Policija (24.01.24)
Z wokna třělał
Budyšin. Wjacore wutřěle z bydlenja na Budyskej Ebertowej su swědkojo póndźelu policiji zdźělili. Zastojnicy zwěsćichu, zo jednaše so wo bydlenje 36lětneho muža. Z pomocu specialneje skupiny policije muža přewinychu. Kaž so wukopa, bě wón hižo wjacore razy z trašawku z wokna swojeho bydlenja třělał. Pistolu policisća sćazachu.
Předpředań z nowosćemi
Za hru wo Krabaće započnu 5. februara zastupne lisćiki předawać
Čorny Chołmc (SN/MWj). Za prěnju Krabatowu sagu, kotruž kulturny centrum Krabatowy młyn Čorny Chołmc w swójskej režiji planuje a organizuje, so póndźelu, 5. februara, předpředań zastupnych lisćikow započnje. Kaž kulturny centrum zdźěli, dźěłaja za to z regionalnymi předewzaćemi hromadźe. Za předań lisćikow je na přikład firma KREEVO z Noweje Łuki wosebity tiketowy system programěrowała. Tak budźe nětko móžno, lisćiki dospołnje digitalne kupić, zapłaćić a samo doma wućišćeć. Tak změja zbožowni kupcy swoje lisćiki w běhu krótkeho časa w swojimaj rukomaj. Štóž chce radšo hotowe zastupne lisćiki měć, móže sej je za 5,90 eurow domoj připósłać dać. W tym padźe pak dyrbja kupcy trochu dlěje čakać, dokelž w Čornym Chołmcu znowa z wulkim nawalom zajimcow liča. Lisćiki rozpósćelu hakle po tym, zo su wone zapłaćene.
Nětko Michałkecy knježitaj
Kulow (MKl/SN). Lětuši prěni kapičkowy wječor Kulowske póstniskeje sezony je so z norskim knježerstwowym wozjewjenjom zahajił. Zašłu sobotu je so wulce woblubowany swjedźeń w Kulowskej sportowni wotměł. Jako so dotalny princowski por na čoło ćaha do žurle nastupi, bě program wječora zahajeny. K tomu słuša stajnje tež spožčenje rjadu Kulowskich norow. Z nim wuznamjenjataj princ a princesna wosoby abo skupiny, kotrež su so wosebje aktiwnje za dotal amtěrowacy princowski por zasadźeli.
Wid rjaneje zymy
Jako Pumpot hosći po měsće wodźił
Krótkopowěsće (24.01.24)
Elke Erb njeboha
Berlin. Wuznamna spisowaćelka Elke Erb je njeboha. 85lětna zemrě minjenu póndźelu w Berlinje. Lawreatka mjez druhim Georga Büchneroweho myta a čłonka Sakskeje akademije wědomosćow je tež we wysokej starobje přewšo produktiwnje lyriku a prozu tworiła kaž tež rusku poeziju přebasniła, za čož w lěću prawidłownje we Wuježku přebywaše.
Přihotuja wulku demonstraciju
Budyšin. Na Budyskim Hłownym torhošću wotměwa so tutu sobotu, 27. januara, w 14 hodź. demonstracija. Pod hesłom „Zhromadnje za čłowjeskosć, demokratiju a našu swobodu w Budyšinje. Nětko!“ namołwja zwjazk mnohich iniciatiwow w němskej a serbskej rěči za wobdźělenje. Rěčeć ma mj. dr. sakski statny ministra za nutřkowne Armin Schuster (CDU).
Swětło jako spominanje
Swójby wustajeńcu wopytali
Ameriski hniłc – mrětwa pčołow
Nic jenož na wsach, ale tež w městach maja mnozy doma skót. Něchtóžkuli nimo toho drobny skót plahuje. Wšitcy so wo strowotu swojich lubuškow prócuja. K tomu přinošować chce naša serija z pokiwami z weterinarneje mediciny. (24)
Hižo dlěši čas rysuja wědomostnicy dramatiski staw pčołow po cyłym swěće. Mnohich faktorow dla so mnóstwa ludow najwšelakorišich družin pčołow lěto wob lěto pomjeńšuja. Změna klimy, pesticidy abo změny žiwjenskeho ruma přez industriju a agrarne wobdźěłanje krajiny su někotre přičiny, kotrež mrěće pčołow zawinuja.
Dalša chorosć pčołow, kotraž je po cyłym swěće prezentna, je ameriski hniłc (Amerikanische Faulbrut). Jedna so wo mrětwu pčołow, kotraž ma so w Němskej na weterinarnym zarjedźe přizjewić. Tak njenastawaja jenož škody pčołarja z wulkim problemom, ale tež rozmnoženje rozbudźaka mrětwy paenibacillus larvae larvae.
Dźěłowy kruh so zeńdźe
Budyšin. Přichodne posedźenje dźěłoweho kruha za serbske naležnosće města Budyšina wotměje so srjedu, 24. januara, w 17 hodź. na radnej žurli radnicy. Na dnjowym porjedźe zjawneho dźěla wuradźowanja póńdźe mjez druhim wo serbske poskitki w Budyskich pěstowarnjach. Dale zaběraja so čłonojo dźěłoweho kruha z konceptom wo wonkownym wobrazu serbskeje rěče w zjawnym rumje sprjewineho města. Nimo toho chcedźa lońše Wjacławske wiki wuhódnoćić a wo tym rozmyslować, kak móhli so při planowanju lětušich sobu zapřijeć.
Psychedeliski rock a metal
Budyšin. We wobłuku rjadu „Koncerty w foyeru“ přeprošuje Kamjentny dom dźensa, wutoru, na wustup skupiny Slow Green Thing. Drježdźanski kwartet pěstuje psychedelisku měšeńcu stoner rocka kaž tež metala a je projekt wjacorych weteranow sceny, kotřiž su mjez druhim (bywši) čłonojo kapałow Stonehead a Red Wave. Koncert započnje so w 20 hodź., zastup je darmotny. Zarjadowar kaž tež band pak wjeselitej so nad šćedriwymi pjenježnymi darami.
Wernisaža wustajeńcy
Pytaja kmaneho zajimca
Wulkodubrawska gmejna chce bywši wjesny ambulatorij priwatizować
Wulka Dubrawa (UM/SN). Wulkodubrawska gmejnska rada je zasadnje rozsudźiła, zo ma so za bywši wjesny ambulatorij we Wulkej Dubrawje posudk zhotowić a zo ma so twarjenje na předań wupisać. Za přichodne wužiwanje maja zajimcy koncept předpołožić, kotryž měł so na katalog žadanjow gmejny wusměrić. Tele žadanja chcedźa hišće zdźěłać. „Smy w zašłosći rozmołwy z jednotliwymi zajimcami wjedli. To pak njebě wuspěšne“, praji wjesnjanosta Hardy Glausch (njestronjan). Z wobzamknjenym wupisanjom so wón nadźija, kmanych zajimcow za wobhospodarjenje strowotniskeho centruma namakać.
