Radźićeljo wuradźuja
Róžant. Popłatki staršich za zawodowe wudawki Ralbičanskeje pěstowarnje budu jedna z temow přichodneho posedźenja gmejnskeje rady Ralbic-Róžanta jutře, štwórtk, we 18.30 hodź. w sydarni Róžeńčanskeho gmejnskeho zarjadnistwa. Dale zaběraja so radźićeljo z wustawkami wo zarunanju čestnohamtskeje dźěławosće a z wustawkami wo wotškódnjenju wohnjowych wobornikow. Nimo toho póńdźe wo plan potrjeby wohnjoweje wobory.
Campus na dwórnišću
Radwor. Staršiska iniciatiwa Radwor přewjedźe w druhim tydźenju nazymskich prózdnin na bywšim Radworskim dwórnišću nazymski campus. Mysleny je wón za šulerjow wot 1. lětnika. Wot 9. hač do 13. oktobra chcedźa so tam wšědnje wot 9 do 15 hodź. pod serbskim fachowym nawodom z přirodu a zwěrjatami w nazymje zaběrać, slědźić, eksperimentować, paslić, warić, pjec a wjele wjace. Přinošk płaći dźesać eurow na dźeń za zastaranje a material. Zajimcy njech přizjewja so pola Diany Mejnoweje pod telefonowym čisłom 035935/ 219 862 abo e-mailnje pod . Pjatk, 14. oktobra, přewjedu dźěłarničku za wudźenje. Městna pak su hižo wšitke wobsadźene.
Za biblioteku w přichodźe płaćić
Policija (04.10.23)
Zbožo w njezbožu měł
Kamjenc. Wichor je wčera wječor w Hornjej Łužicy wjacore štomy powalił a tak škodu načinił. Kedźbliweho jandźela pěstona měješe po wšěm zdaću šofer w Kamjencu. Wosrjedź jězby padny štom na jeho wosobowe awto. Kaž z dźiwom so muž njezrani. Zhorjelska policajska direkcija zliči w běhu dweju hodźin 13 zasadźenjow. Zwjetša dyrbjachu wohnjowi wobornicy štomy rumować.
Wojerowska Janska wosada je minjenu njedźelu w swojej cyrkwi ...
Sceniske wurězki, model wirusa a „Sprjewine wrota“
Budyšin (CS/SN). Tradicionalnje wuhotowachu na dnju Němskeje jednoty w Serbsko-němskim ludowym dźiwadle dźeń wotewrjenych duri. Hladajo na 20lětne wobstaće Dźiwadła na hrodźe wotměwaše so zarjadowanje na Budyskim Hrodźe. Něhdźe 3 000 Budyšenjo a Budyšanki kaž tež dalši hosćo wužichu składnosć, rozhladować so za kulisami klankodźiwadła abo po hrodowej wodarni. Tam móhł w přichodźe – jeli měšćanska rada tole w oktobrje wobzamknyła – móst přez Sprjewju kónčić, kotryž Hrodźiško a Hród zwjazuje. Techniski nawoda klankodźiwadła Martin Suschke wotpowědne plany rozłoži. Nimo toho móžachu so wopytowarjo tež z pomocu wizualizacijow wo projekće „Sprjewinych wrotach“ wobhonić.
Wězo čakachu na hosći tež wurězki z nowych inscenacijow aktualneje hrajneje doby NSLDź. Ze sceniskim čitanjom předstajištaj mjez druhim Julia Klingnerec a Jurij Šiman němskorěčnu hru „Schierzens Hanka“. Samo do přichodneho lěćneho dźiwadło pod hołym njebjom podachu dohlad: Katja Reimann a Torsten Schlosser čitaštaj wujimki ze scenarija „Spuk unterm Riesenrad“.
Krótkopowěsće (04.10.23)
Fyzikarjo wuznamjenjeni
Stokholm. Direktor Mnichowskeho Maxa Planckoweho instituta za optiku kwantow Ferenc Krausz, Anne L’Huillier ze šwedskeje uniwersity Lund a Pierre Agostini z Ohio State University su lawreaća lětušeho Nobeloweho myta za fyziku. Wuznamjenjenje spožča jim za „wuwiwanje metodow za přepytowanje procesow w atomach a molekulach, kajkež so w běhu attosekundy – trilionowym dźělčku sekundy – wotměwaja.“
Sudnistwo wusud wozjewiło
Budyšin. Po lěta dołhej prawniskej zwadźe w zwisku ze sypnjenymi byrgarskimi domami w Budyskim nutřkownym měsće je Drježdźanske Wyše krajne sudnistwo minjeny štwórtk wusud wozjewiło. Tak dyrbi twarske předewzaće Strabag mějićelej historiskich domow na Nutřkownej Lawskej znajmjeńša 800 000 eurow wotškódnjenja zapłaćić.
W mjeńšinowych rěčach wěrować
Domchowanka je z dźakom zwjazana była
Policija (02.10.23)
Keramiku pokradnyłoj
Wjazońca. Hornčerske wiki minjeny kónc tydźenja we Wjazońcy njejsu jenož lubowarjow keramiki přiwabili, ale tež paduchow. W nocy na njedźelu staj tam mužej ze zamknjeneho předawanišća keramiske wudźěłki w hódnoće 85 eurow spakosćiłoj. Sobudźěłaćer wěstotneje słužby je jednoho z njeju dosahnył a policiji přepodał. Tamny najprjedy ćekny. Policisća pak jeho pozdźišo tohorunja wuslědźichu.
Kniharnja zawrjena
Kermušu swjeća w cyrkwi
Wosadni so za twarski staw Chróšćanskeje cyrkwje wulce zajimowali
Chrósćicy (SN/MWj). Hišće je Chróšćanska cyrkej nutřka wulke twarnišćo. W předrumje leži material elektrikarjow, w cyrkwi steja ponowjene ławki prěki a podłu, hdźež maja na sćěnach raz čisłowe tafle wisać su hišće dźěry a wótřerěčaki su z foliju zawodźěte. Takle je něhdźe 150 wosadnych wčera popołdnju swój Boži dom dožiwiło. Farar Měrćin Deleńk a architekt Marko Dźisławk staj zajimcow do cyrkwje prosyłoj, zo byštaj jim tuchwilny staw twarskich dźěłow a předewšěm přičiny noweho wuhotowanja Božeho domu rozłožiłoj. Moderěrowała je informacisku hodźinku Bogna Korjeńkowa.
