Policija (13.08.21)
Do rododendrona zajěła
Kamjenc. Na Pastwinej horje w Kamjencu budu rododendrony klětu snano trochu mjenje kćěć. Přičina je wobchadne njezbožo, kotrež je so tam předwčerawšim stało. Wodźerka Seata chcyše tam něhdźe w 17 hodź. po nahłym puću horje jěć. Najskerje pak bě při tym wopačny chód zapołožiła. Jeje jězdźidło na to wróćo jědźeše a hakle při jednym z wulkich rododendronow stejo wosta. 23lětnu šoferku Seata, kotraž so při tym snadnje zrani, móžachu na městnje lěkarsce zastarać. Jeje wosobowe awto pak dyrbjachu wotwlec. Na nim nasta něhdźe 2 000 eurow škody.
Poslednja składnosć
Budyšin. Hnydom dwě wustajeńcy w Muzeju Budyšin stej jenož hišće hač do njedźele, 15. awgusta, widźeć. Stej to kabinetna přehladka mólbow Ulriki Mětškoweje a wosebita wustajeńca z twórbami Almut-Sophije Zielonka składnostnje jeje 55. narodnin. Přichodna wosebita wustajeńca w Muzeju Budyšin wěnuje so wot 18. septembra kopororytwarjej a nakładnikej Johannej Georgej Schreiberej (1676–1750).
Wuměłcam přez ramjo hladać
Miłoćicy. Mjeztym hižo 15. mjezynarodna rězbarska dźěłarnička při Miłočanskej skale wotměje so wot 16. do 29. awgusta. W tym času móža zajimcy 15 wuměłcam z Čěskeje, Armenskeje, Awstriskeje, Bołharskeje, Pólskeje a Němskeje při dźěle přez ramjo hladać. Šulskim rjadownjam poskićeja hač do kónca oktobra połdrahodźinske darmotne wodźenja. Přizjewjenja su móžne pod www.steinleicht.de. Wosebitej wjerškaj budźetej sobotu, 28. awgusta, hudźbny wječor a nazajtra finisaža.
Zaso regularnje wotewrjenej
Namjetuja nowotwar horta
Z posedźenja Radworskeje gmejnskeje rady
Radwor (SN/MkWj). Dosć komplikowane a njespokojace połoženje pobrachowacych hortowych městnow w Radworju móhli z nowotwarom horta rozrisać. Tole je wuslědk wobšěrneho přepytowanja planowanskeho běrowa w nadawku gmejny, kotrež su předwčerawšim, srjedu, na posedźenju Radworskich gmejnskich radźićelow předstajili. Nowy hort móhł na šulskim dworje šule na městnje starych garažow nastać a něhdźe sto šulerjam městno skićić.
Wurjadne posedźenje schodow dla
Hdyž měšćanske a gmejnske rady wšelake komunalne rozsudy wotstorčić njemóža, dyrbja so radźićeljo wurjadnje schadźować. Tomu bě wčera w Budyšinje tak.
Budyšin (CS/SN). Ze 16 čłonami bě Budyska měšćanska rada wčera runje tak wobzamknjenjakmana. Najebać dowolowy čas běchu radźićeljo k wurjadnemu posedźenju zwołani, dokelž mějachu wo přidatnych wudawkach za saněrowanje schodow na sewjernym boku Hrodu wothłosować. Kaž zamołwići rozłožichu, ma twarska naprawa město planowanych 600 000 eurow nětko 875 000 eurow płaćić. Najwjetši dźěl přidatneje sumy pak je ze spěchowanskimi srědkami zawěsćeny, změrowaše wyši měšćanosta Alexander Ahrens (SPD). Město změje jeničce 6 700 eurow přidatnje zwjesć. Po słowach twarskeje měšćanostki Juliany Naumann pak je tež tale suma wěsta, a to z planowaneje twarskeje naprawy, kotruž přewjesć njemóža. Při tym jedna so wo twar chódnika na Drježdźanskej dróze mjez kupnicu Netto a starym Smoličanskim pućom. Tam njemóžachu trěbne płoniny kupić, tak zo je so město tohole projekta wzdało.
Sakski nutřkowny minister Roland Wöller a jeho braniborski kolega ...
Krótkopowěsće (13.08.21)
Žaruja wo Kurta Biedenkopfa
Drježdźany. Sakski ministerski prezident Michael Kretschmer (CDU) je Kurta Biedenkopfa jako wulku němsku wosobinu 20. lětstotka hódnoćił. „Jako ministerski prezident je wón wot lěta 1990 hač do 2002 zakłady wuspěšneho wuwića našeje domizny połožił“, rjekny Kretschmer w Drježdźanach. Biedenkopf bě wčera wječor w sakskej stolicy 91lětny po krótkej ćežkej chorosći zemrěł.
Incidenca snadnje stupa
Budyšin/Zhorjelc. Ličba na koronu schorjenych snadnje přiběra. Za Budyski wokrjes je RKI dźensa incidencu 5,7 podał, za Zhorjelski 6,3. We woběmaj wokrjesomaj zwěsćichu wčera štyri nowoinfekcije. Dohromady je we wokrjesomaj wot wčerawšeho 67 wosobow w karantenje. Wo dalšich smjertnych padach korony dla njeje we woběmaj ničo znate.
Hižo 220 lět hród wopytuja
Policija (12.08.21)
Z konopju po puću byłoj
Łuty. Kolesowu jězbu trochu hinašeho razu je policija předwčerawšim we Łutach skónčiła. Mužej w starobje 23 a 29 lět jědźeštaj tam po připołdnju z něhdźe dwaj metraj wysokej konopjowej rostlinu po měsće. Zastojnicy jeju zadźeržachu a rostlinu sćazachu. Mužej změjetaj so nětko přeńdźenja přećiwo zakonjej wo drogach dla zamołwić.
Tež při dešću filmy pokazuja
W starej wowčerni pokazaja kino
Boršć lětsa dwójnje narunaja
W Kamjencu změja měšćanski swjedźeń a zabawny park
Kamjenc (SN/MWj). Tradicionalna Kamjenska Boršć, kaž ju z časa do korony znajemy, njejsu hižo loni wotměć móhli. Tež lětsa dyrbi wona wupadnyć. Přiwšěm chcedźa Kamjenčanam a Kamjenčankam kaž tež wopytowarjam z wokoliny kónc awgusta zabawu skićić. Za to přewjedu tam wot 20. do 22. awgusta měšćanski swjedźeń, a wot 20. do 29. awgusta zarjaduja na terenje Boršće zabawny park.
We wobłuku měšćanskeho swjedźenja chcedźa na wjacorych městnach hudźbu najwšelakorišeho razu zaklinčeć dać, a to na torhošću před radnicu, na Šulskim naměsće, při Mjasowych jětkach, před słodarnju a na Pastwinej horje před tamnišej wěžu. Tam organizuja sobotu, 21. awgusta, wot 21.30 hodź. wulki wohnjostroj, kiž budźe zawěsće daloko widźeć. Zajimawostku změja wšitke tři dny na torhošću. Tam natwarja wulku LED-fotosćěnu, na kotrejž pokazaja potom impresije ze zašłych Kamjenskich Boršćow. Za to móža zajimcy hač do njedźele swójske wobrazy online zapodać.
