Busta so nawróćiła
Zhromadnje jubilejej swjećili
Swjedźenski kónc tydźenja šalmajoweje kapały a Njepilic statoka
Rowno (JoS/SN). Na 55 lět šalmajoweje kapały a na 20. róčnicu wobstaća Njepilic statoka su minjeny kónc tydźenja w srjedźołužiskim Rownom zhladowali. Dwójny jubilej bě dołho planowany, wšako je šalmajowa kapała towarstwo Njepilic dwór wot wšeho spočatka podpěrowała. Wobaj cyłkaj stej we wsy woblubowanej a matej tójšto pomocnikow. To su tež na swjedźenskim zarjadowanju z wjele gratulantami wuzběhnyli.
Wša česć a wulki dźak
Sernjany kaž wulka swójba
Wjes nad Klóšterskej wodu kónc tydźenja 600lětne wobstaće swjećiła
Sernjany (SN/mwe). Kóžde druhe lěto přewjeduja Sernjany wotměnjejo so ze susodnym Róžantom wulki wjesny swjedźeń. Tónkróć pak bě to kónc tydźenja wosebity swjatk, dokelž spominachu Sernjančenjo hromadźe ze stami hosći zbliska a zdaloka na 600 lět prěnjeho naspomnjenja wsy.
Z teje přičiny bě wjesny klub hromadźe z wohnjowej woboru, młodostnymi a dalšimi – poprawom bě wot pjatka do wčerawšeho wječora cyła wjes na nohach – wosebity program spřihotował. Na dźesać stacijach móžachu sej wopytowarjo wčera popołdnju wobhladać, kotre rjemjesła běchu něhdy w Sernjanach zasydlene, kak su w Korjenkec młynje muku dźěłali, kotry korčmar w dźensnišim Cyžec hosćencu hdy piwo točeše a što běchu w něhdyšim wobchodźe za kolonialne twory w 50tych lětach předawali. Prezentowali pak su so syłam ludźi tež dźensniše firmy, kaž na přikład předewzaće MPT a twarc poolow.
W hornjołužiskej pahórčinje byli
Ministerka spěchowanske zdźělenki přepodała
Chrósćicy (SN/bn). Sakske statne ministerstwo za wědomosć a wuměłstwo a Kulturna załožba swobodneho stata Sakska stej fonds za małe projekty załožiłoj. Z nim chcetej tak mjenowane mikroprojekty spěchować. Dohromady nałožujetej za to lětsa 200 000 eurow, kotrež cyłkownje 40 iniciatiwam, towarstwam a jednotliwcam přizwolištej. Wčera je ministerka dr. Eva-Maria Stange (SPD) štyrjom z nich z Hornjeje Łužicy spěchowanske zdźělenki přepodała.
Hłós patra Romualda słyšeli
Z přednoškom na 150. narodniny serbskeho rjadnika a literata spominali
Róžant (SN/JaW). Premjeru dožiwichu wčera kemšerjo w Róžeńće. Prěni raz je towarstwo Naša Knjeni na Lipje we wěži putniskeje cyrkwje po kemšach přednošk wuhotowało. Nimale 90 zajimcow bě přišło, zo by wo serbskim dušepastyrju Romualdźe Domašce słyšało a tak na jeho 150. narodniny spominało. Wšako je so serbski rjadnik 28. julija 1869 narodźił. Spominanje pak njemóžachu čłonojo towarstwa přichodnu njedźelu přewjesć, dokelž wotměja to w Róžeńće Gig-festiwal.
Wědu dale šěrić
Wulke zasłužby při zachowanju Slepjanskeje hudźby
Dóšła je zrudźaca powěsć, zo je Korla Tilich z Wojerec dnja 16. julija w starobje 83 lět zemrěł.
Narodźiwši so 1. měrca 1936, je wón wot 1942 hač do 1950 šulu wopytał. Po tym nawukny wón powołanje twarskeho zamkarja. Přizamkny so studij na konserwatoriju a pozdźišo na Drježdźanskej wyšej hudźbnej šuli w předmjeće klarineta, kotryž 1959 wuspěšnje zakónči. Po tym bě Korla Tilich hač do lěta 1992 soloklarinetist a dudak w Serbskim ludowym ansamblu w Budyšinje.
Hižo lěta 1961 wukmani so wón pola staršeho dudaka w małej wsy pola Poznanja jako twarc dudow. Něhdźe pjeć lět hudźeše wón na dudach, kiž bě sej sam natwarił, w ludowym ansamblu.
Runočasnje wón instrumentalistow w Rakecach wukubłaše. Tak zdoby sej wón wulke zasłužby při nastaću Rakečanskeho dujerskeho orchestra, kotryž wón wot lěta 1968 hač do wysokeje staroby nawjedowaše. Jako sej pólski fachowc za pišćele lěta 1966 samotwarjene dudy Tilicha wobhlada, wón zwěsći, zo njehodźa so dudy poprawom scyła hrać a zo je Korla Tilich wulki wuměłc. Po jeho pokiwach započa Tilich na to w swojej dźěłarni w Nydeji sam dudy twarić a porjedźeć.
