Poradźena premjera z njewočakowanym wukóncom
Budyšin (lm/SN). Z praskotom dynamita a starych awtow kaž tež z wohnjostrojom swjećeše wčera Budyske lětnje dźiwadło swoju 21. premjeru na Hrodźe. Wočakowanja běchu wulke, runja zajimej, wšako ma Olsenowa cwólba tajke něšto kaž kultowy status w sprjewinym měsće. Tribunje běštej hač na poslednje městno wupředatej. Publikum sedźi sej lětsa napřećo, a to njeje tónkróć jenička swojoraznosć jewišćoweho wobraza. Srjedźišćo twori asfaltowany puć, kotryž běchu za inscenaciju a wosom w njej wužiwanych jězdźidłow twarili. Po nim přijědźe k zahajenju wječora originalny, módry Chevrolet, za wodźidłom intendant NSLDź Lutz Hillmann. Režiser a awtor krucha „Olsenowa cwólba a wulki pozadnik“ witaše publikum z melonu na hłowje a z cigaru w hubje. Runje tak wuhotowanaj běštaj sobujěducaj, měšćanosta Alexander Ahrens (njestronjan) a krajny rada Michael Harig (CDU). Ahrens zamołwi so z humorom za to, zo jako Zapadoberlinjan kult wokoło Olsenoweje cwólby sobu dožiwił njebě, hačrunjež móhł telewiziju NDR dosć derje přijimać.
