Wo pčołkach tójšto wuknyli
Kóšty dźěćacych domow rozrostli
Radwor (SN/MkWj). Z wjacorymi dobrymi powěsćemi móžeše Radworska wjesnjanostka Madeleine Rentsch předwčerawše posedźenje gmejnskeje rady zahajić. Tak wona radźićelam a hosćom zdźěli, zo je Załožba za serbski lud 5 100 eurow za ponowjenje Hronowskeho křiža přewostajiła, kotryž běchu njeznaći powalili a wobškodźili. Runje tak ju zwjesela, zo běchu tři zapodate projekty gmejny Radwor na idejowym wubědźowanju k polěpšenju turistiskeje infrastruktury we Łužicy wuspěšne: Radworski katolski dźěćacy dom ze swojim projektom „Na slědach Alojsa Andrickeho“, projekt na bywšim Radworskim dwórnišću na dobro inkluzije zbrašenych a předewzaće Radworskeho kupoweho zjednoćenstwa nastupajo twar noweje škitneje chaty.
Etat skónčnje wobzamknjeny
Starši so wudawkow w Njebjelčanskej pěstowarni dla naprašowali
Njebjelčicy (SN/MWj). Wjele wutrajnosće trjebachu čłonojo Njebjelčanskeje gmejnskeje rady na swojim wčerawšim posedźenju, jako steješe hospodarski plan 2021 w srjedźišću. Přećiwo njemu běchu někotři radźićeljo tójšto znapřećiwjenjow zapodali, kotrež so na najwšelakoriše pozicije wudawkow měrjachu. Kóžde jednotliwe prašenje wjesnjanosta Tomaš Čornak (CDU) wčera nadrobnje rozłoži.
Tak porokowachu radźićeljo mjez druhim wudawki gmejny za rězbarsku dźěłarničku, měnjo, zo měła wona tež tamne towarstwa spěchować. Nimo toho wěnowachu so wjacore zapodaća přećiwo planowanym wudawkam za komunalny twarski zawod, kotryž chcedźa přichodny čas rozšěrić a wjacore rumnosće přemysłownikam wotnajeć. Při jednotliwych wothłosowanjach wjetšina radźićelow znapřećiwjenja wotpokaza. Tak móžachu skónčnje cyłkowny hospodarski plan gmejny Njebjelčicy za lěto 2021 wobzamknyć.
Słódne holanske jahodki su sej Horbankecy z Budyšina tele dny w ...
Nowe zetkanišćo dale rosće
Hórki (JK/SN). Prjedy hač sej gmejnscy radźićeljo w Chrósćicach swój zasłuženy dowol popřeja, wobzamknychu woni na swojim wčerawšim posedźenju wjacore wažne naležnosće, kotrež maja přichodnje zwoprawdźić. Za wšelake twarske naprawy su wjesnjanostu Marka Klimana (CDU) społnomócnili, hospodarsce najpřijomniše poskitki přiwzać a wotpowědnje rozsudźić. Tak ma wón podpisać honorarne zrěčenje za inženjerske planowanje přetwara Chróšćanskeje nawsy a areala při Cyrkwinskej horje. Za tele naročne předewzaće je gmejna tež próstwu wo spěchowanje zapodała a nadźija so wo přizwolenje. Wotpowědny program předwidźi spěchowanje we wobjimje 75 procentow. Swójski podźěl wozmje gmejna z pjenjez, kotrež je jako myto w lońšim wubědźowanju simul+ dobyła. Kajka ma Chróšćanska nawjes jónu wupadać, móžachu sej zajimcy na njedawnym zarjadowanju w „Jednoće“ wobhladać.
Krótkopowěsće (16.07.21)
Nakupować bjez nahubnika
Budyšin/Zhorjelc. Incidencna hódnota w Budyskim wokrjesu je dale 2,7. Hač do wčerawšeho zwěsćichu tam dalšej natyknjeni z koronawirusom. Tuchwilu je we wokrjesu dohromady 18 wobydlerjow inficěrowanych. W Zhorjelskim wokrjesu je incidenca dale na nuli, nowonatyknjenja njejsu so žane jewili. Pozitiwneje tendency dla hodźi so w Sakskej wotnětka bjez nahubnika nakupować.
Hudźbne widejo wo brunicy
Chasow. Skupina Astronawt chce dźensa wječor swój najnowši hudźbny widejo „Brunica“ na Youtube-kanalu Serbska hudźba wozjewić. Hłownu rólu sćělesnja wuměłča Greta Čórlichec. Cyłkownje zličichu na portalu dotal něhdźe 70 000 klikow a 500 abonentow.
Dalše pady swinjaceje mrětwy
Wustajeńca na dobro swójbow
Budyšin. W Budyskim krajnoradnym zarjedźe, do kotrehož móža sej zajimcy zaso bjez wobmjezowanja dóńć, wabi nětko wosebita wustajeńca. Jeje hesło je „Moja swójba – što sej na njej wažu“. Wustajene su rysowanki, kolaže, fotografije a teksty dźěći a dorosćenych, kotrež a kotriž su počasu jako swójba hromadu zrostli. Wšako běchu namołwjeni w molowanskej a akciji za kreatiwnosć swoje mysle podać jako čłon hladanske swójby. W cyłku je 65 wuměłskich twórbow widźeć. Do rozmyslowanja a tworjenja namołwjeli běchu Budyski młodźinski zarjad a Lions-club Budyšin-Lusatia. Pućowansku wustajeńcu chcedźa po Budyšinje w Kamjencu a Wojerecach pokazać. Předwidźane tež je nasćěnowu protyku zdźěłać.
Swěčki na zahrodźe
Pančicy-Kukow. Nóc tysac swěčkow wotměje so sobotu, 17. julija, wot 19 hodź. na zahrodźe klóštra Marijineje hwězdy w Pančicach-Kukowje. Na wopytowarjow čaka tam jewišćowy program z akrobatiku, wohnjowej show a hudźbu. Při ćmičkanju zaswěća potom zaso swěčki a zestajeja je do wšelakich pisanych wobrazow. Wopytowarjo smědźa při tym rady pomhać.
Consorcium spěwa
Policija (15.07.21)
We wsy znjezbožił
Wotrow. Wobchadne njezbožo pod wliwom alkohola je so předwčerawšim we Wotrowje stało. 27lětny wodźer Audija bě na wjesnym křižowanišću po wšěm zdaću z přewulkej spěšnosću nalěwo wotbočił a při tym do murje priwatneje ležownosće kaž tež do milinoweho kašćika zrazył. Wodźer kaž tež sobujěducy w starobje 17 do 21 lět so snadnje zranichu. Při wobdźěłanju njezboža so wukopa, zo měješe wodźer 1,32 promilow alkohola w kreji. Cyłkowna wěcna škoda wučinja 8 000 eurow.
Město misionara w cuzbje so wosadny farar stał
Delni Wujězd (AK/SN). Po 40lětnym skutkowanju jako farar w Delnjowujězdźanskej ewangelskej wosadźe je so farar Matthias Gnüchtel na wuměnk podał. Ze swjedźenskej Božej słužbu w Delnjowujězdźanskej cyrkwi hódnoćeše wosada minjenu njedźelu žiwjenski skutk duchowneho a jeho mandźelskeje Veroniki. Superintendent ewangelskeho cyrkwinskeho wokrjesa Šleska Hornja Łužica dr. Thomas Koppehl je wjelelětneho fararja rozžohnował. W prědowanju poćahowaše so Matthias Gnüchtel na swoje žiwjenske plany jako młody farar. Jeho són tehdy bě, hić jako misionar do Papuwa-Noweje Gineje. Skónčnje pak wosta w Delnim Wujězdźe, a to nimale štyri lětdźesatki. Wot lěta 2005 wukonješe dźěło fararja tež we Łazu a wokolnych wsach, rozłoži Günter Wjenk z Łazowskeje wosadneje cyrkwinskeje rady.
Wo štomach so wobhonić
Za wučbnu šćežku myto z fondsa „Čiń sobu!“ dóstali
Brězyna (CS/SN). Njeběchu to jeno dźěći, kotrež su wčera něšto přinawuknyli. Tež někotryžkuli dorosćeny měješe při přepodaću štomoweje wučbneje šćežki pola Brězyny (Brösa) w Malešanskej gmejnje zajimawe dožiwjenje. Štó dźě so hižo cyle dokładnje z domjacymi družinami štomo wuznawa? Kotry rozdźěl na přikład wobsteji mjez robiniju a akaciju? Na něhdźe 950 metrow dołhim pućiku mjez Brězynu a Lichanjom (Spreewiese) taflička na to skedźbnja, zo pola nas jenož robinija rosće. Abo je štó hižo raz něšto wo štomje z němskim mjenom Speierling słyšał, kiž rěka serbsce domjaca wjerjebina? Kaž móžeš na wotpowědnej tafli čitać, je tónle na wjerjebinu podobny štom we wuchodnej Sakskej jara rědki. Jón wuzwolichu 1993 za štom lěta. Wučbna šćežka njerozłožuje jenož nasadźene třiceći družin štomow. Taflički tohorunja na to skedźbnjeja, hdźe wosebite eksemplary wuhladaš, kaž historiski dub pola Delnjeje Hórki. Najwjetšu zasłužbu na wutworjenju wučbneje šćežki ma Hans-Georg Graf, bywši Lichańčan.
