Policija (26.01.22)
Do hale so zadobyli
Nowa Łuka. Minjeny kónc tydźenja běchu so njeznaći do hale firmy w Nowej Łuce w gmejnje Halštrowska Hola zadobyli. Tam pokradnychu mjez druhim chłódźenskej agregataj w cyłkownej hódnoće něhdźe 1 300 eurow. Nimo toho načinichu 300 eurow wěcneje škody.
Wjetše wudawki zmištrowali
Dróhotwarski projekt na kóncu tola dróši był
Rakecy (JK/SN). Wjacore lěta je gmejna Rakecy wulki projekt, wobnowjenje Jitkowskeje dróhi, planowała a přihotowała. Loni móžachu dróhu po nimale jednym lěće twarjenja a wužadanjow za komunu a přemysłownikow podłu puća zaso swojemu zaměrej přepodać.
Na minjenym posedźenju gmejnskeje rady informowaše wjesnjanosta Swen Nowotny (CDU) radźićelow a přitomnych wo kóštach nastupajo wobnowjenje dróhi. Planowała bě gmejna z wudawkami 1,2 milionow eurow, kotrež buchu z 85 procentami spěchowali. Objektiwnych přičin dla je za čas wobnowjenja tójšto přidatnych wudawkow k tomu přišło. Na kóncu bě to 1,9 milionow eurow. Wulka bě nadźija, zo budu tež přidatne wudawki kaž kompleksne wotwodźowanje dešćikoweje wody abo kroma dróhi w połnym wobjimje spěchowane.
Podpěruja wohnjowoborny dorost
Radwor (chz/SN). Hižo loni kónc lěta załožichu w Radworju hromadźe z Chelnjanskej wotnožku nowy dźěćacy a młodźinski wotrjad tamnišeje wohnjoweje wobory. Wulki zajim dźěći a naprašowanja staršich běchu rozsud za to pohonjeli. Tak wudatej so hnydom dwě lěpšinje. Dźěći a młodostni maja zmysłapołnu zaběru we wólnym času, a aktiwny wotrjad wobory zaruči sej dorost do přichoda.
Zo pak móhli z wukubłanjom započeć, dyrbjachu tójšto spřihotować. Třo kameradojo dyrbjachu so na wohnjowobornej šuli w Narću wukmanić a sej trěbnu dowolnosć za dźěło z dźěćimi zdobyć. Dale zarjadowachu w Radworskej gratowni wosebitu rumnosć a wobstarachu wotpowědnu škitnu drastu kaž tež nastroje za zwučowanje w „dźěćacej wulkosći“.
Planowane je, zo dźěći a młodostni dwójce wob měsac zwučuja. Wukubłanje wopřijima teoretiske jednotki, ale tež praktiske zwučowanja, kaž kładźenje hadźicow za hašenje z wodu, wuchowanje pacientow a zašlahanje puća. K tomu přińdu wubědźowanja, při kotrychž móža so z druhimi woborami měrić. Tež zhromadne wulěty su předwidźane.
Na jězbnu dowolnosć dlěje čakać
Budyšin (SN/MWj). Při naležnosćach kołowokoło jězbneje dowolnosće dochadźa w Budyskim krajnoradnym zarjedźe tuchwilu k dlěšim čakanskim časam. Kaž z nowinskeje zdźělenki wottam wuchadźa, wudźěleja nětko nowe terminy hakle za kónc meje. Wina na tym jenož njeje, zo su sobudźěłaćerjo na koronu schorjeli. Předewšěm je winowatosć k změnje starych jězbnych dowolnosćow k hotowemu nawalej na wotpowědny wotrjad krajnoradneho zarjada wjedła.
Za změnu stareje papjerjaneje jězbneje dowolnosće na nowu Europskeje unije w formje šekoweje karty płaćeše dotal 19. januar 2022 jako posledni termin za lětniki 1953 do 1958. Tónle termin su nětko na 19. julij 2022 přestorčili. Přiwšěm maja sobudźěłaćerjo wokrjesa wjele dźěła. Wot aktualnje 30 000 jězbnych dowolnosćow dyrbja hišće 10 000 wobdźěłać. Hižo nětko je wotwidźeć, zo dyrbi zarjad dwójce telko padow wob lěto wobdźěłać kaž hewak. Kaž w zdźělence dale rěka, drje to hišće hač do lěća traje. Tele połoženje wuskutkuje so tež na wšitke dalše naležnosće w zwisku z jězbnej dowolnosću. Tak traje wupisanje dowolnosće za započatkarjow wo tójšto dlěje hač zwučene.
Serbscy seniorojo-kartyplacarjo zetkachu so wčera w Lejnje k ...
Nješćěpjenym njewupowědźa
Połoženje Wojerowskeho jězorinoweho klinikuma w času koronapandemije bě wčera jedna tema posedźenja tamnišeje měšćanskeje rady. Wone bu prěni raz jako livestream wusyłane.
Wojerecy (AK/SN). Koronowa pandemija lěkarjow a hladanske mocy we Wojerowskim jězorinowym klinikumje hižo měsacy dołho wulce poćežuje. To podšmórny wčera nawodnica hladanskeje słužby Birgit Wolthusen na posedźenju radźićelow města nad Čornym Halštrowom. Wolthusen kaž tež jednaćel klinikuma Mirko Papenfuß a šeflěkar dr. Heiko Sahre rozłožichu jim aktualne połoženje. „Koronapandemija je psychisce a mentalnje wulke wužadanje hladanskim mocam. Štož smy dožiwili, je naše předstawy přetrjechiło“, rjekny Birgit Wolthusen. „Naši sobudźěłaćerjo su wjele pacientow zemrěć widźeli. Druhdy samo štyrjoch do šesćoch wob dźeń. Mnozy z přistajenych wulce wo tym njerěča. Někotři chodźa na psychoterapiju, druzy poćežowanjow dla schorja.“
WuprajenjeUda Wićaza raznje šwikaja
Wuprajenja Budyskeho zastupowaceho krajneho rady Udo Wićaza (CDU) na póndźelnej demonstraciji k šćěpjenskej winowatosći strowotniskeho wobłuka wuwabja we wokrjesu, na runinje Sakskeje, ale tež Zwjazka wulku kritiku.
Budyšin (SN/BŠe). „Njeakceptujemy, zo k tomu namołwjeja prawo łamać“, wuzběhny sakski hospodarski minister Martin Dulig (SPD) po wčerawšim kabinetnym wuradźowanju nastupajo słowa Budyskeho zastupowaceho krajneho rady Uda Wićaza. „Wón ludźi nałži a jim sugeruje, zo móže sam rozsudźić, hač zakonske postajenja nałožuje abo nic“, Dulig rozłoži. „Tohodla zadźerženje Wićaza wótrje zasudźamy.“ Mjeztym je tež znate, zo ma Budyski krajny rada Michael Harig (CDU) stejišćo wo swojim zastupjerju sakskej krajnej direkciji zapodać.
Wčera je Udo Wićaz wozjewił, zo čuje so wopak zrozumjeny. Budyski wokrjes zakoń wo škiće před infekcijemi zwoprawdźi. „Přičiny zastaranskeje wěstoty dla, kotruž dyrbimy zaručić, pak njeje z dźensnišeho wida móžno sobudźěłaćerjam přistup do zarjadnišćow zakazać, a tak chcychmy jich strach pomjeńšić“, Wićaz wujasni.
Krótkopowěsće (26.01.22)
68 pacientow w chorownjach
Budyšin. W Hornjej Łužicy lěkuja korony dla tuchwilu 68 pacientow w chorownjach. Incidenca po Roberta Kochowym instituće je dźensa na 321,5 w Budyskim wokrjesu a na 332,9 w Zhorjelskim postupiła. Wokrjes Budyšin informowaše wčera wo 275 natyknjenjach z koronawirusom a wo dwěmaj smjertnymaj padomaj. We wokrjesu Zhorjelcu mějachu 230 infekcijow a třoch zemrětych w zwisku z koronu.
Dalša hospodarska pomoc
Drježdźany. Sakske krajne knježerstwo je dalšim hospodarskim pomocam puć runało. Kabinet schwali wčera wot hospodarskeho ministerstwa nastorčeny program „Korona-přiražka Sakska plus“, kotryž ma za mini-předewzaćelow, samostatnych a swobodnje skutkowacych dźěru zatykać. Přiražku financuja z krajnych srědkow, dotal njewužiwanych z loni nalěto zahajeneho programa za krute pady.
Wjace wěriwych w Čěskej
Policija (25.01.22)
Dwójce pod drogami z awtom jěł
Pěskecy. Njepowučomny bě předwčerawšim 43lětny muž, kotrehož zadźeržachu w Pěskecach. Test je pola njeho pozitiwnje na amfetaminy reagował, štož wunjese jemu pokutne jednanje. Na to dyrbješe wodźer Opela w Kamjenskej chorowni krej wotedać. Tam zastojnicy muža powučichu, zo tón dźeń hižo z awtom jězdźić njesmě. Jako woni chorownju wopušćichu, pak widźachu, zo 43lětny ze swojim Opelom wotjědźe. Tuž jeho znowa zadźeržachu a wozjewichu přećiwo njemu druhe pokutne jednanje.
Lětsa zaso wopominaja
Kamjenc. Wot lěta 1996 je 27. januar oficialny wopomnjenski dźeń za wopory nacionalsocializma. Tež w Kamjenskim wopomnišću Knježi doł je kóžde lěto wopomnjenska swjatočnosć. W zašłymaj lětomaj wšak dyrbješe wona korony dla wupadnyć. Zajutřišim, štwórtk, pak so tajke wopomnjenje zaso wotměje. Započatk budźe w 13.30 hodź.
Za swjedźeń so přizjewić
Pančicy-Kukow. Lětuši klóšterski a swójbny swjedźeń Budyskeho wokrjesa wotměje so 19. junija w klóštrje Marijinej hwězdźe w Pančicach-Kukowje. Za njón móža so towarstwa za kulturny program kaž tež wikowarjo za regionalne a přirodowe wiki přizjewić. Trěbne podłožki nadeńdu zajimcy na internetnych stronach klóštra (), wokrjesa (), gmejny Pančicy-Kukow (), Křesćansko-socialneho kubłanskeho skutka () a Sakskeho krajneho kuratorija za wjesny rum (). Najpozdźišo hač do 28. februara ma požadanje wotedate być. Na nadrobne prašenja wotmołwja mjez druhim sobudźěłaćerka kuratorija Sonja Hejdušcyna pod telefonowym čisłom 035796/ 971 30, e-mail .
Spěšnosć za wšěch wobmjezuja
