Wjele zabawy a wjesela knježeše minjeny kónc tydźenja na wjesnym ...
Wjace wopytowarjow do hrodźišća přiwabić
Raduš (PB/SN). Wjace hač 20 lět mjeztym tomu je, zo smědźeše Dieter Weißhahn, tehdy wjesnjanosta hišće samostatneje gmejny Raduš a čestny čłon jubilejneho zarjadowanja, posledni hozdźik do hrubeho twara słowjanskeho hrodźišća w Radušu zabić. Měsacy pozdźišo, 28. meje 2003, objekt oficialnje wotewrěchu. Z wulkej zjawnej a medialnej kedźbnosću tehdyša braniborska ministerka za kulturu a wědomosć Johanna Wanka znowa natwarjene hrodźišćo přepoda. Wot nowinarjow wulce chwalene, dožiwi hrodźišćo spočatnje hoberski nawal wopytowarjow. Lěta po tym je so ličba zajimcow pola něhdźe 50 000 wob lěto stabilizowała. „To njeje špatny wuslědk. Za porjadnu bilancu dochodow pak to njedosaha“, rjekny Wětošowski měšćanosta Bengt Kanzler. Zo by Radušanske hrodźišćo dale wobstało, chcedźa atraktiwnosć z kulturnymi poskitkami dale zwyšić. Tak chcedźa ličbu wopytowarjow na wjace hač 70 000 stopnjować. Trěbna je přiwšěm dalša pjenježna pomoc wokrjesa a Braniborskeje, Kanzler rjekny. Zo njeje žadyn zastupnik wokrjesa a kraja na zarjadowanje do Raduša přichwatał, je jemu špatne znamjo.
Krótkopowěsće (27.06.23)
Wjace fachowcow přiwabić
Drježdźany. Po słowach Geerta Mackenrotha (CDU), sakskeho społnomócnjeneho za wukrajnikow, dyrbi swobodny stat na swojim imagu dźěłać a wotewrjeniši być, zo by wjace fachowcow do kraja přiwabił a z tym wuwiwanje hospodarstwa podpěrował. „Z dźěćimi, kotrež so pola nas narodźa, to hižo móžne njeje“, praji wón powěsćerni dpa.
Počesći zasłužbnu Bórkowčanku
Podstupim. Braniborski ministerski prezident Dietmar Woidke (SPD) počesći dźensa sydom wosobinow ze zasłužbowym rjadom kraja Braniborskeje. Mjez nimi je Bórkowčanka Lydija Budischin. Dołholětna kantorka Bórkowskeje wosady swjeći wot lěta 2021 tež kemše a organizuje wosadne žiwjenje. Nimo toho nawjeduje chóry a instrumentalne skupiny.
Dźěłaja nětko po tarifje
Hypothyreoza pola psa so pomału wuwiwa
Nic jenož na wsach, ale tež w městach maja mnozy domjacy skót. Něchtóžkuli nimo toho drobny skót plahuje. Wšitcy so wo strowotu swojich dwu- abo štyrinohatych lubuškow prócuja. K tomu přinošować chce naša serija z pokiwami z weterinarneje mediciny. (9)
Tarčowa žałza (něm. Schilddrüse) hraje za mnohe wotběhi metabolizma wažnu rólu. Wona produkuje mjez druhim hormonaj ćěła T3 a T4, kotrejž wobwliwujetej róst a funkciju organizma.
Hypothyreoza nastawa, hdyž njeje wotběh přeměny maćiznow w ćěle prawy. Přičina tči w njedosahacej produkciji abo zastaranju bańkow ćěła z hormonami tarčoweje žałzy.
Defekty nastanu pak na runinje hypothalamusa abo hypofyzy (dźělej mozow, kotrejž sćeletej aktiwowace maćizny k tarčowej žałzy, zo by wona produkowała) abo škodow direktnje w tarčowej žałzy dla.
Wosebje primarna hypothyreoza je často forma pola psow, zwjetša wot něhdźe 7. žiwjenskeho lěta. Při tym zawinuja swójske antijowe dźělčki wottwar hormonow T3 a T4. Po tym dóńdźe k formje zahorjenja tarčoweje žałzy. Włoknina so wottwari a zhubi funkciju produkcije hormonow.
Spěwny a hudźbny dorost zahorił
Z lěsom kedźbliwje wobchadźeć
Lěsne młodźinske hry šulerjow za přirodoškit sensibilizowali
Tři Žony (AK/SN). Lěsnistwowy wobwod Hornja Łužica statneho zawoda Sakski lěs je njedawno do třoch Žonow přeprosył. Tam je so něhdźe 200 zakładnych šulerjow na lěsnych młodźinskich hrach wobdźěliło. Mjez druhim so jich Malešanski rewěrowy hajnik Enrico Mähl prašeše, kotre lěsne zwěrjo drje je najstrašniše. Holcy a hólcy Wulkoždźarowskeje zakładneje šule „Při Hórnikečanskim jězoru“ měnjachu, zo stej to snano wjelk a mjedwjedź. Najstrašniši pak je klěšć, Enrico Mähl rozłoži, dokelž móže strašne chorosće přenjesć. Tohodla dyrbjeli wšitcy kedźbować, zo klěšć nikoho njekałnje. Tež rozdźěl mjez sornu a jelenjom kaž tež mjez pólnym zajacom a dźiwim nuklom hajnik dźěćom rozłoži.
Policija (26.06.23)
Wobšudnistwo so njeporadźiło
Zemicy-Tumicy. We wotnožce Budyskeje wokrjesneje lutowarnje w Zemicach-Tumicach je minjeny pjatk formular za přepokazanku dóšoł, z kotrymž měješe so 39 000 eurow wot firmoweho konta přepokazać. Přistajenym bě to podhladne, tak zo woni firmu zazwonichu. Při tym so wukopa, zo bě mjenowany formular sfalšowany. Pjenježna škoda tuž na zbožo žana nastała njeje.
Za bus na festiwal so přizjewić
Chrósćicy. Na program folklorneho festiwala pjatk, 7. julija, w Hochozy pojědźe z Hornjeje Łužicy bus. Wón wotjědźe w 17.15 hodź. z Radworja a w 17.30 hodź. z Chrósćic. Domoj wotjědźe bus w 23.30 hodź. Zajimcy měli so hač do 30. junija w regionalnym běrowje Domowiny w Chrósćicach pod telefonowym čisłom 035796 96254 přizjewić. Jězba płaći dźesać eurow na wosobu.
Radźićeljo wuradźuja
Pančicy-Kukow. Přichodne posedźenje zhromadźizny zarjadniskeho zwjazka Při Klóšterskej wodźe wotměje so jutře, wutoru, w 19 hodź. w sydarni twarjenja zarjadniskeho zwjazka w Pančicach-Kukowje. Mjez druhim póńdźe wo wobsadźenje dźěłoweho městna we wobłuku twarskeho zarjadnistwa. Zajimcy su wutrobnje witani.
Plesternaki so zminu
Hórki. Twarskich dźěłow dla budźe wokrjesna dróha K 9236 wot Hórkow do směra na statnu dróhu S 101 w času wot 10. julija hač dosrjedź awgusta dospołnje zawrjena. W tym času tam plesternaki wotstronja a puć z asfaltowej worštu pokryja, kaž krajnoradny zarjad zdźěli.
Z busom do Krupki
Nad hłowami druhdy zynčało
Pančicy-Kukow (SN/MWj). Předewšěm za swójby z dźěćimi mysleny bě wčera swójbny a dźěćacy swjedźeń Domowinskeje skupiny Pančicy-Kukow na Kukowskim hrodźišću. Mjeztym wjacore lěta jón skupinarjo na přitulnym městnje pódla Emawskeho domu wuhotuja a wothłós je z kóždym lětom wjetši. Byrnjež wčera na wjacorych městnach kaž w Radworju, Nowej Wjesce, Smjerdźacej a druhdźe zabawne zarjadowanja byli, je wjace hač 60 ludźi na Kukowske hrodźišćo přichwatało, z Pančic runje tak kaž z wokolnych wsow. Wšitkich witała je čłonka skupiny Alena Hiccyna.
