Wot wustawy so jara zdaluja

Donnerstag, 05. Juli 2018 geschrieben von:

Žadanje AfD, Serbow ličić, sylne reakcije zbudźiło

Rowno (SN/JaW). Žadanje AfD, zo měli Serbow ličić, je tež mjez čłonami Zwjazkoweho předsydstwa Domowiny njezrozumjenje a diskusiju zbudźiło. Informowała bě wo naležnosći předsydka Rady za serbske naležnosće Sakskeje Marja ­Michałkowa we wobłuku rozprawy wo skutkowanju rady na minjenym wuradźowanju zwjazkoweho předsydstwa na Rownjanskim Njepilic statoku.

Serbja hosćo Chorwatskich Čechow

Mittwoch, 04. Juli 2018 geschrieben von:
Skupina Přezpólni je so z chorwatskeho Daruvara nawróćiła. Jako delegaća Do­mowiny zastupowachu Serbow pola tamnišeje čěskeje mjeńšiny. Sobotu wječor wobo­haćichu „Čěske dny“ w susodnej wsy Dolanach. Tam zamóchu po programje při zabawje najwšelakoriše skupiny do wjesołeho cyłka splesć. Njedźelu mějachu wjacore wustupy na wšelakich městnosćach w Daruvaru. Wšitcy sobuskutkowacy wobhladachu sej po tym hromadźe kónc koparskeje hry chorwatskeho narodneho mustwa. Po jeho dobyću wuwi so čiła zabawa. Tež Přezpólni spěwachu a rejowachu. Póndźelu załožichu po puću domoj hišće w čěskich Dolnich Bojanovicach, hdźež zetkachu so z někotrymi wjelelětnymi přećelemi Serbow. Foto: Guido Budar

Na dobre poradźenje!

Mittwoch, 04. Juli 2018 geschrieben von:
Dźěłowa skupina wokoło kubłanskeho wuběrka Domowiny chce analyzować ­přičiny zwrěšćenja tak mjenowaneje Wěteńčanskeje iniciatiwy před wjacorymi ­lětami. Iniciatiwa bě so tehdy prócowała nastajić koncept, po kotrymž móhli Serbja sami swoje šule dohladować. Poprawom je Bjarnat Cyž minjeny pjatk w Rownom hižo wotmołwu na to dał. Serbja njeběchu sej přezjedni. Domowina njeměješe dosć podpěry staršich, wučerjow a scyła nic komunow jako nošerjow kubłanišćow. Mjeztym pak su wjacore lěta zašli, a tón abo tamny hinak wo naležnosći mysli. W Njebjelčicach na přikład rozmysluja wo tym, załožić šulu w swobodnym (cyrkwinskim) nošerstwje. Čehodla tež nic w zamołwitosći Serbow. Měnju, zo je načasu prašenje znowa rozjimować. Najprjedy pak měli staršich, wučerjow a komuny za ideju zdobyć a hakle potom so na trěbne statne instancy wobroćić. Přeju předewzaću dobre poradźenje! Janek Wowčer

Starosća a Domowinjenjo so zešli

Dienstag, 03. Juli 2018 geschrieben von:

Rowno (SN/JaW). Nadawk třěšneho zwjazka dale wostanje, Domowinu jako towarstwo a zastupnistwo Serbow skrućić. To rjekny předsyda Domowiny Dawid Statnik na zašłym posedźenju zwjazkoweho předsydstwa na Rownjanskim Njepilic statoku na prašenje Serbskich Nowin. Pozadk bě nowinska zdźělenka iniciatiwneje skupiny wo demokratisce legitimowanym zastupnistwje za serbski lud – Serbski sejm, w kotrejž informuja wo zetkanju wjacorych starostow z prawniskim wuběrkom zwjazkoweho předsydstwa Domowiny 12. junija w Budyšinje. Zo je so zetkanje wotměło, předsyda Domowiny našemu wječornikej wob­krući. „Wuradźowanje pak bě njezjawne, na čož běchmy so tohorunja ze zastu­pjerjemi rady starostow dojednali. Tuž k wobjednanym temam ničo rjec nje­móžu“, Statnik potwjerdźa. Kaž ze stron Domowiny dale k tomu rěka, naprašowanje wo rozmołwu ze stron rady starostow hižo wot spočatka lěta předleži. „Nětko smy so zešli a tak spjelnjamy tež při­lubjenje, rěčeć ze wšitkimi, kotřiž so na dobro serbskeho ludu zasadźeja“, předsyda Domowiny wuswětla.

Stróžanski šulski muzej „Korla Awgust Kocor“ w Malešanskej gmejnje bě mi­njenu sobotu na dnju wotewrjenych duri na wosebite wašnje přistupny. Čłonki a čłonojo nošerskeho towarstwa Radiška wuhotowachu před 120lětnym šulskim twarjenjom mału hosćinu z kofejom a ty­kancom. Přičina bě 20lětne wobstaće towarstwa Radiška a šulskeho muzeja. Hosćo zbliska a zdaloka, samo z Hamburga a Berlina, wužichu składnosć muzej wopytać a so wo šulskich a serbskich stawiznach małeje wsy w bio­sfe­rowym rezerwaće rozmołwjeć.

Wopytowarjo mějachu móžnosć, z erta­ něhdyšeho šulerja šule, publicista Siegharda Kozela, zajimawostki ze serbskich a šulskich stawiznow zhonić. Dźěći pak dožiwichu šulsku wučbu kaž před sto lětami. Złožujo so na originalnu kni­hu­ zapiskow šulerjow wot lěta 1868 hač do­ 1921 jim rozłožichu, zo bě Stróža tehdy ryzy serbska wjes. Z wjace hač sto hriw­nami so wopy­towarjo hosćićelam za šulsku hodźinu hinašeho razu dźakowachu.

Kónc wotbagrowanja wotwidźeć

Montag, 02. Juli 2018 geschrieben von:

Zwjazkowe předsydstwo Domowiny je pjatk­ wječor pod nawodom předsydy třěšneho zwjazka na Rownjanskim Njepilic­ statoku wuradźowało. Mjez druhim su tam na wotbagrowane łužiske wsy spominali.

Rowno (SN/JaW). Čłonojo Zwjazkoweho předsydstwa Domowiny su minjeny pjatk w srjedźołužiskim Rownom na wot­bagrowane wsy spominali.

Praha (jh/SN). Z dwuhodźinskim swjedźenskim ćahom z Václavskeho naměsta hač na Staroměšćanske naměsto zahajichu wčera w Praze 16. wšosokołski zlět. Serbja běchu so z 80 ludźi wopřijacej delegaciju do čěskeje stolicy podali a wobdźělichu so na ćahu, kotryž wotměwaja jenož kóžde šěsć lět. Wudworski folklorny ansambl předstaji serbski kwasny ćah a postara so z holcami w narodnej drasće, z brašku, reju a muzikantami wo wosebitostku. Na čole łužiskeje skupiny kročachu čłonojo předsydstwa Serbskeho Sokoła z hrajerkami Serbskeje koparskeje wubranki a delanskimi sportowcami Sokoła Ralbicy/Hórki. Tež rejwanska skupina Smjerdźaca ćah wobohaći a pokaza popołdnju tohorunja program před Tyršowskim domom na Małej stronje. Cyłkownje je so na swjedźenskim ćahu jako zazběhu sokołskeho zlěta 14 000 Sokołkow a Sokołow wobdźěliło.

Serbski muski chór Delany je so wutoru z dirigentom Handrijom Henčlom (nalěwo) rozžohnował. Předsyda Janek Wowčer přepoda jemu kolažu wobrazow jako dopomnjenku. Henčl bě ćěleso wot lěta 2012 dirigował a je na swójske přeće wo­pu­šći. Delenjo pytaja hižo poł lěta za no­wym dirigentom/nowej dirigentku, dotal bjez wuspěcha. Tuchwilu maja lětnju přestawku. Foto: Měrko Korjeńk

Přewšo rjane hodźinki dožiwi nimale 20 wopytowarjow wčera na Hodźijskej farskej zahrodźe. Tamniša Bjesada bě na serbski spěwny wječor přeprosyła a witaše na njón nimo swójskich tohorunja čłonow Rakečanskeje Bjesady. Při miłym wjedrje zanje­sechu sej tójšto serbskich ludowych pěsnjow kaž tež kěrlušej. Cyły čas knježeše jara dobra nalada. Foto: SN/Maćij Bulank

W Danskej dobyli

Dienstag, 26. Juni 2018 geschrieben von:

Knievsberg (HA/SN). Delegacija Domowinjanow a dalšich Serbow z Delnjeje Łuži­cy je minjeny kónc tydźenja w Danskej była. Woni sćěhowachu přeprošenje Zwjazka němskich Sewjeroschleswigčanow, kiž zastupuje nimale 15 000 přisłušnikow němskeje mjeńšiny w Danskej.

Delnjołužičenjo wobdźělichu so na wulkim swjedźenju na Knievsbergu blisko města Apenrade, kóžde lěto naj­wjetšim zetkanju němskich wobydlerjow w Danskej. Sportowy wjeršk kónca tydźenja bě koparska hra mjez mustwomaj Němcow w Danskej a Serbskich balokoparjow. Partiju před něhdźe 300 přihladowarjemi je loni załožene delnjoserbske mustwo 6:1 dobyło. Na turněrje na małym polu wubědźi sej wone ze šěsć hrajerjemi druhe městno, runje tak tež delnjołužiska trójka w beachvolleyballowym turněrje.

Na wšelake wašnje su hosćo z Delnjeje Łužicy, mjez nimi žony a holcy w serbskej narodnej drasće, na swjedźenju swoju rěč a kulturu reprezentowali. We wobłuku swojeho programa wopytachu němsku šulu w Tønderu, zo bychu so ze šul­stwom w Danskej a wosebje z tym zeznajomili, kak tam dźěći němčinu wu­knu a němske tradicije pěstuja.

Serbska debata

Neuheiten LND