Čorna Pumpa (JOS/SN). Wjele ludźi je minjeny kónc tydźenja nalětnje wiki w Čornej Pumpje wopytało. Kołowokoło železniskeho wagona, na tak mjeno­wanym „Nastupnišću 19“, poskićowaše něhdźe 80 wikowarjow a rjemjeslnikow swoje wudźěłki a posłužby. Kobjeler a pčo­łar běštaj runje tak zastupjenaj kaž kwětki, ratarske wudźěłki a samodźěłany palenc. Skrótka prajene bě móhłrjec wšitko na městnje, štož na prawe nalětnje wiki słuša. Wopytowarjow witaše Hans-Jochen Hoffmann, kiž bě 1990 prěni wjesnjanosta gmejny Čorna Pumpa po towaršnostnym přewróće.

Běchu to mjeztym štwórte wiki tajkeho razu, kotrež je towarstwo „Nastup­nišćo 19“ ze swojim hibićiwym předsydu Holgerom Schwarzom organizowało. Zapo­čeli su 2018 z něhdźe 30 wikowarjemi. Nětko bě jich nimale trójce telko. Zmóžnili su to z tym, zo su teren wokoło že­lezniskeho wagona w minjenymaj lětomaj powjetšili. Kónc tydźenja je so wo­pokazało, zo je so próca zadaniła. To podšmórnychu tohorunja wikowarjo a rje­mjeslnicy, kotřiž so zdobom wjeselachu, zo mějachu zaso składnosć swoje wudźěłki poskićować a předawać móc.

Njebjelčicy. Saněrowanje nadróžneho wobswětlenja w Njebjelčanskej gmejnje budźe jedna z temow přichodneho po­sedźenja gmejnskeje rady zajutřišim, štwórtk, w 19.30 hodź. w gmejnskim zarjedźe. Dale porěča radźićeljo wo dróho­twarskich planach w Pěskecach.

Worklecy. Z naćiskom hospodarskeho plana 2022 a z lětušimi projektami zaběra so Worklečanska gmejnska rada tohorunja zajutřišim w 19.30 hodź. w šulskej jědźerni. Nimo toho chcedźa nadawk za rje­dźenje šule rozdać.

Pječwo k róčnym časam

Budyšin. Pječwa k róčnym časam steja w srjedźišću přichodneho „Kofeja w třoch“, na kotryž přeprošuje Budyski Serbski muzej jutře, srjedu, w 15 hodź. Što ma plećena całta ze zelenym štwórtkom činić a kotra symbolika so za njej chowa? W běhu lěta mamy tójšto pječwow, kiž su na krute terminy wjazane. Něšto wšak maja wšitke zhromadnje – wone so na kóncu zjědźa. Wo tym a dalšim přednošuje kuratorka Andrea Pawlikowa a pječwa tohorunja k woptawanju poskića. Dokelž­ su městna wobmjezowane njech so zajimcy přizjewja pod telefonowym čisłom 03591 2708700 abo e-mailnje pod .

Trabi najspěšniši był

Wojerecy. Poł hodźiny je policija předwčerawšim na Drježdźanskej dróze we Wojerecach, hdźež je 50 km/h dowolenych, spěšnosć měriła. Wot 45 měrjenych jězdźidłow bě 14 přespěšnych. Wosom šoferow woteńdźe z warnowanjom, na šesćoch čaka pokuta. Najspěšniše awto bě Trabant. Jeho 43lětny wodźer překroči dowolenu spěšnosć wo 27 km/h. Za to dyrbi z dypkom w Flensburgu a pokutu we wysokosći 180 eurow ličić.

Modernizowanje Delnjohórčanskeje sportownje wotzamknjene

Delnja Hórka (UM/SN). Dypkownje kónc měrca su w Delnjej Hórce w Malešanskej gmejnje wobšěrne twarske dźěła na tamnišej sportowni a z njej zwjazanym sportowym domom wotzamknyli. Najwažniši dźěl dźěłow bě ponowjenje třěchi. Při sylnych zliwkach přez nju woda do twarjenja kapaše, rozłoži wjesnjanosta Mat­thias Seidel (CDU). To pak njebě jenička přičina, so do spěcha měć. Tež přirodoškita dla dyrbjachu hač do kónca měrca wšitko dodźěłane měć, dokelž su sej njetopyrje sportowy dom a sportownju jako domicil wupytali. To je k časowemu zastatkej wjedło. Dokelž dósta gmejna spěchowanske srědki hižo w lěće 2020 při­zwolene, pod wuměnjenjom popu­laciju njetopyrjow přepytować a na nje reagować, je časowy zastatk nastał. Tuž njejsu jeno třěchu a lijawy ponowili, ale tež hnězdźenske móžnosće za njetopyrje připrawili.