Zarjadowanje Ludoweho nakładnistwa Domowina składnostnje stoćin Jurja Brězana zjednoći wčera wječor w Budyskej Smolerjec kniharni na wšě połsta zajimcow, mjez kotrymiž běchu tež jeho tři wnučki a dalši přiwuzni.

Budyšin (SN/MiR). Jednaćelka LND Marka Maćijowa poda wotpohlad wječorka: spominać na žiwjenje a literarne tworjenje najwliwnišeho serbskeho spisowaćela 20. lětstotka. A tole so pře wšu měru derje poradźi. „Jako awtor je móhł zwjazać ludowosć a filozofiski narok“, wuswětli Marka Maćijowa, „te jedne njeje bjez toho tamneho było, štož je tež na jeho rěči pytnyć. Jeho serbšćina je z mojeho wida wurjadnje přemyslena.“