Greenpeace a mandala
Miłoćicy. Před lětomaj nastaty mandala mjez Miłoćicami a Njebjelčicami ma so wobnowić. Zdokonjeć chcedźa to jutře, sobotu, čłonojo hornjołužiskeje skupiny Greenpeace. Njebjelčanski wjesnjanosta Tomaš Čornak (CDU) chce jim na pućowanju gmejnu předstajić. Zdobom wobdźěla so na mejestajenju popołdnju na nawsy w Njebjelčicach. Njedźelu potom wotměje so w Miłočanskej skale měnjenska bursa rostlinow. Wot připołdnja w 13 hodź. hač do 17 hodź. móža zajimcy swoje młode rostliny sobu přinjesć a je z tymi druhich poskićerjow měnjeć. Tež nakup za mały pjenjez je móžny.
Požohnuja motorske
Ralbicy. Wodźerjo motorskich su njedźelu, 1. meje, do Ralbic přeprošeni. Tam so w 14 hodź. nyšpor z požohnowanjom mašinow a wodźerjow započnje. Přizamknje so zhromadny wulět.
Swójbny dźeń na statoku
Smědźa so na dorost wjeselić
Wuhódanje jutrowneje křižowki
Lětsa chcedźa twarić započeć
Róžant (SN/MWj). Po wšěm zdaću hišće lětsa prěnje twarske nadawki za nowu Ralbičansku pěstowarnju wupisaja a tež twarskim firmam přepodadźa. Prawdźepodobnje budźe so při tym wo hłubokotwarske dźěła jednać. Tole zdźěli wjesnjanosta Hubertus Ryćer (CDU) na wčerawšim posedźenju gmejnskeje rady.
Jeje čłonojo zaběrachu so mjez druhim z hospodarskim planom 2022. W nim je dalše planowanje projekta jedna z najwjetšich inwesticijow komuny. Kaž Ryćer dale zdźěli, ma pěstowarnja po najnowšich wobličenjach 8,1 milion eurow płaćić. 90 procentow z toho dóstanu spěchowane. Swójski podźěl gmejny wučinja přiwšěm něhdźe milion eurow. Při wobličenju je wobkedźbowane, zo móhli wudawki za twaršćizny a scyła za twarske kóšty wo hač do 25 procentow rozrosć. Za to móže gmejna hač do dźesać procentow wjace spěchowanja dóstać.
Z njewšědnymi twaršćiznamia technikami eksperimentuja
Nowe Město (AK/SN). Bywše fabrikowe twarjenje předźernje za drjewjanu wołmu na kromje Noweho Města nad Sprjewju chcedźa na wobswětowy kubłanski a zetkawanski centrum wuwić. To připowědźa towarstwo „Předźernja za naslědne žiwjenje z.t.“. „W běhu třoch lět su za to wobšěrne twarske dźěła planowane. Wosebitosć je, zo sej wuraznje přejemy, zo so z alternatiwnymi twaršćiznami a rjemjeslniskimi technikami eksperimentuje“, wuzběhnjetaj iniciatoraj Friederike Böttcher a Adrian Rinnert. Z hlinu, drjewom a dalšimi přirodnymi twaršćiznami chcedźa rumnosće a fasadu wuhotować. Za to zasadźuje so tohorunja bywša zapósłanča Lěwicy w Sakskim krajnym sejmje Kathrin Kagelmann.
Mjeztym je towarstwo tež zwjazkowe wobswětowe ministerstwo přeswědčiło. Wottam dóstanu přichodne tři lěta spěchowanje we wobjimje nišeje pjećcyfroweje sumy. Na tak mjenowanym „twarnišću k sobu činjenju“ chcedźa nětko stare rjemjeslniske techniki wuspytać, domjacu nadobu reparować a hižo raz wužiwane resursy znowa zasadźeć, rjekny Adrian Rinnert.
Takle gmejnam delnjoserbsce rěkaja
Baršć (SN/JaW). Wokrjesaj Sprjewja-Nysa (SPN) a Hornje Błóta-Łužica (OSL) matej nowy serbskorěčny poskitk. Pod a tež na internetnej stronje wokrjesa OSL móža sej zajimcy wobhladać, kak maja pomjenowanja gmejnow wokrjesa prawje delnjoserbsce pisać a zdobom móža sej tam naposkać, kak měli je prawje wurjekować. Wo tym informuje krajnoradny zarjad wokrjesa SPN w nowinskej zdźělence.
„Palc horje“
Krótkopowěsće (29.04.22)
Staw infekcijow dale woteběra
Budyšin/Zhorjelc. Po Roberta Kochowym instituće (RKI) je so incidenca w Hornjej Łužicy dale znižiła. W Budyskim wokrjesu wučinja wona aktualnje 484,5. We wokrjesu Zhorjelc je so ličba na 397,1 pomjeńšiła. Tamniši krajnoradny zarjad informuje wo 178 nowych natyknjenjach z koronawirusom, mjez kotrymiž zwěsćichu dohromady 14 infekcijow pola dźěći. Jednoho pacienta hladaja tuchwilu na intensiwnej staciji.
Narodne myto Wernerej Schulze
Weimar. Narodna załožba Němskeje spožči lětuše „Narodne myto Němskeje“ něhdyšemu wojowarjej za wobydlerske prawa w Němskej demokratiskej republice Wernerej Schulze. We wopodstatnjeju rěka, zo je so wjelelětny parlamentownik w Berlinje a Brüsselu a čłon Zwjazka 90/Zelenych „lětdźesatki z wulkej prócu a njehladajo tójšto spjećowanjow za natwar a zakitowanje demokratije angažował“.
Wulke plany Praskeje metro
Nětko awta zaso smala
Nowe hrajkanišćo wosrjedź wsy derje přiwzate
Njeswačidło (JK/SN). Centralne městno noweho hrajkanišća w Njeswačidle žněje připóznaće, ale wuwabja tež wobmyslenja. To pokaza so na zašłym posedźenju Njeswačanskeje gmejnskeje rady. Tam wupraji zastupowacy wjesnjanosta Norbert Braun (rjemjesło a přemysło) wšitkim iniciatoram a podpěraćelam tutoho projekta wutrobny dźak gmejny. Staršiska iniciatiwa je přez wjacore lěta hromadźiła pjenjezy za nowe hrajkanišćo a gmejna je to po mocach podpěrała. Nowe stejnišćo hrajkanišća pak je w mnohich wjesnjanach tež wobmyslenja wuwabiło, hač drje je bliskosće k hłownej dróze dla wěste dosć. Tola wobmyslenja so jako njetrjebawše wopokazaja. Płót hrajkanišćo wěsće wot dróhi wotmjezuje, a zwjetša su tam hrajkace dźěći pod dohladom staršich. Hrajkanišćo so jara derje přiwozmje, wot dźěći runje tak kaž wot staršich. Nimale wšědnje tam dźěći wuhladaš. Tež dwělowarjo, hač drje so městnosć a naprawa zadanitej, so na njedawnym přepodaću ze słowami připóznaća wobdźělichu.
