Dróha zawrjena
Brěžki. Wot wčerawšeje póndźele ponowjeja asfaltowu worštu statneje dróhi S 285 wot wotbóčki při zwjazkowej dróze B 96 pola Noweje Bukojny hač k wjesnej kromje Brěžkow. Twarske dźěła maja hač do 29. oktobra trać. W tym času je dróha po dołhosći 2,2 kilometrow dospołnje zawrjena. Wokołopuć wjedźe přez Mučow a Kulow.
Dźiwadło „wuchodneje identity“
Budyšin. Towarstwo Kamjentny dom přeproša na dźiwadłowy wječor pod hesłom „Kak zdokonjeć spomóžne wuměłstwo za wuchodnych Němcow?“, a to pjatk, 22. oktobra, w 19 hodź. Dźiwadłownik (Theatermacher) Noah Voelker z texaskeho Austina, hrajerka Rika Weniger z Neubrandenburga a choreograf Burkhard Körner z Mittweidy chcedźa ze swojim programom přepytować, hač tajke něšto kaž „wuchodoněmska identita“ eksistuje. Předstajenju přizamknje so zjawna rozmołwa. Zastup při wječornej kasy płaći dźesać resp. wosom eurow za wosoby z prawom na potuńšenje.
Předstaja knihu
Policija (19.10.21)
Z pokradnjenym kolesom po puću
Wojerecy. We wčerawšich rańšich hodźinach kontrolowachu policisća we Wojerecach 36lětnu kolesowarku a jeje třoch muskich přewodźerjow. Při tym wopokazachu zastojnicy dobry čuch. Přetož za kolesom žony policija hižo pytaše, dokelž bě pokradnjene. Při dokładnišej kontroli wačokow třoch přewodźerjow namakachu hišće rozrězanej kolesowej zamkaj. Dokelž wobsteješe podhlad, zo běchu tež tamne kolesa kradnjene, zastojnicy groćane koniki sćazachu a přizjewichu to sudnistwu.
Do kulturneho domu so zadobyli
Biskopicy. Spodźiwnu njedźelnu zaběru wupytało bě sej pjeć młodostnych předwčerawšim w Biskopicach. Woni wočinichu zamurjowane durje kulturneho domu a zadobychu so do prózdneho twarjenja. Pasanća to wobkedźbowachu a wołachu policiju. Što su młodźi ludźo w domje chcyli, njeje znate.
Myto za angažement młodźiny
Hač do kónca oktobra namjety zapodać
Biskopicy (SN/MiR). Biskopičanska syć za dźěći a młodźinu (KiJu) spožči lětsa prěni raz myto za angažement młodźiny w Budyskim wokrjesu a jón na te wašnje zjawnje hódnoći. „Po nimale jednym lěće koncepcionelneho dźěła je nětko tak daloko, zo KiJu tele myto wupisa,“ zdźěli Bernadette Zellerowa z regionalneje skupiny Zapadna Łužica KiJu. Wona wuzběhuje, zo je tež w Serbach tójšto młodostnych, kotřiž so čestnohamtsce na dobro towaršnosće a zhromadneho žiwjenja angažuja. Hač do spočatka decembra njewotwisna jury młodostnych rozsudźi, štó měł myto dóstać. Wona postaji tež pjenježnu hódnotu dobyća a kelko mytow budźe přepodatych. 5. decembra chcedźa dobyćerjow wozjewić.
Nakupowanska nóc w kuzłapołnym swětle je wobydlerjow Kulowa ...
Krótkopowěsće (19.10.21)
Incidenca snadnje spadnyła
Budyšin/Zhorjelc. Incidenca koronawirusa dla je w Budyskim a Zhorjelskim wokrjesu po informacijach RKI lochce spadnyła. Za Budyski podawaja dźensa hódnotu 115,8 (-41,6). Hač do wčerawšeho přizjewi wokrjes 135 dalšich natyknjenjow z wirusom. W Zhorjelskim wučinja incidenca po RKI dźensa 98,2 (-27,1). Tam běchu hač do wčerawšeho 121 nowoinfekcijow zwěsćili.
Knižne myto Podstupimjance
Frankfurt n. M. Bursowe towarstwo němskeho knihikupstwa spožči Podstupimjance Antje Rávik Strubel za jeje roman „Blaue Frau“ lětuše Němske knižne myto. Hódnoćaca jury chwali sej „eksistencielnu móc a poetisku preciznosć“ knihi, kotraž je „refleksija wo rozdźělnej kulturje wopomnjeća w zapadnej resp. wuchodnej Europje kaž tež wo njerunowaze mjez splahami“.
Změja noweho měšćanostu
Mjedwjedźej nětko na dowolu
Wojerecy (SN/MWj). Wot dźensnišeho saněruja we Wojerowskim zwěrjencu připrawu za mjedwjedźe. Za to přećehnjetej mjedwjedźej Björn a Bengt do Augsburgskeje coologiskeje zahrody. Jeju borkanja w zemi dla je so hrodowa hrjebja w připrawje rozšěriła a nětko tež wodu přepušća. Tak chcedźa hrjebju na jeje poprawnu šěrokosć zwužić.
Za čas twarskich dźěłow, kotrež maja hač do nalěća 2022 trać, chcedźa mjedwjedźomaj stres twarskeje hary dla zalutować a sćelu jeju takrjec na mjedwjedźacy dowol. Přichodne měsacy jenož hrjebju njesaněruja, ale tež nowe elementy do wobłuka za mjedwjedźe zapřijmu, mjez druhim kumštne prózdnjeńcy. W Augsburgu změjetaj Björn a Bengt hektar wulku připrawu za sebje, dokelž je tam loni jenička mjedwjedźica zahinyła. Klětu nalěto so wonej do Wojerec wróćitej.
Křižersku seklu wušiwali a wjazali
Za předstajenje knihi so přizjewić
Budyšin. „Region njewěstoty? Podkarpatská Rus 1918-1938 a wěstotne diskursy w historiskim slědźenju wo mjeńšinach“ rěka hesło zarjadowanja Serbskeho instituta, kotrež přewjedu štwórtk, 21. oktobra, w 15 hodź. w Budyskim Kamjentnym domje. Ze załoženjom Čěskosłowakskeje 1918 bu region wokoło Užhoroda (dźensniša Ukraina) pod pomjenowanjom Podkarpatská Rus dźěl noweho nacionalneho stata. Wosebitosć regiona njebě jenož jeho periferne połoženje. Hladajo na zestawu ludnosće, słabu infrastrukturu a połoženje při hranicy płaćeše wón jako faktor njewěstoty. Statne jednanje w regionje přewodźachu mnohe diskursy wo wěstoće. Zarjadowanje poćahuje so na lětsa wušłu knihu „Fremde Peripherie – Peripherie der Unsicherheit? Sicherheitsdiskurse über die tschechoslowakische Provinz Podkarpatská Rus (1918–1938)“ a skići składnosć, wo wěstotnych diskursach w mjeńšinowym slědźenju rěčeć.
Policija (18.10.21)
Na wopačnej čarje jěł
Słona Boršć. Dokelž je při jězbje do Drježdźan na wopačnej čarje jěł, je 22lětny muž z Pólskeje dźensa rano na awtodróze A4 wjacore wobchadne njezboža zawinił. Prěnju informaciju wo nim dósta policija z tunla pod Limasom. Na to spytachu zastojnicy muža zadźeržeć, štož pak so jim njeporadźi. Šofer nakładneho awta staji swój Lkw prěki přez jězdnju, tež to pak njeje wodźerja awta zadźeržało. Hakle mjez Słonej Boršću a Hornim Wujězdom zrazy wón do srjedźneho wobhrodźenja a wosta stejo. Zranjeneho 22lětneho dowjezechu z helikopterom do chorownje. Kaž so při prěnim přepytowanju wukopa, steješe młody muž pod wliwom drogow.
Dalše naprawy předstajili
Njebjelčicy (SN/MWj). Za wudźeržowanje swojich wodźiznow 2. rjadu Njebjelčanska gmejna dalše pjenjezy wuda. Na swojim zašłym posedźenju radźićeljo wobzamknychu, za to 10 500 eurow nałožić. Je to mjeztym třeća wjetša suma, kotruž planowarjej Andreasej Stowasserej za poradźowanje a zdźěłanje planow přewostaja. Při tej składnosći je wón minjene dny radźićelam rozłožił, kajki je wokomiknity staw a kotre naprawy su přichodnje předwidźane.
Powšitkownje bě Stowasser zwěsćił, zo su wodźizny na teritoriju Njebjelčanskeje gmejny hladajo na jich wudźeržowanje w dobrym stawje. Tak fachowc měnješe, zo bu hižo wjele činjene a wodźizny intensiwnje hladane. Při tym njeńdźe wo to, rěčki a hrjebje po jich cyłkownej dołhosći dospołnje přirodźe přiměrić. Skerje dosaha, hdyž su wěste wotrězki přirodźe bliske. Tamne wotrězki móža potom bjez wosebitych naprawow wuńć.
