Poswjeća rejwansku lipu
Njebjelčicy. Swjedźeń k sadźenju rejwanskeje lipy wotměje so jutře, sobotu, w 15 hodź. na swjedźenskej łuce w Njebjelčicach. Na wopytowarjow čaka kulturny program. Wo ćělne derjeměće budźe postarane. Zarjadowarjo su młodźinske kluby gmejny, domizniske a kulturne towarstwo kaž tež towarstwje Kamjenjak a Serbska reja.
Koncert z kwartetom OPUS 4
Budyšin. Renoměrowany pozawnowy kwartet OPUS 4 orchestra Lipšćanskeje sukelnicy wuhotuje póndźelu, 8. nowembra, w 19.30 hodź., koncert w Budyskej tachantskej cyrkwi. Nawod změje Jörg Richter, wjelelětny 1. pozawnist mjenowaneho hudźbneho ćělesa. Wobšěrny repertoire wopřija dujersku hudźbu pjeć lětstotkow. Mjez druhim zaklinča twórby Claudija Monteverdija a Antona Brucknera. Koncert wotměje so w rjedźe „UNPLUGGED w Budyšinje“. Zarjadowar je Budyski Ekumeniski tachantski wobchod, Rotary klub Bautzen/Budyšin jón prezentuje. Zastup je darmotny. Při durjach budźe zběrka.
Płuwarnju njezjawnje wobjednali
Kamjenc (BG/SN). Ma so w Kamjenskej měšćanskej radźe wo přichodźe płuwanskeje hale zjawnje rěčeć abo nic? Tele prašenje steješe předwčerawšim hnydom na spočatku posedźenja radźićelow. Za to su zjawne posedźenje přetorhnyli a wopytowarjow něhdźe poł hodźiny čakać dali. Wuslědk skónčnje bě, zo chcedźa zjawnosć hakle pozdźišo do diskusije zapřijeć. Runje to nawopačne bě sej do toho radźićel Lěwicy Alex Theile žadał.
Dale rozsudźichu radźićeljo wo wužiwanju komunalneje pawšale Swobodneho stata Sakskeje k skrućenju wjesneje kónčiny za lěto 2021 we wobjimje 140 000 eurow. Po woli radźićelow chcedźa ju nałožić za najwšelakoriše dźěła w jednej z měšćanskich pěstowarnjow kaž tež w třoch zakładnych šulach w Brězni, Při Boršći a w Schönteichenje.
Mjez dochadźanymi darami, kotrež dyrbi měšćanska rada po zakonju schwalić, bě tež tón zapósłanca Sakskeho krajneho sejma Alojsa Mikławška (CDU). Wón podpěruje 135. róčnicu dobrowólneje wobory w Běłej (Biehla).
Fundus drasty rozšěrja
Gmejnska rada so na wužiwanje „serbskich pjenjez“ dojednała
Wotrow (SN/MWj). Hnydom na wjacorych městnach móhła gmejna Pančicy-Kukow wužiwać pjenjezy, kotrež dóstanu komuny w dwurěčnym sydlenskim rumje Sakskeje za spěchowanje serbskosće na swojim teritoriju. To wuchadźa z informacije wjesnjanosty Markusa Kreuza (CDU) na wčerawšim posedźenju gmejnskeje rady we Wotrowje.
Spočatnje běchu na to myslili, podpěrać z wonymi 5 000 eurami techniske wuhotowanje noweho nastawaceho Muzeja Ćišinskeho w Pančičansko-Kukowskim šulskim twarjenju. Tón budźe po słowach Kreuza jara moderny muzej z wjele techniku. Dalši namjet dochadźa z nawodnistwa Šule Ćišinskeho. Kubłanišćo by mjenujcy rady swój fundus serbskeje narodneje drasty napjelniło a wudospołniło. Tež nowe wabjenske chorhoje gmejny za wšelake zarjadowanja klóštra Marijineje hwězdy bychu jedyn namjet byli. Tuž běchu radźićeljo wčera prašani, kak srědki najlěpje wužiwać.
Biblioteka z nowej techniku
Wojerecy (SN/MWj). Wupožčowanje knihow, časopisow a dalšich medijow we Wojerowskej měšćanskej bibliotece Brigitty Reimann je wotnětka takrjec tež w samoposłužowanju móžne. Za to steji tam nowa technika k dispoziciji, kotruž su minjene dny natwarili a instalowali. W zašłych tydźenjach su wšón wobstatk biblioteki z něhdźe 70 000 medijowymi jednotkami na tak mjenowanu technologiju RFID (Radio Frequency Identifikation) přestajili. Wona zmóžnja čitanje a składowanje datow z pomocu škričkowanskeho signala. Za samostatne wupožčowanje literatury maja při zachodźe wotpowědnu technisku připrawu.
Wupožčowanje wotměje so podobnje kaž dotal, je pak so wo tójšto pospěšiło. Nětko je móžno hač do pjeć medijow naraz na blido połožić, kotrež so wot techniki tež naraz zapisaja. Z nastrojom pak njemóža sej wužiwarjo jenož knihi a časopisy wupožčić abo wróćić, ale móža tež swój wosobinski wužiwanski konto wobdźěłać a wupožčene medije na přikład podlěšić. Do nastroja integrowanej stej ćišćak za kwitowanki a čitanski nastroj za wužiwanske karty.
Znamješko na wopačnym městnje
Bóšičanska gmejnska rada je so srjedu wospjet ze zwěsćenjom zakónčenja lěta 2013 zaběrała. Tež hdyž je to na prěni pohlad njewšědne: tuchwilu so w Budyskim wokrjesu mnohe gmejny za tele lěto pruwuja a dalše klětu slěduja.
Hižo dobre lěto ma Budyska Strowotnja studnja z hrajkanišćom ...
Krótkopowěsće (05.11.21)
Incidenca dale raznje přiběra
Budyšin/Zhorjelc. Incidenca we wokrjesomaj Budyšin a Zhorjelc dale raznje přiběra. Za Budyski zdźěli RKI dźensa ze 487,2 plus 60,3. W Zhorjelskim je incidenca wo 125,3 na 501,7 postupiła. Hač do wčerawšeho zličichu w Budyskim wokrjesu 327 nowych infekcijow, 87 ludźi stacionarnje hladaja. Wokrjes Zhorjelc zdźěli wčera 473 nowych infekcijow, 98 ludźi tam w chorownjach zastaruja.
Dóstanjetaj wysoke počesćenje
Budyšin/Berlin. Serba Bjarnat Cyža a Saterskeho Frizu Karla-Petera Schramma počesća za wjelelětny angažement za narodne mjeńšiny ze Zwjazkowym zasłužbowym křižom Němskeje. To zdźěli dźensa Mjeńšinowy sekretariat w Berlinje. Počesćenje chce jimaj zwjazkowy minister za nutřkowne naležnosće Horst Seehofer (CSU) přichodny tydźeń přepodać.
Nowy album skupiny Abba
Policija (04.11.21)
Z alkoholom njezbožo zawinował
Kamjenej. Zaso raz bě čert alkohol sobu wina na wobchadnym njezbožu, kotrež je so předwčerawšim blisko Kamjeneje pola Radworja stało. 61lětny wodźer Opela bě na wokrjesnej dróze do směra na Wulku Dubrawu po puću, jako na prawy bok jězdnje zajědźe a hakle po 500 metrach zasta. Na awće a na wobchadnym znamjenju nasta 5 500 eurow škody. Při wobdźěłanju njezboža policisća pytnychu, zo bě muž alkohol pił a naměrichu pola njeho 1,56 promilow. Jězbna dowolnosć muža bě tuž fuk.
Wjele wědy wo lěsu sposrědkowali
Dubrawa (JoS/SN). Na štwórtu lěsnu ekskursiju je tele dny Grodkowski lěsnistwowy zawod do lěsa podłu Sprjewineho kolesowanskeho puća pola Dubrawy (Trattendorf) blisko Grodka přeprosył. Tójšto zajimcow ma tónle termin hižo dołho zapisany, wšako móžeš tež po oficialnym zarjadowanju z lěsnistwowymi fachowcami hišće wjele zajimaweho zhonić a sej z druhimi wo tym abo tamnym wuměnjeć.
Rewěrowaj hajnikaj Sylvio Raschick a Peter Noack wobdźělnikow z nowymi dopóznaćemi kołowokoło wobhospodarjenja lěsa zeznajomištaj. Něštožkuli při tym scyła tak jednore njeje. Tak su nowe próstwy wo spěchowanske srědki hač do 19 stronow wobšěrne. Samo fachowcy maja z nimi problemy. Tohodla wobsedźerjam lěsa w tym zwisku pomoc poskićeja. Dale zaběrachu so podłu Sprjewineho kolesowanskeho puća z prašenjemi zalěsnjenja z měšanym lěsom a ze zaručenjom wobchadneje wěstoty. To drje je winowatosć kóždeho wobsedźerja lěsa. Woni pak móža tež spěchowanje dóstać, hdyž na přikład wěste mnóstwo sucheho drjewa pušća.
Adwentnička wotprajena
Šunow. Adwentnička za wuměnkarjow gmejny Ralbicy-Róžant, kotraž so hižo wjele lět w Šunowskej Fabrikskej hospodźe wotměwa, tež lětsa płaćiwych koronapostajenjow za zarjadowanja dla njepřewjedu. Tole zdźěli wjesnjanosta Hubertus Ryćer (CDU) w najnowšim wudaću gmejnskeje nowiny. Wón prosy potrjechenych wo zrozumjenje. „Nadźijamy so, zo móžemy klětu zaso na zwučene wašnje hromadźe swjećić“, rěka we wozjewjenju dale.
Renft hraje w dźiwadle
Kamjenc. Legendarna kapała Renft koncertuje sobotu, 6. nowembra, w Kamjenskim měšćanskim dźiwadle na Połčničanskej dróze. Koncert započnje so w 19.30 hodź., zastup je wot 19 hodź. Po tym zo je šěsć něhdyšich čłonow kapały zemrěło a dalšej strowotnych přičin dla hižo hrać njemóžetaj, je Thomas „Monster“ Schoppe posledni z bywšeje originalneje wobsadki. Renft bě za čas NDR jedna z prěnich beatowych skupinow, kotraž je němsce spěwała. Swojich kritiskich spěwow dla bu skupina 1975 zakazana.
Smyčkarjo w kubłanišću
