Krótkopowěsće (26.07.24)
Ochranow swětowe herbstwo
Drježdźany/Neu Delhi. Komitej za swětowe herbstwo UNESCO je twarjenja bratrowskeje wosady w Ochranowje, Bethlehemje (USA) a Gracehill (Irska) do lišćiny swětoweho herbstwa přiwzał. Tak nasta zhromadnje z twarjenjemi w Danskej hranicy překročace herbstwo. Ochranow je třeće městno swětoweho namrěwstwa w Sakskej. Sakski ministerski prezident gratulowaše wutrobnje k rozsudej. Na rozsudnej zhromadźiznje bě tež sakska delegacija wobdźělena.
Herbert póńdźe Bayeram
Mnichow. Gordon Herbert přewozmje po swojim skutkowanju jako zwjazkowy trenar Němskeje a docpěćom titla swětoweho mištra zastojnstwo šefoweho coacha basketbuloweho mustwa FC Bayern Mnichowa. 65lětny Kanadźan je zrěčenje hač do lěta 2026 podpisał. To wozjewichu Mnichowčenjo do olympiskich hrow, na kotrychž Herbert němske narodne mustwo trenuje.
Kerber po olympiadźe přestanje
Policija (25.07.24)
Njezbožo z ćežko zranjenymi
Spytecy. 38lětna šoferka awta typa Opela běše na hłownej dróze wot Hodźija do směra Spytec po puću a zjědźe z dotal njeznatych přičin 70 metrow před Spytecami na napřećiwnu čaru. Tam storči frontalnje do přichadźaceho awta marki Peugeot. Šoferka Opela a sobujěducej holcy w starobje 5 a 10 lět kaž tež šoferka Peugeota so ćežko zranichu a dyrbjachu do chorownje. Wěcna škoda na jězdźidłomaj wučinja něhdźe 32 000 eurow. Policija prosy swědkow njezboža, jej dokładniše informacije telefonisce zdźělić a to pod čisłom: 03591-3670.
Zahrodka talentow
Smjerdźaca. Serbske kubłanske srjedźišćo LIPA, wjesna rada, wohnjowa wobora a Smjerdźečan młodźina přeprošuja wutrobnje na Zahrodku talentow a to njedźelu, 28. julija, wot 15 hodź. do kulturneho domu w Smjerdźacej na kofej, tykanc a čerstwe napoje. Nimo toho překwapi kuzłar Alexander Čornak ze swojimi činkami.
Nětko hižo kartki kupić
Budyšin. Hač do adwenta drje je hišće chwile. Tola w Budyšinje su nětko hižo kartki za swjatočny adwentny koncert, 1. decembra, w Budyskej Krónje na předań. Kóžde lěto znowa wšak su městna na Hody Wienskich operetow jara spěšnje wuknihowane. Ansambl wuměłcow Praskeho narodneho dźiwadła wustupi tu lětsa hižo šěsty raz. Nimo moderatora skutkuja na jewišću třo solisća, šěsć baletnych rejowarjow a rejowarkow kaž tež komorny orchester z dwanaće hudźbnikami sobu. Kartki skazać móžeće telefonisce pod čisłom 03591-49505020 abo online pod www.reservix.de.
Na serbske škotowanje
Woswjeća 35. róčnicu wobstaća
Drustwo „Nowa forma“ w Židźinom
We łužiskich wsach běchu stajnje hižo najwšelakoriše rjemjesła zakótwjene a su so zdźěla lětstotki zachowali. Dźensa je so wulki dźěl z tychle rjemjesłow bohužel pozhubił. W našej lětnjej seriji chcemy wobswětlić, hdźe běchu kotre rjemjesła doma a kotre wosebitosće su so při tym wobkedźbowali. (14)
Židźino ze swojimi 550 wobydlerjemi je wot lěta 1995 jedyn z dźewjeć wjesnych dźělow gmejny Halštrowska Hola. Hižo lěto do toho je so dźensa 77lětna Edith Jaegerowa započała dokładnje ze stawiznami něhdy ryzy serbskeje wsy sewjernje Wojerec zaběrać.
Dwě generaciji w prózdninach
Prózdninski poskitk za dźědow a wowki z wnučkami jara spomóžny był
Smjerdźaca (aha/SN). Wčera zakónči so w Smjerdźečan kulturnym domje třidnjowski prózdninski poskitk za wowki a dźědow z wnučkami. Kubłanske srjedźišćo LIPA w nošerstwje Serbskeho šulskeho towarstwa (SŠT) je so wo organizaciju dnjow postarało. Poskitk žněješe pola dźěći runje tajke připóznaće kaž jich swojich wo dwě generaciji staršich přewodnikow. Wosebite hódnoćenje nańdźe cyłkownje zapołoženy wotběh, při kotrymž so wažnosć na to kładźeše, zo narodne a nabožne kubłanske wusměrjenje jednotu tworitej. To njewopokaza so jenož z wopytom cyrkwje klóštra Marijineje hwězdy a wodźenjom rjadniskeje sotry Tadeje, ale tež w tym, zo je so kóždy dźeń z nabožnym zhromadnym spěwom zahajił. Tež na paćer do jědźe so zabyło njeje.
Njewšědny ratarski muzej
Wulke a mjeńše muzeje, domizniske stwy a njewšědne wustajenišća zbližuja zajimcam zajimawostki najwšelakorišeho razu. Z lětušej lětnjej seriju někotre z nich kaž tež za kulisami skutkowacych akterow předstajamy. (3)
Łomsk (SN/MiP). Dwaj kilometraj zapadnje Njeswačidła, we Łomsku čo. 2, steji wosrjedź wsy rjany, ponowjeny štyristronski statok swójby Panachec. Tu chowa so mały ratarski muzej. „Chwal moja duša knjeza a štož je we mni, jeho swjate mjeno! Chwal moja duša knjeza a njezabudź jeho dobroty!“ Na dwór přišedši, wuhladaš tutej serbskej sadźe z biblije, z psalma 103, kotrejž stej do granitowych wudwjernow chěžinych duri zadypanej. „Statok bě mój prapradźěd natwarił a čas žiwjenja je tu jako ratar dźěłał. Generacije po nim su wšitke z ratarstwom pokročowali“, powěda 69lětny hospodar Manfred Panach. Wón drje bě powołanje ćěsle za nutřkowny wutwar nawuknył, ale z nanom Měrćinom je, po tym zo bě murja padnyła, hač do kónca 90tych lět nimo swojeho powołanskeho dźěła dale ratarił.
Krótkopowěsće (25.07.24)
Klóšter bórze bjez knježnow
Budyšin/Drježdźany. Klarisy wopušća ke kóncej septembra swój klóšter w Budyšinje. Wo tym informuje dźensa biskopstwo Drježdźany-Mišno na swojej internetnej stronje. Přičina za to běchu njerozrisajomne konflikty mjez rjadnicami. Rozžohnowanska Boža mša budźe 10. awgusta. Biskopstwo nětko pruwuje, hač by so druhi rjad abo duchowna zhromadnosć za klóšter zajimowała.
Myto za jónkrótnu poeziju
Drježdźany. Angela Krauß je z lawreatku lětušeho Literarneho myta Sakskeho statneho ministerstwa za wědomosć a wuměłstwo. Wona wuznamjeni so za „cyle singularnu literaturu“, z kotrejž „přitomnosć ze subwersiwnymi srědkami poezije přepytuje“. Myto je z 10 000 eurami dotěrowane a ma so z Kamjenicy pochadźacej awtorce „nazymu w Lipsku“ přepodać.
FDP: Wupadej wučby zadźěwać
Pokiwy, kak sej nowe wjesne hrajkanišćo stworiš
Mnozy starši maja wulke přeće: Měć hrajkanišćo w swojej wjesce. We Wěteńcy su sej tute přeće zwoprawdźili a dźěćom „swójski raj“ darili. Iniciatorojo, mjez kotrymiž je André Hicka, su při tym tójšto nazhonjenjow nazběrali a móža nětko druhim pokiwy dawać.
Policija (24.07.24)
Spěšnosć kontrolowali
Zhorjelc. Na awtodróze A4 na směr Zhorjelc je wobchadna policija při parkowanišću Lubata póndźelu popołdnju předpisanu spěšnosć 80 km/h kontrolowała. W běhu šěsć hodźin je dohromady 4 068 jězdźidłow přepruwowała. 519 z nich běše jasnje přespěšnje po puću. 153 skućićelow je pjenježnu pokutnu na městnje zapłaćiło, 366 šoferow dóstanje bórze póštu wot zarjada za pokutne pjenjezy. Negatiwny rekord je wodźer Mercedesa ze spěšnosću 159 km/h docpěł. Wón dyrbi nětko ze 700 eurami pokuty, z dwěmaj dypkomaj w Flensburgu a z třomi měsacami zakazom jězdźenja ličić. Nimo toho lepichu zastojnicy jědnaće šoferow, kotřiž njeběchu zakaz přesćehnjenja wobkedźbowali.
