Krótkopowěsće (05.09.23)
Pilotowy projekt
Drježdźany. 30 šulow po cyłej Sakskej móže so na pilotowym projekće „strowota wučacych“ wobdźělić. Krajny zarjad za šulu a kubłanje (LaSuB) a Centrum za zdźěłanje wučacych a šulske slědźenje (ZLS) Lipšćanskeje uniwersity poskićujetej bjezpłatne kursy wo kedźbnosći z wědomostnej ewaluaciju. Hač do srjedź oktobra móža so šule za projekt požadać.
Serbska změna strukturow tema
Wojerecy. Na přeprošenje Pětra Brězana, referenta Domowiny za hospodarske a infrastrukturelne naležnosće, su so dźensa we Wojerowskim domje třěšneho zwjazka nošerjo serbskich projektow z cyłeje Łužicy schadźowali, kotrež su w ramiku změny strukturow spěchowane. Zaměr stej, tak Brězan, wuměna nazhonjenjow a dorěčenje kooperacijow.
Turistiska čara za bosy běhacych
Dohlad do temy wučisćenja – Hdy a kak, a scyła, čehodla?
Nic jenož na wsach, ale tež w městach maja mnozy domjacy skót. Něchtóžkuli nimo toho drobny skót plahuje. Wšitcy so wo strowotu swojich dwu- abo štyrinohatych lubuškow prócuja. K tomu přinošować chce naša serija z pokiwami z weterinarneje mediciny. (14)
Wučisćenja (Kastration) su zwjetša najčasćiše operacije w skótnolěkarskej praksy. Zakonsce słuži při tym zasada: njekontrolujomnemu rozmnoženju skotu zadźěwać. Jedna z prěnich přičin wobsedźerjow skotu pak je, zo nochcedźa prosće dalši dorost psa, kóčki, nukla atd.
Štóž doma nukle kormi, sčini sej wěcku lochku. Přepruwuje pola jednotliwcow splah a rozrjaduje muske a žónske nukle na jednotliwe pukloty. Tam, hdźež smědźa sej pleńčatka-dźěći puklot dźělić, dyrbi zwjetša muski nukl pod nóž, zo njeby so „njezbožo“ stało. Někotryžkuli nukl móže mjenujcy samo hižo po štwórtym žiwjenskim měsacu splažnu zrałosć docpěć.
Zwjazkarjo mjez Łužicu a Beninom
Biskopicy/Njebjelčicy (SN/MiR). Biskopičanski Goethowy gymnazij wudźeržuje styki do města Ouidah we Beninje. Zašły tydźeń je wottam delegacija we Łužicy přebywała. Wjeršk zetkanja běše podpisanje šulskeho partnerskeho zrěčenja. „Smy so na partnerstwo na samsnej runinje měrili, kotrež w dobrej mjezsobnej harmoniji namakamy. Tamniši šulerjo wuknu němsce a naši francosce. To je zakład přećelskeje komunikacije“, rjekny Bodo Lehnig, nawoda gymnazija w Biskopicach. Jeho kolega Alfred Kounde, nawoda powšitkownje kubłaceje šule 1 Bertrand d’Agnon w Ouidah zwurazni: „Zwěsćamy, zo maja młodostni samsne zajimy. Začuwamy, zo chcedźa sej woni swět wotkryć. To je za mnje dobry zakład žiweho partnerstwa, z kotrehož změja přichodne generacije prawy wužitk.“
Policija (04.09.23)
Při nurjenju znjezbožił a zemrěł
Hórki. Tragiske njezbožo při nurjenju je so sobotu dopołdnja w Hórčanskej skale stało. Tam bě skupina pólskich nurjakow we wodźe, jako so 52lětny muž nadobo ze strowotniskimi problemami bědźeše. Druzy jeho z wody wućahnychu a wožiwić započachu. Wuchowanske mocy dowjezechu jeho z helikopterom do chorownje. Tam muž krótko na to zemrě. Kriminalni technikarjo techniske wuhotowanje nurjaka přepytuja.
Na štwórć lětstotka zhladowali
Smječkečanski wjesny klub 25. róčnicu ze swjedźenjom woswjećił
Smječkecy (JK/SN). Wo čiłe a wotměnjace wjesne žiwjenje stara so w Smječkecach nimo wohnjoweje wobory tež tamniši wjesny klub. Tón je minjeny kónc tydźenja z wulkim swjedźenjom swoje 25lětne wobstaće woswjećił.
Po tym zo su pjatk wječor piwo natočili, je Marlis Kralowa, kotraž bě wjele lět předsydka wjesneho kluba „Při winowej horje“, před mnohimi wjesnjanami předstajiła stawizny kluba. Wot spočatkow na něhdyšim Cyžec kuble hač do přitomnosće ćehnješe so podawk po podawku a wjele rjanych dopomnjenkow so wukulichu. Přednošk bě tež zakład za přizamknjenu zabawu a rozmołwu w stanje. A byrnjež so wonka dešćowało, w stanje knježeše swjedźenska atmosfera, kotraž so hač do njedźele dale njeseše.
Sobotu popołdnju pokazachu młodźi Smječkečanscy wohnjowi wobornicy, što wšitko zdokonjeja. To wunjese jim připóznaće wjesnjanow a hosći. Do toho pak běchu so při sporće w pěsku tak prawje sćoplili a sej trěbnu kondiciju nadźěłali. Wječor hibachu so potom po zynkach skupiny SerBeat na rejach při dale dobrej zabawje.
Festiwal w starym měsće wuspěšny
Budyšin (CS/SN). Něhdźe runje telko wopytowarjow je kónc tydźenja na staroměšćanski festiwal do Budyšina přišło, kaž ma sprjewine město wobydlerjow, mjenujcy wjace hač 35 000, zdźělichu organizatorojo wčera k zakónčenju pisaneho zarjadowanja. Na hasach kołowokoło Hrodu knježeše na wšitkich dnjach dobra nalada.
Połny napjatych dźěći bě pjatk Glawšec dwór w Róžeńće, jako ...
Krótkopowěsće (04.09.23)
Gasterstädt naslěduje Koarka
Halštrowska Hola. Antje Gasterstädt budźe nowa wjesnjanostka gmejny Halštrowska Hola a naslěduje wjelelětneho mějićela zastojnstwa Dietmara Koarka. Kandidatka CDU je při wčerawšich wólbach 66,7 proc. płaćiwych hłosow docpěła. Jako samostatny požadar je Hannes Smohar na 33,3 proc. hłosow přišoł. Wólbne wobdźělenje běše z 63 proc. wo wjele wyša hač 2016 z 38,9 proc.
Elektromištra wuznamjenili
Drježdźany/Budyšin. Za swoje wurjadne zasłužby we wobłuku rjemjesła na wuchodźe Sakskeje je Drježdźanska rjemjeslniska komora Budyskeho elektromištra Franka Šołtu wuznamjeniła. Na swojim tradicionalnym lěćnym zeńdźenju minjeny štwórtk w Załomju je jemu prezident komory Jörg Dittrich złotu čestnu jehłu přepodał.
„Lětopis“ online a zadarmo
Modla so kadiš
Budyšin. Wot lěta 1990 přeprošuje Hans-Eberhard Kaulfürst stajnje prěnju njedźelu septembra modlić so kadiš na Budyskim židowskim pohrjebnišću na Mužakowskej dróze. Dalše tajke zarjadowanje wotměje so tam njedźelu, 3. septembra, w 17 hodź. Z nutrnosću wopominaja zamordowanych Budyskeje židowskeje wosady. Mužojo njech njezabudu na čapku.
Za rězbarjenje so přizjewić
Žuricy. Spěchowanski kruh za serbsku ludowu kulturu přewjedźe pod nawodom Alojsa Šołty w Žuricach rězbarsku dźěłarničku wot pjatka, 15. septembra, popołdnju hač do soboty, 16. septembra, wječor. Wobdźělnicy móža swójske ideje zwoprawdźić kaž tež małe reliefy ze wšelakimi motiwami zhotowić. Te hodźa so do přihotowanych swěčnikow ze starych hrjadow zasadźić, štož móhło dar k hodom być. Zajimcy njech so pola spěchowanskeho kruha pod telefonowym čisłom 03591/ 550 108, e-mailnje pod abo pola Alojsa Šołty pod 0172 916 94 55 přizjewja.
Z krajnym radu rěčeć
Policija (01.09.23)
Awto přećiwo mopedej
Worklecy. Na křižowanišću pola Worklec do směra na Smječkecy je předwčerawšim k zražce mjez wosobowym awtom a mopedom dóšło. 56lětny wodźer VWja je tam z Worklec přijěł a chcyše přez křižowanišćo do Smječkec. Při tym njewobkedźbowaše wón wotprawa přijěduceho 17lětneho wodźerja mopeda a do njeho zrazy. Młodostny so při tym ćežko zrani. Wuchowanske mocy dowjezechu jeho do chorownje. Při zražce nasta něhdźe 7 000 eurow škody. Wobchadna słužba Zhorjelskeje policajskeje direkcije so z tym padom nadrobnišo zaběra.
