Jubilarojo, nowačkojo a dalše
Takle pojěchaja lětsa křižerjo w dźewjeć serbskich procesionach
Po wšěm zdaću dožiwimy lětuše jutry tak, kaž běchmy to do pandemije zwučeni. A najskerje změjemy tež zaso wjace křižerjow hač loni. To znajmjeńša zdźělichu nam kantorojo a nawodźa procesionow, pola kotrychž smy so za nowosćemi naprašowali.
Chróšćanski procesion njebudźe cyle tak dołhi kaž do pandemije w lěće 2019 ale na kóždy pad dlěši hač loni, rjekny nawoda procesiona Pětr Ćemjer. Mjez Chróšćanskimi křižerjemi budu štyrjo ze slěbornym wěnčkom. Dale změja wjace hač dźesać nowačkow. Abatisa klóštra Marijineje hwězdy Gabriela Hesse chce procesion witać a postrowić. Chróšćanscy křižerjo jěchaja lětsa 125. raz přez Zejicy do Pančic-Kukowa. Tohodla witaja jich před křižowanišćom z chorhojomaj a taflu, kotraž na jubilej skedźbnja.
Wobydlerjo wothłosuja
Wojerecy. W měsće a měšćanskich dźělach Wojerec móža wobydlerki a wobydlerjo wot minjeneje wutory wo lětušim wobydlerskim etaće wothłosować. Kóždy ma tři hłosy, kiž móže swobodnje na zapodate namjety rozdźělić. Dohromady je 137 namjetow dóšło. Ludźo přeja sej na přikład ponowjenje hrajkanišćow a chódnikow, nastajenje ławkow a sadźenje štomow. W Němcach je jedyn z namjetow, zo měli statoki srjedź wsy tafle z mjenami něhdyšich wobsedźerjow dóstać.
Ze swójbu do parka
Wochozy. Na swój tradicionalny swójbny dźeń přeprošuje jutrownu póndźelu Wochožanski park błudźenkow. Na wopytowarjow čaka wot 11 hodź. hudźbny program. Wot 13.30 hodź. zahraje Orchester łužiska brunica. Swójby budu cyły dźeń z konjacym zapřahom po parku jězdźić móc. Jutrowny zajac chce rano zahe swoje překwapjenki schować, za kotrymiž móža dźěći w běhu dnja pytać.
Policija (14.04.22)
W zahrodowych domčkach pobyli
Ćisk. Zahrodkownišćo bě cil paduchow předwčerawšim w Ćisku. Tam zadobychu so do pjeć zahrodowych domčkow a do dalšich pódlanskich přitwarkow. Z nich pokradnychu najwšelakoriši grat, mjez druhim akušrubowak a piłu. Hódnotu rubizny trochuje policija na 1 500 eurow. Nimo toho načinichu skućićeljo 800 eurow wěcneje škody.
Na štwórć lětstotka zhladowali
Ćisk (JT/SN). Ze swjatočnej sobustawskej zhromadźiznu je Ćišćanske kulturne towarstwo njedawno swoje 25lětne wobstaće woswjećiło. Předsydka Tina Schubert dopominaše z prezentaciju na najwažniše etapy wuwića towarstwa. Wona bě nawodnistwo 2019 wot Hansa Groby přewzała. Wón steješe wot 2008 jědnaće lět na čole towarstwa.
Jedne z najwjetšich wužadanjow bě wot 2006 do 2007 štyristronski dwór na domicil za towarstwo a na kulturnu městnosć za cyłu wjes pod mjenom Ćišćanski statok přetwarić. Tón je so w přichodnych lětach stał z dobrej adresu za nalětnje a dworowe swjedźenje, dźiwadłowe předstajenja a tematiske wječory wo serbskich jutrach a kermuši. Tež kulturne zarjadowanja kaž „Ćišćanske wotewrjene wokno“ a adwentne wiki tule přewjeduja. W drjewowej pjecy wjacore razy wob lěto chlěb a tykanc pjeku. Při tym začuwaja wopytowarjo rustikalny raz statoka a dožiwja tu serbske nałožki.
Předsyda VIVET-załožby Jens Zschorlich (2. wotlěwa) přepoda ...
Štyrjo wokrućeni
Zhorjelc (SN/JaW). Runja wokrjesej Budyšinej nastupja tež w Zhorjelskim wokrjesu štyrjo kandidaća k wólbam krajneho rady 12. junija. Jich je tamniši wokrjesny wólbny wuběrk wčera popołdnju wobkrućił, rěka w zdźělence gremija. Wo naslědnistwo dotalneho krajneho rady Bernda Langi (CDU) prócuja so tuž Sebastian Wippel ze Zhorjelca za Alternatiwu za Němsku, dr. Stephan Meyer z Wódrjeńcy (Oderwitz, CDU), Kristin Schütz ze Zhorjelca na namjet FDP a Sylvio Arndt z Kwětanec (Quitzdorf) jako jednotliwc.
Tež konje přihotuja so na jutry
Krótkopowěsće (14.04.22)
Hra „Šěrcec Hanka“ wuspěšna
Budyšin. Poslednje předstajenje inscenacije „Šěrcec Hanka“ je so wčera wotměło. W sydom předstajenjach je sej wot 12. februara dohromady 1 614 ludźi na hłownym jewišću NSLDź dźiwadłowu hru wobhladało. To je nowy rekord ličby wopytowarjow za serbskorěčnu inscenaciju hladajo na předstajenja minjenych lět. W nowej hrajnej dobje je inscenacija pod titulom „Schierzens Hanka“ za němskorěčne hłowne jewišćo zaplanowana.
Incidenca lochce stupała
Budyšin/Zhorjelc. W hornjołužiskimaj wokrjesomaj je incidenca lochce stupała. Po Roberta Kochowym instituće je wona dźensa w Budyskim wokrjesu 823,5; zwěsćili su wčera 762 natyknjenjow a štyri dalše smjertne pady. Za Zhorjelski wokrjes podawa RKI incidencnu hódnotu 658,9, 418 nowych infekcijow a štyri smjertne pady w zwisku z koronu.
Jadrowa milina a čěska politika
Strukturna změna šansa za gmejnu
Wot lěta 2015 je Achim Junker wjesnjanosta Hamorskeje gmejny – čas za bilancu
Hamor w Hornjej Łužicy je z 217 kwadratnymi kilometrami a z 18 wjesnymi dźělemi po płoninje najwjetša gmejna Sakskeje. Jeje wonkowny wobraz postajeja dźensa brunicowej jamje Wochozy a Rychwałd kaž tež Hamorska milinarnja, ale tež serbske stawizny. Wo hospodarskim spěchowanju, strukturnej změnje a wo dwurěčnosći je so Andreas Kirschke rozmołwjał z Achimom Junkerom (CDU), kiž je wot 2015 wjesnjanosta.
Knježe Junkero, 12. junija budu wólby wjesnjanosty. Nastupiće znowa?
A. Junker: Ně, ja hižo njekandiduju.
Čehodla nic?
A. Junker: To ma wosobinske, swójbne a strowotniske přičiny. Rozsud sym tež ze swojej swójbu wothłosował. Na kóncu swojeho hamtskeho časa budu 62 lět. Přichodny wjesnjanosta trjeba wjele energije, předewšěm za strukturnu změnu, hospodarske spěchowanje a turizm. Za to budźe čerstwy wětřik trěbny. Dwaj kandidataj za zastojnstwo wjesnjanosty hižo staj.
Jako sće 2015 nastupił bě waše hesło: „Bliskosć k wobydlerjam pokazać“. Poradźi so to?
