Pro a kontra wotwažować
Tež Rakečanska gmejna móhła so do biosferoweho rezerwata zarjadować
Rakecy (JK/SN). Rakečanska gmejna prezentuje so jako jenička na swojej internetowej stronje jako gmejna biosferoweho rezerwata Hornjołužiskeje hole a hatow, hačrunjež njeje w tej měrje ani do rezerwata zapřijata. Tole wuzběhny nawoda biosferoweho rezerwata Torsten Roch na njedawnym posedźenju Rakečanskeje gmejnskeje rady. Tam předstaji wón radźićelam plany, dźěle gmejnskeho teritorija přirjadować biosferowemu rezerwatej. W prěnim rjedźe dźe zamołwitym wo to, přirjadować wosebje kónčiny a ležownosće, kotrež wuchadźeja z hórnistwa abo wudobywanja zemskich pokładow. To su na teritoriju Rakečanskeje gmejny wosebje ležownosće wokoło Kamjenjanskeje kaolinownje. Te předstaji Roch na wosebitej karće, hdźež su tohorunja nowe mjezy planowaneho rezerwata zapřijate. Zdźěla dotalne mjezy zrunaja, na tamnej stronje dźěle jamy kaolinownje rezerwatej přirjaduja. Na prašenje za móžnymi sćěhami za wobsedźerjow ležownosćow Roch wotmołwi, zo budu ze wšitkimi dokładnje a wobšěrnje rěčeć.
Nawjes přetwarić započeli
Němcy (AK/SN). Wjesne srjedźišćo Němcow dóstanje w přichodnych tydźenjach nowy wonkowny napohlad. Za twarski projekt bě wčera symboliski prěni zaryw. Dohromady inwestuja 480 000 eurow. Z toho zapłaći město Wojerecy 25 procentow, tři štwórćiny dóstanu wot Swobodneho stata Sakskeje spěchowane.
Hač do kónca lěta ma wšitko dotwarjene być. „Naš zaměr je, zo so swěčkowy wobłuk prěnjeho adwentna zaso błyšći“, praji wjesny předstejićer Eugeniusz Diesterheft. Staru gratownju wohnjoweje wobory wottorhaja. Tři ležownosće dóstanu nowy přijězd. Při wjesnym swjatym křižu nastanje nowe wotpočnišćo z ławku. Tež při wjesnym zarjadnistwje maja móžnosće k sedźenju nastać. Nimo toho natwarja tam wrota, kajkež su wone za wjetše statoki na wsy z wašnjom. Informaciska tafla ma serbsce a němsce skrótka wjesne stawizny wopisać.
Natwar tradicionalneho kopjeńca demonstrowali
Běła Góra. Štó dźens hišće wě, kak su něhdy w Błótach syno na ćežko přistupnych łukach žnjeli a za zymu składowali? Po dwulětnej přestwace su w Běłej Górje (Byhleguhre) natwar tradicionalneho błótowskeho kopjeńca – w Błótach rěkaja tomu stog (Heuschober) – na swjatkownym kóncu tydźenja demonstrowali.
Hižo tydźeń do poprawneho wjerška su z přihotami započeli. Mužojo su chójnowe zdónki wobstarali a krosno natwarili. Wšako ma syno poł metra nad zemju być, zo móže wětřik stog derje přewětrić. Błótowski stog wobsteji z něhdźe 33 dwójnych centnarjow syna, štož wotpowěduje dźensa něhdźe 13 kulojtym walčkam.
Policija (08.06.22)
Dowolnosć dwójnika pokazał
Hózk. Z přizjewjenjom jězdźenja bjez jězbneje dowolnosće dla skónči so swjatkownu póndźelu wulět 63lětneho muža w Hózku. Tam jeho policisća krótko po 10 hodź. kontrolowachu a chcychu wězo tež jeho jězbnu dowolnosć widźeć. Tu drje muž zastojnikam pokaza. Kaž so na to wukopa, pak njebě to jeho jězbna dowolnosć, ale ta dwójnika kontrolowaneho. Wón sam mjenujcy scyła žanu płaćiwu dowolnosć njewobsedźi, kaž policisća spěšne zwěsćichu. Pospyt, z pomocu dokumenta bratra-dwójnika zastojnikam něšto nabarbić, je potajkim chětro zwrěšćił. Kak dołho je lepjeny z jězbnej dowolnosću dwójnika jězdźił, z policajskeje rozprawy bohužel njewuchadźa.
Přeprošuja do parka
„Podlěćo“ na cyrkwinskim dnju
Bukecy. „Wšitke kraje su jeho česće połne“ rěka hesło 76. serbskeho ewangelskeho cyrkwinskeho dnja, kotryž wotměje so sobotu a njedźelu, 11. a 12. junija, w Bukecach. Po zahajenju sobotu w 14 hodź. w cyrkwi slěduje swačina na wosadnej žurli, hdźež so Bukečanska drastowa skupina předstaji. Spěwna skupina PoŠtyrjoch popołdnjo wobrubi. W 15.30 hodź. přednošuje dr. Lubina Malinkowa pod hesłom „Pobóžni, prědarjo a profetojo“ wo nowych dohladach do nabožneho žiwjenja w Bukečanskej wosadźe.
Njedźelu w 10 hodź. budu swjedźenske kemše z Božim wotkazanjom, kotrež rozhłosowej sćelakaj MDR a RBB live wusyłatej. Po wobjedźe w 11.30 hodź. je planowana přestawka z krótkimi přinoškami a ze zhromadnym spěwanjom. W 14.30 hodź. předstajitej chór Budyšin a cyrkwinski chór LubijskoŽitawskeje eforije pod nawodom cyrkwinskohudźbneho direktora Christiana Kühne z Lubija oratorij „Podlěćo“ w Bukečanskej cyrkwi. Přez wšón čas cyrkwinskeho dnja poskića zaběru za dźěći.
Přirodu nochcedźa woprować
Wobydlerska iniciatiwa wobara so přećiwo južnej wobjězdce Budyšina
Hrubjelčicy (UM/SN). Před 15 lětami protestowachu wobydlerjo při Sprjewi z plakatami a rysowankami přećiwo tehdy planowanej zapadnej tangenće. Dróha je mjeztym dawno dotwarjena. Jenož dwaj kilometraj dale běchu minjenu sobotu podobne wobrazy widźeć. Při Sprjewinym kolesowanskim puću běchu blida nastajane, za kotrymiž ludźo diskutowachu. Jich zhromadny zaměr je sprjewiny doł před dalšim dróhotwarskim projektom zachować. Tón by hišće bóle do přirody zasahnył hač zapadna tangenta. „Tole wšitko by so zničiło, bychu južnu wobjězdku twarili“, praji Robert Maćij. Hrubjelčan je sobuiniciator akciskeho dnja. Wón pokaza na wulke duby při kolesowanskim puću a na kerčinu při rěce, kotrež skića njetopyrjam a ješćelcam žiwjenski rum. „To wšitko mamy woprować za dróhu, kotrejež zmysł spóznać njemóžemy“, praji Robert Maćij. Wšako nětko zapadna tangenta wobsteji. Wona dźě wobchad z Hornjeho kraja wokoło Budyšina do směra na awtodróhu abo do Biskopic a do Kamjenca wjedźe.
Kompleks wopytowarjow zahorił
Dźeń młynow je na swjatkownej póndźeli při najrjeńšim wjedrje wulke syły zajimcow a lubowarjow historiskich drohoćinkow přiwabił. Jedne z tajkich městnow bě pola Chasowa.
Chasow (JK/SN). Zajim za najwšelakoriše młyny, hač wětrniki abo z wodu ćěrjene, hač prastare abo hižo z nowšeho časa, je dale jara wulki. Po dwěmaj lětomaj wobmjezowanych móžnosćow nawali so předwčerawšim tuž ćim wjace ludźi na znate a woblubowane městna, zwotkelž młyny daloko do kraja strowja.
Wo ponowjenju města so wobhonili
Krótkopowěsće (08.06.22)
Dale jako zastojnikow přistajeć
Drježdźany. Pedagogow w Sakskej měli po lěće 2023 dale jako zastojnikow přistajeć. To poruča Berlinski poradźowanski zawod Interva w posudku, kotryž je Sakske kultusowe ministerstwo do nadawka dało. Njeslěduja-li poručenje, dyrbja z jasnje mjenje pedagogiskim dorostom ličić, rěka w spisu. Wot 2019 wučerki a wučerjow jako zastojnikow přistajeja, štož wunjese wo tójšto wjac pedagogow.
Kurs wo eficientnej mobiliće
Drježdźany. Sakska energijowa agentura SAENA tzwr poskića nowy bjezpłatny online-kurs „Eficienta mobilita“ za mjeńše a srjedźne předewzaća w Sakskej. Prěni kubłanski cyklus budźe 28. a 30. junija, 5. a 7. julija. Z přiběracym poskitkom elektriskich wozydłow na wikach zapřija je do flotow. Z toho prašenja nabiwanskeje infrastruktury wurostu. Tu chce kubłanje mjez druhim nawjazać.
Ukrainske mocy pomhaja
