Krótkopowěsće (12.01.23)
Łužica stolica kultury?
Choćebuz. Kulturna ministerka Braniborskeje, Manja Schüle (SPD), je swój namjet wobkrućiła, zo by so Łužica jako europska stolica kultury požadać móhła. Schüle: „Mamy wulkotnu kulturnu krajinu we Łužicy“, do kotrejež słuša tež „jónkrótne herbstwo Serbow“. W zwisku ze změnu strukturow něhdyšeho brunicoweho rewěra dźe wo to, „potenciale zwjazać a něšto nowe kreěrować.“
Prěnja indigena ministerka
Brasilia. W Brazilskej su prěnju indigenu ministerku w stawiznach kraja spřisahali. Sônia Guajajara nawjeduje wotnětka nowe ministerstwo za indigene ludy, kotrež je dobyćer wólbow, nowy prezident Lula, wutworił. Guajajara běše koordinatorka indigeneho třěšneho zwjazka Abip. Jeje spřisahanje dyrbjachu nadpada militantnych přiwisnikow něhdyšeho prezidenta Bolsonara dla přestorčić.
Hotuja so na jubilejny swjedźeń
Prěni wulki wjeršk za wjetšich a mjeńšich w běhu lěta
Přinošuja energijowej změnje
W Klětnom přetwarja nadróžne wobswětlenje na LED
Hamor (AK/SN). Energijowemu drustwu Perspektiwa Hamor tež Hamorska gmejna přistupi. Tole je předwčerawšim gmejnska rada jednohłósnje rozsudźiła. Komuna wuznawa so z tym k cilam towarstwa ze samsnym mjenom. Zaměr drustwa je, wobswětej přichilenu a po płaćiznje přijomnu milinu produkować. Hamorska gmejna ma so poněčim awtarkna komuna stać a so z milinu sama zastarać. „Tónle zaměr chcemy jako gmejna podpěrać“, praji wjesnjanosta Hendryk Balko (Wolerske zjednoćenstwo Hamor). Jako přinošk płaći gmejna symboliske 50 eurow.
7. decembra 2022 je 27 wobydlerjow energijowe drustwo załožiło. Do předsydstwa słušeja Helmut Perk, Christian Damian a Guido Ludwig. Drustwo chce přinošować, zo je region naslědny a wobswětej přichileny, rěka na internetnej stronje .
Dale předwčerawšim wobzamknychu, w Klětnom nadróžne wobswětlenje na LED-techniku přetwarić. Tole płaći něhdźe 120 000 eurow. Najwjetši dźěl toho Zhorjelski wokrjes spěchuje. Hamorska gmejna trjeba jeničce swójski podźěl 6 000 eurow płaćić.
Policija (11.01.23)
Kóčce pomhali
Wudwor. Jako pomocnicy w nuzy a přećeljo domjacych zwěrjatow su so předwčerawšim wječor policisća we Wudworju wopokazali. Kedźbliwy wobydler bě zastojnikam zdźělił, zo bě na hłownej dróze zranjenu kóčku wuhladał. Policisća přijědźechu, ale kóčku najprjedy njenamakachu. Hakle jako so woni z tak mjenowanej ćopłotnej kameru bliže rozhladowachu, woni zranjene zwěrjo zwěsćichu. Štyrinohača dowjezechu skótnemu lěkarjej. Komu kóčka słuša, dotal znate njeje.
Swój hodowny štom drje mnozy hišće w bydlenju maja, často ...
Šula budźe wulke wužadanje
Kaž w mnohich druhich gmejnach tež we Worklečanskej na spočatku noweho lěta hladaja, što su w zašłym docpěli. Nowy wjesnjanosta Clemens Poldrack widźi předewšěm jedne wužadanje.
Worklecy (SN/MWj). Lěto 2022 bě za Worklečansku gmejnu po měnjenju wjesnjanosty Clemensa Poldracka dobre lěto, w kotrymž su něštožkuli docpěli. „Naša pěstowarnja je dóstała nowe hrajkanišćo, w zakładnej šuli mamy nětko nowu rumnosć za ručne dźěło, našu internetnu stronu smy ponowili a we wobłuku wubědźowanja simul+ smy 100 000 eurow dobyli. Měnju, zo smy z tym na dźěło zašłych lět, jako bě mój předchadnik Franc Brusk wjesnjanosta, nawjazali a je pokročowali“, praji Poldrack.
Wot přichodneje póndźele nahubnik zbytny
Drježdźany (SN). Wot 16. januara winowatosć wužiwanja mediciniskeje maski w zjawnym wosobowym bliskowobchadźe w Sakskej wotpadnje. Dotalna winowatosć nahubnika so na nuzne doporučenje redukuje. Wotpowědnu změnu Sakskeho postajenja korony dla je statne knježerstwo wobzamknyło a wčera wozjewiło. Do toho bě so socialne ministerstwo z fachowčemi a ekspertami w strowotniskim stabje poradźowało. Kaž ministerka Petra Köpping zdźěli, „smědźa škitne naprawy přećiwo koronje jenož z přećeženjom strowotniskeho systema wopodstatnić“. Tuchwilu rysuja indikatory korony pozitiwny wobraz. Ze winowatosće nahubnika w zjawnym wobchadźe budźe nuzne doporučenje. Zdobom budu połoženje dale wobkedźbować, kaž na přikład nastupajo nowu omikronowu wariantu w USA. „Po potrjebje móžemy kóždy čas reagować.“
Krótkopowěsće (11.01.23)
Zwada wo „genderowanje“
Drježdźany. Po informacijach „MDR aktuell“ je konflikt „genderowanja“ na sakskich šulach dla mjez ministerstwom a dźěłarnistwom nastał. Rěčnik kubłanskeho ministerstwa je wobkrućił, zo stej dwudypk a hwěžka w němskim słowje po regulach prawopisny zmylk. Porno tomu poruča předsydka GEW Sakskeje wučerjam, „genderowanju“ njezadźěwać, to je wuraz „diwersneje towaršnosće“.
Wubědźowanje wuwołane
Rakecy. Towarstwo k wuwiću Hornjołužiskeje krajiny hole a hatow (OHTL) je dźensa wubědźowanje wuwołało, zo by skutkowanje zapisanych towarstwow w regionje OHTL podpěrało. Skrućić chce z tym čestnohamtski angažement a začuće regionalneje zhromadnosće. Towarstwa móža so ze swojimi projektami wo mytowanski pjenjez cyłkownje 25 000 eurow hač do 9. měrca požadać.
Pytaja koncepciju za horu Říp
Policija (10.01.23)
Dalše awta wobškodźene
Kubšicy. Hižo spočatk noweho lěta dyrbješe so policija w Kubšicach z wjacorymi wobškodźenymi wosobowymi awtami zaběrać. Njeznaći běchu najskerje na silwesterskim kóncu tydźenja do nich ze šrotowymi kulkami třěleli, kaž so wone za hońtwu pjerizny wužiwaja. W běhu přepytowanjow so wukopa, zo bě tež wikowar awtow we wsy wot tohole njeskutka potrjecheny. Dohromady nasta na jědnaće wobškodźenych awtach něhdźe 30 000 eurow škody. Policija pyta nětko swědkow, kotřiž su wokoło silwestra něšto podhladneho w Kubšicach wobkedźbowali (tel. 03591 35 60).
Do šule dale inwestuja
Stabilne financy sobu najwažniši lońši wuspěch
Rakecy (JK/SN). Zo steji Rakečanska gmejna na jara krutym a solidnym financnym zakładźe je po słowach tamnišeho wjesnjanosty Swena Nowotneho (CDU) najwažniši wuspěch lěta 2022. Na tajkim zakładźe je so znowa poradźiło, nastajić dwójny hospodarski plan za lěće 2023 a 2024. Wobsah plana pak je po měnjenju wjesnjanosty njewěsty a wotwisuje we wulkej měrje wot dalšeho wuwića hospodarstwa a towaršnosće, w prěnim rjedźe w Němskej samej a cyle konkretnje w gmejnje Rakecy. Jenož z wurunanymi dochodami a derje wobličenymi wudawkami hodźa so naročne zaměry hospodarskeho plana za přichodnej lěće docpěć. Wot krajnoradneho zarjada w Budyšinje nimaja hišće zelenu swěcu abo stejišćo k zapodatemu naćiskej plana. Hladajo pak na připowědźene zwyšenje wokrjesneho wotedawka Nowotny za wšitke pozicije plana njerukuje.
