Instanca a křižnišćo zhromadnosće(3)
Na wsy wobchod měć dźensniši dźeń wjace samozrozumliwe njeje. We wobłuku lětušeho lětnjeho seriala smy so po wsach rozhladowali, zo bychmy swojim čitarjam tón abo tamny wjesny wobchod předstajili.
Krótkopowěsće (12.08.21)
Dalše spontane šćěpjenja móžne
Budyšin/Zhorjelc. Wokrjes Budyšin poskića přidatnej terminaj so spontanje pře koronu šćěpić dać, a to jutře w Budyskim Centeru na Žitnych wikach wot 9.30 do 16 hodź. a sobotu w samsnym času we Wojerowskim Łužiskim centeru. RKI podawa za Budyski wokrjes incidencu 5,3; pjeć infekcijow z wirusom su tu wčera zwěsćili. Tež w Zhorjelskim wokrjesu je jich pjeć; incidenca tam je po RKI 4,7.
Pjekarjow hižo njewukubłuja
Budyšin. Za wukubłanje na pjekarja w lěće 2021/2022 je so jenož wosom zajimcow přizjewiło. Tak njemóža wujednany kompromis mjez sakskim kultusowym ministerstwom a wokrjesom Budyšin zwoprawdźić. Kaž tam rěkaše, je 16 wučomnikow trěbnych, zo bychu na dalše tři lěta w Budyskim powołanskošulskim centrumje pjekarjow wukubłać móhli.
Čołm lisćinje herbstwa přidać
Nowe hašenske jězdźidło oficialnje přepodali
Pěskecy (aha/SN). Minjenu sobotu popołdnju njeběchu so jenož Pěskečenjo na puć ke gratowni wohnjoweje wobory nastajili. Zastupowacy nawoda 26 kameradow wopřijaceje Pěskečanskeje dobrowólneje wohnjoweje wobory Krystof Sćapan kaž tež zastupowacy nawoda Njebjelčanskeje gmejnskeje wobory Tomaš Šwejda móžeštaj tež kameradow wokolnych woborow witać. Jim wšěm předstajichu tam nowe moderne wohnjowoborne awto typa Iveco Magirus. Wobhladali su sej je tohorunja zastupowacy krajny rada Wincenc Baberška (CDU), wokrjesny hašenski mišter Stefan Henčka, jeho předchadnik Helmut Libš, předsyda zarjadniskeho zwjazka Měrko Domaška kaž tež Njebjelčanski wjesnjanosta Tomaš Čornak (CDU).
Policija (11.08.21)
Pomnik pomórali
Bart. Předwčerawšim rano dyrbjachu w Barće zwěsćić, zo běchu njeznaći informacisku taflu a fasadu historiskeho bazaltoweho zawoda pomórali. Bywši zawod je dźensa techniski pomnik, kiž je na dnju wotewrjeneho pomnika zajimcam přistupny. Skućićeljo namórachu tam wšelake ličby a pismiki. Škoda wučinja dohromady něhdźe 500 eurow. Policija pyta swědkow, kotřiž su snano něšto wobkedźbowali.
Do pochowanskeho lěsa
Wótre zynki při měšćanskim haće
Klětu zaso hudźba při jězorje
Gmejnska rada Hamora wužiwanskemu zrěčenju za festiwalej přihłosowała
Hamor (CK/SN). Při Bjerwałdskim jězoru maja w lěće 2022 zaso horce rytmy zaklinčeć. 11. junija ma so na Hamorskim pobrjohu festiwal Holi-openair wotměć. Wot 4. do 7. awgusta přewjedu dalše zarjadowanje pod hołym njebjom pod hesłom „Break the Rules“ na Klětnjanskim přibrjohu. Za wobě je Hamorska gmejnska rada předwčerawšim wužiwanske zrěčenje ze zarjadowarjom GBG z Niskeje wotzamknyła.
Wobaj podawkaj běštej 2020 korony dla wupadnyłoj. Tež lětsa dyrbjachu jej pandemije dla wotprajić. Při tym běchu w předpředani hižo wjele lisćikow předali, praji jednaćel GBG Toni Heide. Jemu je to znamjo, „zo ludźo tajke zarjadowanja chcedźa“. Festiwal Holi budźe maksimalnje 5 000 ludźi wopytać móc. „Z ličbu smy dobre nazhonjenja zběrali, a chcemy při njej wostać“, wón měnješe.
Tež na pjecy nětko rapak sedźi
Čorny Chołmc (SiR/SN). Najnowši dźěl twarskeho ansambla Čornochołmčanskeho Krabatoweho młyna je nimale hotowy. Za něhdźe 190 000 eurow nasta tam minjene měsacy dom z pjecu. W nim chcedźa předewšěm dźěćace a młodźinske projekty přewjesć a małym kaž tež wjetšim zajimcam pokazać, kak ze zorna chlěb nastawa.
We wobłuku małeho swjedźenja su tele dny pěc prěni raz zapyrili a so wo tym přeswědčili, zo wona funguje. Nimo toho su tón dźeń dalšeho, 13. rapaka na třěše pječenskeho domu připrawili. Zhotowił bě jeho hornčerski mišter Andreas Hegewald. Wudawki něhdźe 500 eurow přewza pjekarski mišter Michael Buchta. Wojerowčan je zwoprawdźenje projekta ze swojej wědu a angažementom přewodźał. Tež na třěchach tamnych domow rapaki wuhladaš.
