk bu w lěće 1766 zawjedźeny, 1835 stupi na jeho městno přemysłowy a personalny dawk, pozdźiši dochodowy dawk. W nětko zjawnje přistupnych hamtskich knihach su zapisani w měsće a přisłušacych wsach bydlacy kaž tež jich dawk, kotryž mějachu płaćić. Štóž so ze swójbnymi stawiznami zaběra, móhł rešeršować, hač a hdźe su předchadnicy w měsće abo na wsach bydlili. Knihi pak su tohorunja za najwšelakoriše domiznowědne a za socialno-historiske slědźenje wažne žórło. Wone mjenujcy podawaja dohlad do struktury a hospodarskeje mocy wobydlerstwa města Budyšina we 18. a 19. lětstotku.
Policija (21.01.21)
Wobšudnistwo při telefonje
Hodźij. Sobudźěłaćerka Hodźijskeje tankownje je so předwčerawšim z woporom wobšudnika stała. Při telefonje wudawaše so muska wosoba jako serwisowy sobudźěłaćer. Wón přistajenej kazaše, zo měła jemu čisła we wobchodźe tankownje na předań poskićenych dobropisnych kartow podać. To je wažne, tak muž při telefonje žonje dale napowěda, zo móhli sumy aktualizować. Po tychle instrukcijach so sobudźěłaćerka měješe a njeznatemu jednotliwe čisła telefonisce poda. Kaž Zhorjelska policajska direkcija zdźěli, nasta tankowni na te wašnje něhdźe 900 eurow škody. Budyska kriminalna słužba pad nětko přepytuje. Policija wuraznje před tym warnuje, čisła tajkich dobropisnych kartow cuzym přez telefon přeradźić.
