Něhdy sušili, naselili a zawarili
Budyšin (CRM/SN). Na zarjadowanje w rjedźe Kofej w třoch je Serbski muzej znowa minjenu srjedu přeprosył. Na blidźe přihotowany pak njeběše ke kofejej tónraz słódny pjekarski abo samopječeny tykanc, ale nakrate běchu wšelake družiny chlěba a k tomu sydaše butra, měd, marmelada a domjaca kołbasa. Tema kuratorki Andreje Pawlikoweje dźě bě „Naslědnosć w domjacnosći – sušić, naselić, zawarić“. Wona zwěsća, zo „wjele z něhdyšeho so dźensa zaso wožiwja“. K tomu nima dom wězo jenož eksponaty w swojim składźe. Wona składźe nowše knihi na blido a bě sej tohorunja swětłowobrazowy přednošk zdźěłała.
Krótkopowěsće (16.06.23)
Serbskaj redaktoraj mytowanaj
Zielona Góra. Mjez dobyćerjemi lětušeho Němsko-Pólskeho žurnalistiskeho myta Tadeusza Mazowieckeho je team rozhłosoweje redakcije MDR „Hej susodźe“. Redaktoraj Roman Nuk a Štefan Šmit staj myto zhromadnje z dalšimi pjeć kolegami w kategoriji „Nowe žurnalistiske formaty“ wčera w Zielonej Górje přijałoj.
Rjekojo abo mordarjo?
Praha. Čěscy filmowcy natoča film „Bratraj“ wo Mašínec dwójnikomaj. Tutaj staj započatk 1950tych lět w tehdyšej Čěskosłowakskej krawne wobrónjene spjećowanje přećiwo komunistiskemu režimej wjedłoj. Film měri so wosebje na Mašínec dyrdomdejske předobyće přez teritorij NDR hač do Zapadneho Berlina w lěće 1953. Jeju skutkowanje pak w dźensnišej Čěskej kontrowersnje posudźuja.
Španiska w finalu
Policija (15.06.23)
Z tanka ćěriwo kapało
Hodźij. Na statnej dróze S 111 w Hodźiju su sej policisća wutoru popołdnju nakładne awto bliže wobhladali. Při jězdźidle 61lětneho bě přidatny tank přitwarjeny. Z njeho ćěriwo kapaše. Při dokładnišim přepruwowanju zastojnicy zwěsćichu, zo bě tank wobškodźeny. Dalšu jězbu policisća mužej zakazachu. Wón ma nětko nanajspěšnišo defekt wotstronić dać. Policisća wodźerjej znajmjeńša dowolichu, hač do přichodneje zamkarnje jěć.
Dudy a přećeljo
Swoju wjes z projektomaj podpěrali
Serbscy rjemjeslnicy na zhromadnej wuprawje byli
Čłonojo Zwjazka serbskich rjemjeslnikow a předewzaćelow z předsydku Moniku Cyžowej kóždolětnje kubłansku wuprawu přewjeduja. Njeje to jenož kubłanska jězba, ale tež wutrobne zetkanje sobustawow. Woni so wobstajnje zetkawaja, nawjazuja nowe přećelstwa a wobstejace skrućeja a pohłubšeja. Stajnje knježi dobra atmosfera. Njedawno překwapi nas předsydka ze słódnej jědźu wonka w přirodźe a dožiwichmy zajimawy program wo nastaću briketow.
Kolesa transportowachmy ze swojimi awtami do Łaza. Wottam kolesowachmy do Hórnikec. Tam dožiwichmy zajimawostki wo nastaću briketow. Krosnowachmy na najwyši poschod bywšeje briketownje a wobdźiwachmy staw historiskeje techniki. Po tym swačachmy wonka w přirodźe.
Wot dźewjećich do dźewjećich
Kamjenc (SN/MWj). Wužiwarjo Kamjenskeje měšćanskeje biblioteki G. E. Lessing móža wotnětka tež zwonka personalnje wobsadźenych wotewrjenskich časow biblioteku wopytać. Zakład za to je z RFID (Radio-Frequency Identification) fungowacy system OpenLibrery. Ručež je wupokaz biblioteki wonka při terminalu scanowany, so durje wočinja, nawodnica biblioteki Marion Kutter zdźěli. Wužiwarjo móža knihi wróćić a sej nowe wupožčić, při kompjuteru rešeršować, dźěłać a ćišćeć abo tež kofej pić, časopisy čitać abo hry wuspytać. Tak móža zajimcy rumnosće wot póndźele do pjatka wot 18 do 21 hodź. a kónc tydźenja wot 9 do 21 hodź. wužiwać. Dyrbjało-li pak so něšto stać, hodźi so to z registrowanjom wosobow a widejowym wobstražowanjom zwěsćić.
Štóž chce wočinjenu biblioteku wužiwać, dyrbi znajmjeńša 16 lět stary być, płaćiwy wupokaz biblioteki měć a so za wužiwanje po swjatoku registrować dać. Zaměr přidatneho serwisa je, wotpowědować trěbnej fleksibiliće dźěławych a swójbow, na tamnym boku pak zaručić intensiwne wužiwanje měšćanskeje „bydlenskeje stwy“, kotraž chce biblioteka być.
Móža planować započeć
Přidatne klučowe připokazanki pobrachowacych dochodow dla dóstali
Njeswačidło (JK/SN). Wjesoła powěsć, kotraž Njeswačanskich gmejnskich radźićelow na jich posedźenju předwčerawšim překwapi, ma přičinu w snadnych dochodach gmejny. Kaž komornica Liliane Wetzko radźićelam wozjewi, dósta gmejna přidatnje 194 000 eurow klučowych připokazankow wot wokrjesa. Te su so gmejnje přizwolili na zakładźe jeje snadnych dochodow z přemysłoweho dawka a hladajo na jeje tuchwilnu napjatu hospodarsku situaciju. Přidatne srědki chce gmejna nałožować za přihoty nowotwara tamnišeje pěstowarnje. Zo móhli stajić próstwu wo spěchowanske srědki, je trěbne, přepodać planowanske nadawki za nowotwar. Te je gmejnska rada přepodała. Zwjeselace je, tak wjesnjanosta Gerd Schuster (CDU) rjekny, zo so tež susodna gmejna Bóšicy na projekće a na financowanju wobdźěli. Za štyri planowanske nadawki wudachu nimale 144 000 eurow, z čehož njese gmejna Bóšicy 34 000 eurow. Tutón podźěl wobliči so na zakładźe podźěla wobydlerstwa wobeju komunow.
Symjo ječmjenja ma čiste być
Bolborcy (SN/MiR). Žitnišća překwapja tuchwilu we wšelkich barbach, su zelene abo tež hižo nažołć barbjene. Tež w Bolborcach so barba ječmjenja wšědnje měnja. Na polu rosće družina Fascination, na čož taflička, kotraž je něhdźe dźesać metrow wot mjezy dróhi wosrjedź pola nastajena, pokazuje.
W ječmjenišću steji žona a wobhladuje sej jeho wonkowny wobraz. „Chodźu po kromje pola a na čarach, kotrež ratarske mašiny wujězdźa. Wšitke rostliny, kotrež tam njesłušeja, mam wućahnyć“, powěda Renate Gatner, „zorno ma čiste być, hdyž so žito młóći. Wšako so wone ratarjam za plahowanje w přichodnym lěće předawa.“ Ručež sobudźěłaćerjo Lejnjanskeho Hentzschelec předewzaća za plahowanje symjenja na syčomłóćawach přijědu, so wone žněje, po tym we wulkich halach składuje a schnyje, prjedy hač so měch po měchu předawa. Fascination pak njeje jenička družina ječmjenja, kotrež pola Hentzschelec plahuja. Na druhich honach dalše družiny rostu. Přidatnje přećahuje Renate Gatner tež cokorowu rěpu.
