Kriminalita chětro rozdźělna
Zhorjelska policajska direkcija statistiku za lěto 2020 wozjewiła
Zhorjelc/Budyšin (SN/MWj). Z dokładnje 33 333 padami w lěće 2020 hiba so ličba kriminelnych deliktow we wobłuku Zhorjelskeje policajskeje direkcije dale na niwowje zašłych lět. Wot lěta 2014, jako registrowachu 41 000 padow, ličba wobstajnje woteběra. To wuchadźa ze statistiki lońšeho lěta za Budyski a Zhorjelski wokrjes, kotruž su tele dny wozjewili. Něhdźe dwě třećinje wšěch deliktow móžachu wujasnić. To je pjeć procentow wjace hač w sakskim přerězku, zdźěli policajski prezident Manfred Weißbach. Ćežišćo w najwuchodnišej policajskej direkciji Sakskeje bě wobsydstwowa kriminalita.
We woběmaj wokrjesomaj bě kriminalita loni znowa chětro rozdźělna. Byrnjež w Budyskim wokrjesu z 300 000 wobydlerjemi nimale 50 000 wjace bydliło, hač w Zhorjelskim, bě tu ličba zwěsćenych deliktow wjele mjeńša. Mjeztym zo bě jich w Budyskim wokrjesu 14 470 padow, zličichu w Zhorjelskim 18 863. Wotpowědnje rozdźělnje běchu wobydlerjo potrjecheni. Objektiwniša je ličba njeskutkow, přeličena na 100 000 wobydlerjow. Ta wučinješe w Budyskim wokrjesu 4 827, w Zhorjelskim pak 7 464.
Radźićeljo so schadźuja
Ralbicy. We wobłuku zarjadniskeho zwjazka Při Klóšterskej wodźe změja zajutřišim, štwórtk, hnydom tři gmejnske rady swoje posedźenje. We 18.30 hodź. schadźuja so radźićeljo Ralbic-Róžanta w Ralbičanskej sportowej hali. Na jich dnjowym porjedźe steji mjez druhim wobhospodarjenje wodźiznow druheho rjadu přez firmu Stowasser. Nimo toho chcedźa wutworić poradźowanski gremij za nakup komunalneje techniki.
Pančicy-Kukow. Poł hodźiny pozdźišo, w 19 hodź., započnje so posedźenje gmejnskeje rady Pančic-Kukowa, a to znowa na Wotrowskej starej šuli. Jedna z hłownych temow budźe dalše saněrowanje Pančičanskeje Šule Ćišinskeho. Za to chcedźa twarske nadawki w dohromady šěsć wšelakich losach rozdawać, mjez druhim za sanitarnu instalaciju, milinu a woclotwar.
Nadźijeja so kónca njewěstoty
Hižo štyri měsacy traje w Němskej druhi lockdown. Tak kaž je najwjetši dźěl zjawnych zarjadnišćow, muzejow, hosćencow atd. zawrjeny, tež kina žanych wopytowarjow witać njesmědźa.
Wojerecy (AK/SN). W čerwjenych kinowych křesłach móhł čłowjek jara přijomnje sedźeć. Štyri žurle su wulkomyslnje wuhotowane. Dohromady 550 ludźi ma městno we Wojerowskim kinje CineMotion. „Móhli kóždy čas startować, čakamy jeničce na jasny signal politiki. Nadźijamy so znowawotewrjenja w aprylu, skerje realistiska pak je meja“, měni Toni Züchner, kiž wot lěta 2017 Wojerowske kino nawjeduje. Za čas zawrjenja trjebaja wón a jeho wosmjo kruće přistajeni wulku wutrajnosć.
Byrnjež hišće bóle za dowolom w cuzych krajach žedźili, mnozy na ...
Krótkopowěsće (16.03.21)
Europeada znowa přestorčena
Flensburg. FUEN jako wuhotowar europeady je wčera zdźělił, zo su so wona a korutanscy hosćićeljo turněra dojednali, europske koparske mišterstwa awtochtonych narodnych mjeńšin koronapandemije dla hakle klětu w lěću přewjesć. Koronawirusa dla njemóža so koparske wubranki, tež serbska, na turněr přihotować. We wobłuku europeady njebychu předpisy hygieny zaručić móhli.
Dźěl šćěpjenjow přetorhnyli
Budyšin. Šćěpjenja pře koronu ze serumom AstraZeneca su tež w Budyskim a Zhorjelskim wokrjesu přetorhnyli. Sakska ma so po poručenju Paula Ehrlichoweho instituta, po tym zo buchu pady z trombozu mozow w zwisku ze šćěpjenjom znate. Budyski wokrjes zwěsći wčera sydom nowonatyknjenjow. Incidenca wučinješe 107,66, po RKI dźensa rano 102,7. Wokrjes Zhorjelc je wčera štyri infekcije přizjewił a incidencu 109,21. Ta bě po wobličenju RKI dźensa rano 96,9.
Jednokolijowosć haći
Poskićeja spěšnotesty
Kamjenc/Wojerecy. Strowotniski zarjad Budyskeho wokrjesa poskića nětko tež w Kamjencu (Garnizonowe naměsto 9) a we Wojerecach (Vis-à-vis, Hrodowske naměsto 2) darmotne spěšnotesty na koronu. W Kamjencu móža sej zajimcy terminy za jutře popołdnju a štwórtk dopołdnja skazać, we Wojerecach za srjedu cyły dźeń. Terminy rezerwować je na slědowacych stronach móžno: https://lkbz.de/testcenterbautzen (za terminy w Budyšinje, Tuchorska 23), https://lkbz.de/testcenterhoyerswerda (za terminy we Wojerecach) a https://lkbz.de/testcenterkamenz (za terminy w Kamjencu).
Wirtuelnje do muzeja
Kamjenc. Hišće hač do 11. apryla pokazuje Kamjenski Muzej zapadneje Łužicy wosebitu wustajeńcu wo kóncu lodoweje doby we Łužicy. Štwórtk, 18. měrca, w 19 hodź. poskića tam wirtuelne wodźenje po přehladce z kuratorku a archeologowku Jasmin Kaiser. Zajimcy njech přizjewja so najpozdźišo hodźinu do spočatka wodźenja pod .
Policija (15.03.21)
Kubłanišćo zdźěla zaso wotewrjene
Smochćicy (SN/MWj). Za wopytowarjow trochu šěršo wočinjene su nětko wrota Smochčanskeho kubłanišća swj. Bena. Tam móža wotpowědnje škitnym postajenjam korony dla zaso wšelake kursy přewjesć, rěka w nowinskej zdźělence. Mjez druhim su to kubłanja k přewinjenju pandemije, powołanske dalekubłanja, kotrež njehodźa so wotstorčić, kursy za wohnjowych wobornikow, wuchowanskich a katastrofowych pomocnikow, kursy za hladacych přiwuznych kaž tež dalekubłanja za sobudźěłaćerjow w strowotniskich fachowych powołanjach.
Za wšitke dalše kursy wostanje Smochčanske kubłanišćo najprjedy dale zawrjene. Wšitke swójske prezencne zarjadowanja su hač do kónca apryla wotprajene. Aktualne informacije wo poskićenych kursach a wo wuměnjenjach, kak hodźeli so wone přewjesć, nadeńdu zajimcy internetnje pod www.bildungsgut-schmochtitz.de.
Dosć pućow, mało pjenjez
Prioritna lisćina za wobnowjenje dróhow njezda so wulka pomoc być
Njeswačidło (JK/SN). Na posedźenju Njeswačanskeje gmejnskeje rady w februaru dóstachu jeje čłonojo domjacy nadawk, nastajić prioritnu lisćinu za wobnowjenje abo wuporjedźenje gmejnskich dróhow. Jako minjeny tydźeń wo to dźěše so za wěste projekty rozsudźić, zdaše so to wjac hač ćežke. W gmejnje je přewjele pućow, na kotrychž ma so něšto činić. Wot Małeho Holešowa přez Šešow hač do Dobrošic sahaja přeća, měć rjane a wěste dróhi.
Doskónčnje drje hišće ničo rozsudźene njeje, ale někotre naprawy hižo konkretnišu formu nabywaja. Tak je w Njeswačidle hasa při hladarni starych ludźi AdVita jedyn z kandidatow za ponowjenje. Dalšej móhłoj być dróha w Dobrošicach při wjesnym haće a potom hišće Młynski puć w Šešowje.
Klětu nastanje nowa gratownja
Při zdźěłanju hospodarskeho plana 2021 za město Kulow začuwaja tam nětko wuskutki koronapandemije. Přiwšěm maja přichodnje wulke twarske předewzaće planowane.
Kulow (AK/SN). Na zašłym posedźenju Kulowskeje měšćanskeje rady su jeje čłonojo lětuši hospodarski plan města jednohłósnje wobzamknyli. Předwidźane bě to hižo za kónc minjeneho lěta. Hakle spočatk 2021 pak wšitke trěbne ličby předležachu, komornik Thomas Woelke radźićelam zdźěli. Plan wopřijima dohromady 18,5 milionow eurow. Pod smužku steji deficit něhdźe 200 000 eurow. Sadźby ze ležownostny a přemysłowy dawk so njezměnja.
„W lětomaj 2020 a 2021 so wuskutki pandemije wotbłyšćuja“, rěka w rozprawje k hospodarskemu planej. Při přihotach na lěto 2020 běchu hišće z toho wuchadźeli, zo wobjim přemysłoweho dawka wobstajnje dale přiběra. Ale hižo w běhu lěta dyrbjachu zwěsćić, zo wón wo 35 procentow woteběra. Z wosebitymi připokazankami móžachu tři štwórćiny deficita wurunać.
