Běła Woda (AK/SN). Před lětom při wulkim wohenju mócnje wobškodźeny Běłowodźanski Ludowy dom chcedźa 2028 za kulturne žiwjenje města zaso wočinić. „Tole je naš zaměr k 100. róčnicy domu“, rjekny předwčerawšim wyši měšćanosta Torsten Pötzsch (Klartext). Hromadźe z wobydlerjemi wotkry wón informacisku taflu, kotraž dopomina němsce, pólsce a čěsce na architekta twarjenja Emila Langu (1884– 1968). Z tym rozšěrja město swoju škleńčersku šćežku, z kotrejž hódnoća historiske městna kaž bywše škleńčernje abo prěni lodowy stadion. Tafla při Ludowym domje je mjeztym dźesata tajkeho razu w Běłej Wodźe.

Tež lěto po wohenju, kotryž je dźěl twarjenja ze swjedźenskej žurlu dospołnje zničił, prócuje so město juristisce wo zarunanje škody přez zawěsćernju. Runočasnje zestajeja wužiwanski koncept, zo móhli snano w septembru próstwu wo spěchowanske srědki za nowonatwar Ludoweho domu zapodać, informowaše twarska nawodnica města Dorit Baumeister.

Róžant. Přichodne posedźenje gmejnskeje rady Ralbicy-Róžant wotměje so jutře, štwórtk, we 18.30 hodź. w Róžeńčanskim gmejnskim zarjadnistwje. Mjez druhim zaběraja so radźićeljo z hospodarskim planom za lěto 2022. Nimo toho steja dodatne wustawki „Konjecy – zapadny dźěl“ na dnjowym porjedźe posedźenja.

Njebjelčicy. Tohorunja jutře, ale hakle w 19.30 hodź. zetkaja so čłonojo Njebjelčanskeje gmejnskeje rady k swojemu wuradźowanju w gmejnskim zarjadnistwje. Woni rozjimaja mjez druhim Leaderowu wuwićowu strategiju za dobu wot 2023 do 2027 a wotzamknu wotnajenske zrěčenje za solarnu připrawu. Nimo toho wobjednaja Njebjelčanscy radźićeljo tež swój hospodarski plan za 2022. Na wobě posedźeni su zajimcy witani.

Fit w starobje

Mało rubizny, wjele škody

Wojerecy. Domčki w zahrodkownišćach su stajnje zaso woblubowane cile paduchow. Zwjetša pak namakaja tam mało, štož móža pokradnyć. Ćim wjetša je wěcna škoda, kaž najnowši pad z Wojerec pokaza. Tam běchu so njeznaći w nocy na póndźelu hnydom do 14 domčkow w zahrodkownišću na Hasy Liselotty Herrmann zadobyli. Pokradnyli su kabl, truhanski nóž, špihel, točensku mašinu a cigarety w cyłkownej hódnoće 350 eurow. Wěcnu škodu pak trochuje policija na něhdźe 3 900 eurow. Policija pad dale přepytuje.

Architekt koncept nutřkowneho wobnowjenja cyrkwje předstajił

Chrósćicy (SN/MWj). Hač do kermuše 2023 ma Chróšćanska cyrkej nutřkownje wobnowjena być. Tole zdźěli architekt Marko Dźisławk minjenu njedźelu na hudźbnym nyšporu, jako wón koncept ponowjenja tójšto zajimowanym připosłucharjam předstaji. Twarske dźěła chcedźa lětsa w awgusće zahajić.

Najwjetše změny připowědźi wón we wołtarnišću. Te chcedźa dospołnje wo jedyn schodźenk znižić, zo by wone tež ludźom z handicapom přistupne było. Tuchwilne wołtarne blido ma so na swoje historiske městno před wysokim wołtarjom wróćić. Tuž budźe trěbne nowe wołtarne blido, kotrež ma bliže ke kemšerjam stać, takrjec jako wuraz zbliženja cyrkwje a wosady, kaž architekt rozłoži. Runočasnje maja nowe městna za měšnika, za ministrantow a za ambo nastać.