Rjane to znamjo zhromadnosće
Ze spočatneje frustracije nad njewuspěchom bu skónčnje lóšt. Mjenujcy lóšt, w aktualnje ćežkim času zhromadnje na dobro druhich jednać. To su Kamjenscy měšćanscy radźićeljo na swojim minjenym posedźenju nazhonili.
Kamjenc (BG/SN). W Lessingowym měsće maja so kaž wšudźe z koronakrizu a jeje wuskutkami bědźić. Tež tam běchu mjenujcy njedawno tak mjenowane „koronowe wuchodźowanja“ přewjedli, na kotrychž njebuchu hygienowe předpisy dodźeržane. Tohodla staj so Kamjenski wyši měšćanosta Roland Dantz (njestronjan) a porjadowy zarjad města chětro do wuskosćow dóstałoj. Kritika přińdźe předewšěm ze stron měšćanskich radźićelow Lěwicy. Bjezmała wšak by so tema z dypkom dnjoweho porjada posedźenja měšćanskeje rady stała, ale přitomni tomu zadźěwachu.
Krótkopowěsće (17.12.21)
Incidenca snadnje niša
Budyšin. Roberta Kochowy institut je dźensa za Budyski wokrjes incidencu 896,3 a za Zhorjelski 657,3 podał. We wokrjesu Budyšin zwěsćichu wčera 697 natyknjenjow z koronawirusom a štyri smjertne pady. Wo 283 nowoinfekcijach informowaše Zhorjelski wokrjes, kotryž je wčera statistiku zemrětych wo dwanaće z doby wot 30. nowembra do 10. decembra wudospołnił.
Doktorske dźěło zakitował
Praha. Lektor za delnjoserbšćinu na Instituće za sorabistiku Lipšćanskeje uniwersity Stanislav Tomčík je wčera swoju disertaciju na Karlowej uniwersiće w Praze wuspěšnje zakitował. „Rěč nacionalsocialistiskeje propagandy we łužiskoserbskich ćišćanych wozjewjenjach 30tych lět“ bě tema doktorskeho dźěła. Posudźowałoj stej je dr. Martina Šmejkalová z Prahi a serbska rěčespytnica dr. Jana Šołćina.
Hižo wjac hač 11 300 podpismow
Zbytk stareje dračernje so dospołnje zhubił
Budyšin (ES/SN). Starši Budyšenjo drje so hišće na to dopominaja: Hdyž je wětřik ze sewjerowuchodneho směra po juhowuchodnym předměsće z arealom wokoło Allendoweje hasy, Wederoweho sydlišća a při Špitałskich łukach duł, je wón často tak njeznjesliwy słódki smjerd ze sobu přinjesł, zo dyrbjachu wobydlerjo tam jenož durje a wokna kruće zezačinjeć.
Policija (16.12.21)
Nowiny kradnyli
Wojerecy. Cyle njewšědnu rubiznu běchu sej paduši w nocy na wutoru na Wojerowskim Łužiskim naměsće wupytali. Sobudźěłaćerka nowinskeho kioska informowaše policiju, zo běchu so njeznaći do kašćika zadobyli, do kotrehož dóstawa předawanišćo wšědnje aktualne nowiny dodawane. Po informacijach policije pokradnychu paduši nowiny w hódnoće 1 000 eurow. Nimo toho načinichu 50 eurow wěcneje škody.
Online so přizjewić
Budyšin. Ze spočatkom lěta 2022 budu so wobydlerjo na dźěłowej agenturje tež online a z personalnym wupokazom z online-funkciju bjezdźěłni přizjewić móc. Potom njeje hižo trjeba, zo so wosobinsce na dźěłowej agenturje přizjewiš. Wupokaz z online-funkciju je trěbny, zo hodźa so potrjecheni identifikować. Wšitke dalše kroki kaž próstwa wo bjezdźěłnostny pjenjez hodźa so potom tohorunja digitalnje wobstarać. Alternatiwnje budźe wězo dale móžno so wosobinsce na zarjedźe přizjewić.
Kupjel zawrjena
Kamjenc. Budyski krajnoradny zarjad zdźěli, zo wostanje Kamjenska halowa kupjel hač do 9. januara za zjawne płuwanje kaž tež za wužiwanje sawny a solarija zawrjena. Šulske płuwanje, towarstwowy płuwanski sport za dźěći hač do staroby 16 lět kaž tež zahajene płuwanske kursy dale su.
Wupisaja městno předsydy
Zawodaj derje hospodariłoj
Jara rozdźělnje wobchadźeja gmejnske rady z dnjowymi porjadami za swoje posedźenja. Mjeztym zo chcedźa někotre prawje wjele dypkow wobjednać, so druhdźe na najnuzniše wobmjezuja.
Rakecy (JK/SN). Posedźenja Rakečanskeje gmejnskej rady bywaja na kóncu lěta dźeń a krótše. Na wčerawšim a poslednim tohole lěta trjebachu jeničce něšto mjeńšin, zo bychu swoje naležnosće wobzamknyli. To běštej kónclětnej wotličeni tamnišeje zastaranskeje towaršnosće kaž tež bydlenjotwarskeje towaršnosće. Wobě stej gmejnskej zawodaj, a tak bě trjeba pruwowanej a nětko předležacej kónclětnej wotličeni k 31. decembrej 2020 wobzamknyć a zdobom wjesnjanostu Swena Nowotneho (CDU) społnomócnić, zo na hłownymaj zhromadźiznomaj towaršnikow za gmejnu a tuž zdobom za prawosć pruwowanja hłosuje.
Spjatnišćo hižo njebudźe
Zběrnik za wulku wodu na kromje Njebjelčic přetwarjeja
Njebjelčicy (SN/MWj). Na kromje Njebjelčic do směra na Miłoćicy maja nětko wulke twarnišćo, z kotrymž so napohlad tamnišeho areala bytostnje změni. Tam je Sakske krajne zarjadnistwo rěčnych zawěrow zběrnik za wulku wodu přetwarjeć započało. Twarske dźěła su trěbne, dokelž wěstota spjateje murje při wulkej wodźe hižo zaručena njeje. Tež aktualnje žadane wěstotne naroki spjelnjene njejsu, tak na přikład wotběh wody hižo bjez wobmjezowanjow njefunguje. Nimo toho je zběrnik přemały.
Robert Krawc nowy wěcywustojny
Demonstracije přećiwo koronje, Alstom a změna wobsadki dźěłoweho kruha za serbske naležnosće su Budyskich měšćanskich radźićelow wčera zaběrali.
Budyšin (SN/JaW). Robert Krawc je nowy wěcywustojny serbski wobydler w dźěłowym kruhu za serbske naležnosće města Budyšina. Jeho su radźićeljo z pjeć napřećiwnymi hłosami a dwěmaj hłosawzdaćomaj do gremija powołali. Namjetowała je Krawca frakcija SPD. Wón naslěduje Jana Budarja, kotrehož bě rada z jednym hłosawzdaćom z funkcije wuwjazała. Kaž Budyski wyši měšćanosta Alexander Ahrens (SPD) wujasni, je Budar „jeho wo tym informował, zo je přećahnył. Tak ma swoje hłowne bydlenje zwonka Budyšina a njemóže wjace w kruhu skutkować.“
Krótkopowěsće (16.12.21)
Dalše smjertne pady
Budyšin. Ličba na a w zwisku z koronu zemrětych pacientow w Hornjej Łužicy přiběra. W Budyskim wokrjesu mjenowachu wčera pjeć smjertnych padow a 554 dalšich natyknjenjow. We wokrjesu Zhorjelc rozprawjachu wo wosom zemrětych w času wot 2. do 12. hodownika. Incidenca po Roberta Kochowym instituće je dźensa w Budyskim wokrjesu 937,2 a w Zhorjelskim 730,0.
Ptači kwas wotprajeny
Budyšin. Serbski ludowy ansambl je pandemije dla znowa ptačokwasnej programaj wotprajił. Nawodnistwo SLA je so hromadźe z režiseromaj za to rozsudźiło, dokelž njeje wotwidźeć, zo so połoženje w januarje a februarje rapidnje polěpši a zo budu zjawne předstajenja w dźiwadłach zaso móžne. Dźěćacy ptači kwas „Leć ze mnu!“ kaž tež wječorny ptači kwas „Njewěsta njewjesta“ swjećitej tuž w januarje 2023 premjeru.
Wólbny termin postajili
