Wot Zwjazkoweho předsydstwa Domowiny nominowane štyri wosoby za nowu Radu za serbske naležnosće Sakskeje wědźachu z myslemi přeswědčić, kotrež w padźe wuzwolenja přez Sakski krajny sejm skutkowanje parlament a statne knježerstwo poradźowaceho gremija wopłodźeja. Mudrje je zwjazkowe předsydstwo woprawdźe jenož telko wosobow pomjenowało, kelkož ma so na poručenje Domowiny wuzwolić. Wěm so derje dopomnić na prjedawše wólby serbskeje rady: Zapósłancy zwjetša njejsu wone štyri wosoby z najwjetšej serbskej legitimaciju do rady wolili, ale su po swójskim stronskopolitiskim dobrozdaću postupowali. Domowina je přiwuknyła, a zawěsće bě nastork ze Serbskeho sejma, w serbskim zajimje tak jednać, k tomu přinošował. Přiwšěm wobžaruju, zo njeje so poradźiło z nominowanymi wosobami zdobom wšitke serbske regiony w sakskim dźělu Łužicy zapřijeć. Tónle njedostatk wurunać budźe nowu radu wužadować. Axel Arlt

Hdyž wona před spěwarkami/spěwarjemi „swojeho“ chóra Židźino steji a je/jich k wysokim wukonam pohnuwa, začuwaš najebać wšu z wustupom zwjazanu napjatosć spokojnosć w jeje wobliču, zo cyłk wužadanje derje zmištruje. Tale spokojnosć ma zdobom z tym činić, zo ćěleso mjeztym dwaj lětdźesatkaj jeje wuměłskim narokam wotpowěduje.

Rěč je wo wuměłskej nawodnicy chóra Židźino Kerstin Liederowej z Narća, kotraž bu spočatk měsaca z Čestnym znamješkom Domowiny wuznamjenjena. W lawdaciji je wuzběhnjene, zo wona „z elanom, wulkim angažementom a pre­ciznosću na njezaměnliwe wašnje k zachowanju serbskeho spěwa přinošuje“. Chórisća waža sej jeje wurunanosć. Něko­tři z nich samo twjerdźa, zo njejsu ju te cyłe lěta ani jónu z njepřećelnym wobličom dožiwili. Kritiku wona na humorne wašnje wupraja. Tež to w chórje wysoko připóznawaja.

Wojerecy (pbr/SN). „Serbske poskitki we Wo­jerecach a wokolinje“, pod tymle hesłom přeprosy towarstwo Serbski kulturny turizm (SKT) wčera swojich čłonow a přećelow na lětušu ekskursiju. Wojerowska měšćanska wodźerka Cornelia Schnippa witaše tuž rano 30 wobdźělnikow před Wojerowskim hrodom. Hłowny zaměr towarstwa je, zo so na polu turizma skutkowacy a dalši na dnjowej wuprawje mjez sobu zeznaja a nowe styki nawjazaja. Kóžde lěto je to druhi region, hdźež sej zastupjerjo kulturnych informacijow a muzejow kaž tež nawodźa turi­stiskich cyłkow a towarstwow, kaž Rownjanskeho Njepilic dwora, zajimawe městnosće wobhladuja.

Po wodźenju po starym měsće zało­žichu wulětnikarjo do Wjacsławkec drastoweho domu. Werner Bejma hosćom stawizny domu rozłoži a pokaza na to, zo móža sej zajimcy w nim serbsku drastu wupožčić a kupić a tam jich wo rozdźělach drasty informuja.

Drježdźanske towarstwo Stup dale zhladu­je lětsa na 10. róčnicu wobstaća. Hižo wjacore zarjadowanja su na mały jubilej skedźbnjeli. Tak budźe tež lětuše pućowanje wosebite.

Drježdźany (SN/MiR). Towarstwo Stup dale njepoda so tónle štwórtk na swojim nazymskim pućowanju do přirody, ale na slědy Jana Wilhelma Buka. Namjet čłona towarstwa Benedikta Dyrlicha, so z nim zaběrać, je wulki zajim zbudźił. „Jenož­ mało ludźi wě, zo měješe Sakska do Stanisława Tilicha hižo jednoho mi­nisterskeho prezidenta serbskeho po­chada. Tež hdyž su měnjenja wo wosobje Wilhelma Buka wšelakore, je hódne na lětuše 150. narodniny politikarja 12. nowembra spominać“, serbski basnik a publicist Benedikt Dyrlich wobkruća.