LND so z Waršawu rozžohnowało
Budyšin (SN/CoR). Prěni raz wobdźěli so Ludowe nakładnistwo Domowina lětsa na 19. mjezynarodnych knižnych wikach w Krakowje. „Book Fair Krakow“, wotměwace so wot 22. do 25. oktobra, su tučasnje najwjetše nakładnistwowe wiki w Pólskej a renoměrowany medijowy podawk.
Tak LND na jednym boku dobru tradiciju nakładniskich zwiskow do słowjanskeho wukraja dale wjedźe. Na tamnej stronje wopušći wone wupruwowane puće. Lětdźesatki bě z hosćom Waršawskich knižnych wikow. Na prašenje, čehodla je so nakładnistwo rozsudźiło nowe puće kročić, ma jednaćelka Marka Maćijowa jasnu wotmołwu: „Hačrunjež mamy jara dobre zwiski k staršej generaciji slawistow a sorabistow we Waršawje, su wupruwowane šćežki mjeztym trochu wuteptane. Na uniwersiće serbšćina hižo tu rólu njehraje kaž před lětdźesatkami. Knižne wiki same su popušćili, wotměwaja so mjeztym w stadionje, a lěto wob lěto je mjenje wustajerjow.“
