Serbska comicowa dźěłarnička
Horni Hajnk. Lětsa hižo sedmy raz zarjaduje Rěčny centrum WITAJ serbsku comicowu dźěłarničku a to pjatk a sobotu, 27. a 28. septembra w domje Jurja Brězana w Hornim Hajnku. Znaty serbski ilustrator Stefan Hanuš zawjedźe šulerjow 3. do 7. lětnika do potajnstwa rysowanja comica. Pod jeho nawodom wuspytaja so šulerjo w rysowanju figurow, pohibow, gestiki a mimiki. Přizjewjenja zdźělće prošu telefonisce Michaeli Hrjehorjowej pod čisłom 03591 550414.
Zarjadowanje njebudźe
Wojerecy. Předwčerawšim za pjatk připowědźene zarjadowanje „Woprašej so měšćanosty“ we Wojerowskej měšćanskej bibliotece Brigitty Reimann njebudźe. Wulkeje ličby nadawkow dla w zwisku z tuchwilnym zakitowanjom statusa ekscelency na Drježdźanskej Techniskej uniwersiće, so přeprošeny hósć prof. Frank Fitzek wobdźělić njemóže. Organizatorojo prócuja so wo bórzomny nowy termin za zarjadowanje.
Wuslědki škota seniorow
Nowy pomnik wótčincow přiwjezli
Přispomnjene
Policija (25.09.24)
Městnosć njezboža wopušćił
Budyšin. Póndźelu popołdnju je dotal njeznaty kolesowar při Žitnych wikach w Budyšinje městnosć njezboža wopušćił. 42lětna šoferka awta typa VW chcyše dozady z parkowanišća wujěć. Jako wotzady přichadźaceho kolesowarja wuhlada, pak wona zadźerža. Wočiwidnje tutón situaciju prawje posudźował njeje a do awta prasny. Při tym z kolesom padny a so zrani. Najebać to zalěze zaso na koleso a městno njezboža wopušći. Personalije zawostajił njeje.
Babylěćnej překwapjence
Z přednoškom dalši zajim budźił
Budyšin (CRM/SN). Před tydźenjomaj wotkrychu w Budyšinku, kiž přisłuša wot lěta 1994 Malešanskej gmejnje, před cyrkwju nadobny dwurěčny pomnik za Hadama Bohuchwała Šěracha. Wón běše wot lěta 1748 hač do swojeje smjerće w lěće 1773 w tutej małej serbskej ewangelskej wsy wuchodnje Budyšina spomóžnje skutkowacy duchowny, liči pak zdobom k sławnym přirodospytnikam swojeje doby. Na polu pčołarstwa zdoby sej europski wuznam.
Iniciatorej pomnika, bywšemu wjesnjanosće Güntherej Sodanej, běše Jurij Łušćanski předewšěm w serbskich naležnosćach z dobrym a spušćomnym poradźowarjom. Tuž rady připraji, jako jeho Ludmiła Bizoldowa – wjednica kruha serbskich seniorkow a seniorow Budyskeje tachantskeje wosady – narěča, hač nochce wo serbskim wótčincu přednošować.
„Wšako sym tež jenož čłowjek“
W Njedźichowskim domje generacijow maja wustajeńcu wo inkluziji
Njedźichow (SR/SN). Posměwk Lukasa natykuje. Sympatiski hólčec rěči jara wotewrjeny wo swojej małoróstnosći. Genetiskeho schorjenja dla ma 14lětny hólčec přewulki jazyk, zaćěmnjenej woči a njemóže noze kaž tež ruce prawje zrunać. „Ćělnje mam wšak swoje ćeže, sym pak z nimi wobchadźeć nawuknył. Zo pak ludźo na dróze na mnje wudźěraja – to so mi njelubi. Chcu, zo druzy ze mnu kaž z kóždym druhim strowym čłowjekom wobchadźeja. Wšako sym tež jenož čłowjek“, wón połny emocijow powěda.
Lukas žedźi so za „cyle normalnym žiwjenjom“. Po šuli chcył rady powołanje medijoweho wuhotowarja nawuknyć a po tym dobre přistajenje a tež „dobru“ partnerku za žiwjenje namakać. Druhdy wšak ma tež swoje zrudne wokomiki, dokelž je „hinaši, hač ći druzy“. Tuchwilu pyta za nowymi přećelemi we Wojerecach a wokolinje, dokelž přećeljo-sobušulerjo na tuchwilnej šuli za ćělnje zbrašenych chětro zdaleni bydla. „Štóž chcył mje rady zeznać, njech so w Domje generacijow w Njedźichowje přizjewi“, praji młody Wojerowčan.
Krótkopowěsće (25.09.24)
Předsydstwo Zelenych wotstupi
Berlin. Po wjacorych wólbnych poražkach strony je předsydstwo Zelenych swój wotstup připowědźiło – lěto do přichodnych wólbow zwjazkoweho sejma. Tole staj wobaj předsydaj strony Ricarda Lang a Omid Nouripour w Berlinje zdźěliłoj. Na zjězdźe strony w nowembru chcedźa nowe předsydstwo wuzwolić.
Wotnětka z dźěćacymi spěwami
Budyšin. Aplikacija „Towaršny spěwnik“ je wo dalši pakćik spěwow rozrostła. Dohromady tři pakćiki z cyłkownje 461 spěwami su z tym přistupne: „Zakładny pakćik“, „Młoda hudźba“ a wotnětka tež „Dźěćace spěwy“. Nowa je funkcija, kotraž zmóžnja wužiwarjam, swójske lisćiny pěsnjow zestajeć. App je darmotna, pakćiki předawaja online pod .
Namjety za 150. schadźowanku
Njeje to normalne zestarjenje
„Posłuchaj lěkarja, prjed hač jeho trjebaš!“, serbske přisłowo namołwja.
Tuž wěnuje so student mediciny Pětr Dźisławk znatym a mjenje znatym chorosćam, zo by je čitarjam trochu bliže rozłožował (54).
Interkulturelny tydźeń
Budyšin. We wobłuku tuchwilu so wotměwaceho Interkulturelneho tydźenja předstaji Němsko-serbske ludowe dźiwadło štwórtk, 26. septembra, kruch „Šěrcec Hanka“ po knize Jurja Kocha a to we 18.30 hodź. na hłownym jewišću Budyskeho dźiwadła. Hižo jutře zahaji Budyski Thespis-centrum swój dźiwadłowy festiwal pod hesłom „Willkommen Anderswo VI. IN EINEM BOOT“ , kotryž wotměwa so hač do njedźele we hłownym domje Němsko-serbskeho ludoweho dźiwadła. Srjedu w 19 hodź. so zarjadowanje wotewrěje. W 19.30 hodź. předstaja hrajerjo Mnichowskich komornych hrow kruch „Xáta – Zuhause“, kotryž tematizuje wójnu w Ukrainje. Wječor so kónči w zapadnym foyeru dźiwadła z hudźbu.
Zahaja nowy semester
Wojerecy. Ludowa šula we Wojerecach přeprošuje na prěnju party składnostnje zahajenja noweho semestra. Wšitcy, kotřiž chcedźa ludowu šulu jónu na tróšku hinaše wašnje dožiwić, njech přińdu štwórtk, 26. septembra, wot 18 hodź. do foyera. Tamniši wučerjo a zamołwići wjesela so na zajimawe rozmołwy.
