Berlin (dpa/K/SN). Zwjazkowa kanclerka Angela Merkel (CDU) prosy ludnosć, w migraciskej krizy sćerpliwi być. Nětko dźe tež wo nahladnosć Němskeje na swěće, zwurazni wona wčera wječor w telewizijnym sćelaku ARD. „Smy na cyle wažnym wotrězku našich stawiznow.“ Nětko so wopokaza, kak nastajitej so Němska a Europa za přichodne lěta. Priorita kanclerki je, Europu hromadźe dźeržeć a čłowjeskosć pokazać. Europskich partnerow wona naležnje napomina, krizu zhroma­dnje rozrisać. Za to chce cyłu swoju móc zasadźeć. Dźiwajo na njesměrny nawal ćěkancow warnuje Merkel před separatnymi kročelemi. „To je runje to, čehož so boju.“ Njech sej nichtó njemysli, zo móh­li so z jednostronskim zawrjenjom hranicow problemy rozrisać. Grjekskej připraji Merkel pomoc. „Njemóžemy kraj nětko spušćić. Njejsmy jón tola w euru dźerželi, zo bychmy jón nětko samy wostajili.“ Po nimale dospołnym zawrjenju balkanskeje čary so Grjekska w ćěkancach přisamom „tepi“. Wšědnje přichadźa z turkowskich přibrjohow na wšěch 3 000 migrantow na grjekske kupy. Wosobinske konsekwency za pad, zo dyrbjał wjeršk EU wo Turkowskej 7.