Z plakatami wabja za zhromadnosć w měsće
Wojerecy (SN/MWj). Z wosebitej akciju reaguje město Wojerecy na tuchwilne njeměry w městach a gmejnach korona-pandemije dla. Dźensa popołdnju připrawichu na sydom městnach wulke plakaty, z kotrymiž wabja za zhromadnosć, za akceptancu rozdźělnych měnjenjow kaž tež za tolerancu a čłowjeskosć. Prěni plakat stajichu wyši měšćanosta Torsten Ruban-Zeh (SPD) a zastupjerjo měšćanskeho zawoda Zookultur, iniciatiwy za ciwilnu kuražu a regionalneho běrowa za demokratiju při Łužiskej kupjeli.
Přidatne městno njetrjebaja
Gmejnska rada Dźěwina změnjene wohnjowoborne wustawki wobzamkła
Dźěwin (AK/SN). Swoje wohnjowoborne wustawki a wustawki wo wotškódnjenju čłonow dobrowólneje wohnjoweje wobory je Dźěwinska gmejna předźěłała. Čłonojo gmejnskeje rady su woboje wčera na swojim posedźenju jednohłósnje wobzamknyli. Woboje wustawki płaća wot 1. januara 2022.
„Pozadk bě, zo chcychmy gmejnje přidatne městno zalutować. Mamy jenož dwě wsy, mjenujcy Dźěwin a Brězowku. W tajkim padźe njeje zmysłapołne měć přidatneho nawodu gmejnskeje wohnjoweje wobory“, rozłoži Olaf Hanusch, nawoda Brězowskich wohnjowych wobornikow. We wustawkach je nětko zapisane, zo móže nawoda wjesneje wobory zdobom nawoda gmejnskeje wobory być. Tež prawnisce je to w porjadku, dokelž nihdźe žane hinaše rjadowanje zapisane njeje.
Nowe lěto je runje hakle tydźeń stare, to w někotrych ...
W nuznych padach docpějomne
Dokelž koronapandemija wšudźe swoje slědy zawostaja, njemóža so tež zjawne zarjady tomu wobarać a su za zjawnosć dale zawrjene. W nuznych padach pak poskićeja terminowe portale abo telefoniske přizjewjenje.
Budyšin (SN/BŠe). Zarjady w Budyskim wokrjesu wostanu za wopytowarjow najprjedy raz dale zawrjene. Wjele sobudźěłaćerjow je w strowotniskim zarjedźe zasadźenych. Počasa dla je tež chorobny staw personala wyši hač hewak. To pak njewoznamjenja, zo zarjady scyła žane posłužby njeposkićeja. Kaž wokrjesne zarjady informuja, njemóža je jenož po zwučenym wašnju poskićeć. Štóž ma nuznje někajku zarjadnisku naležnosć zrjadować, móže sej termin skazać. Wotpowědne portale za wobydlerjow wokrjesa su za wšitkich w interneće přistupne. Na wotpowědnym terminje maja wopytowarjo prawidło 3G – šćěpjeny, wustrowjeny abo na koronu negatiwnje testowany – dodźeržeć. Kontaktne daty wopytowarjow potom sobudźěłaćerjo zarjadow přiwozmu.
Krótkopowěsće (07.01.22)
Jasnje pod přerězkom Němskeje
Budyšin/Zhorjelc. Poměrnje krute postajenja hygieny w Sakskej so po wšěm zdaću pozitiwnje na pandemiske połoženje wuskutkuja. Hinak hač předewšěm na sewjeru Němskeje, hdźež bliža so incidency štyriměstnowym ličbam, stej hódnoće we wokrjesomaj Budyšin a Zhorjelc na 283,2 resp. 245,1 spadnyłoj. Dohromady zličichu w nimaj 221 nowych infekcijow z koronawirusom a jědnaće dalšich smjertnych padow.
Nowy kantor zrěčenje podpisał
Drježdźany. Nowy kantor Drježdźanskeho Křižneho chóra Martin Lehmann je wčera słužbne zrěčenje podpisał. W septembrje nastupi wón zastojnstwo, z čimž stanje so z 29. nawodnikom swětosławneho ćělesa. Wotnětka chce so 48lětny we wobłuku „přihotowanskeho dojednanja intensiwnje na swoje nadawki přihotować“.
Pomhaja bjezdomnym
Policija (06.01.22)
Rentnarce tobołku pokradnyli
Łaz. 78lětna žona je so předwčerawšim z woporom paduchow stała. Wona bě w kupnicy nakupować a je swoju tobołku w nakupowanskim wozyčku po wšěm zdaću wokomik z wočow zhubiła. Tón wšak skućićeljo wužichu a tobołku spakosćichu. W njej běchu nimo wosobinskich wěcow móšeń ze sto eurami a dokumenty rentnarki. Sobudźěłaćerka kupnicy informowaše policiju, kotraž je so wo wšo dalše starała.
Kołp znjezbožił
Běła Woda. Z njewšědnym padom je so wobydler předwčerawšim pola Běłowodźanskeje policije přizjewił. Wón rozprawješe wo znjezboženym kołpju při bywšej cyhelerni. Wulki ptak bě tam někak njezbožownje přizemił a so w płoće zapopadnył. Zastojnicy jeho wuhladachu a informowachu Běłowodźanski zwěrjenc. Tamniši sobudźěłaćerjo so wo kołpja starachu a jeho samsny dźeń zaso na swobodu pušćichu.
Lětuši jubilej chcedźa wulce swjećić
Kolesa a druhe wěcy namakali
Wojerecy. Na wšěch šěsć kolesow su w decembru na teritoriju města Wojerec namakali w namakanskim běrowje měšćanskeho zarjadnistwa wotedali. Kaž z nowinskeje zdźělenki města wuchadźa, jedna so wo štyri žonjace kolesa, jedyn mountainbike a jedne mužace koleso. Nimo toho nańdźechu wobydlerjo ćmowy nachribjetnik z črijemi, wšelake kluče, mjez druhim awtowe, słónčne nawoči a rukajcy. Po poł lěće móža namakane wěcy přesadźować, hač na kluče.
Wopak parkowali
Wojerecy. Něhdźe 2 000 ludźi je we Wojerecach loni wopak parkowało. To je městu něhdźe 31 000 eurow dochodow wobradźiło. W lěće do toho bě to něhdźe 2 000 eurow mjenje.
Dyrbja puće zjawne być?
Přesydlenje Zahorja gmejnsku radu přeco hišće zaběra
Trjebin (CK/SN). Syć dróhow w Trjebinskej gmejnje so powjetši, znajmjeńša formelnje. Přetož dróhi a puće na přesydlenskim městnje Za goru (Hinterberg) hižo maja, wone pak njejsu dotal jako wjesne puće zjawnje wěnowane – wuměnjenje to, zo móže je kóždy wobydler wužiwać. Hižo wot lěta 2020 tele jednanje traje, a poprawom měješe wone z wobzamknjenjom gmejnskeje rady w decembru 2021 zakónčene być. Na namjet wjesnjanosty Waldemara Locki (CDU) pak so techniski wuběrk gmejny w januaru wospjet z naležnosću zaběra.
Nuznik njewšědneho razu
Minakałski barokny hród je jeho wobsedźer w lětdźesatkach po politiskim přewróće wobšěrnje saněrował. W bywšim konjencu bě sej wón wosebitosć wumyslił.
Minakał (UM/SN). Na nuznik hić tam, hdźež su so tež hižo konje wuznamnych wosobinow wolóželi, móžeš nětko při Minakałskim hrodźe. W přitwarje sewjerneho kawalěrskeho domu je wobsedźer hrodu Hermann Fuchs w minjenych měsacach zawěrno njewšědny pjaty róžk wutworił: nuznik w kawalěrskim konjencu.
„Hdźež bě w lěće 1833 hižo kóń Carla Gustava Carusa zaměstnjeny, skićimy nětko tule komfortabelny a bjezzadźěwkowy zjawny nuznik“, Hermann Fuchs přeprošuje. Hižo stawiznisce inspirěrowane wobswětlenje a kopija wuznamneje rysowanki „Minakałski hród w swětle měsačka“ mjenowaneho wuměłca a lěkarja posrědkujetej mały zaćišć wo času, hdyž bě Carusowy štyrinohaty přewodźer na tymle městnje swój wows žrał. Carl Gustav Carus (1789–1869), přećel hrabinskeje swójby von Einsiedel, bě wjacore razy z jeje hosćom na Minakałskim baroknym hrodźe.
