Spěchowanski kruh za serbsku ludowu kulturu na diskusiju prosył

Budyšin (CRM/SN). Runje na dźeń před pjeć lětami wotmě so w Budyskim Serbskim muzeju diskusijny wječor wo serbskej narodnej drasće, zwěsći wčera na samsnym městnje direktorka domu Christina Boguszowa. Šwarny kruh zajimcow, njez nimi cyły rjad z Delnjeje Łužicy,­ sćěhowaše wuwjedźenja wědo­mostneje sobudźěłaćerki muzeja Andreje Pawlikoweje a młodźinskeje koordi­natorki Domowiny Rejzki Wałdźic.

Spěchowanski kruh za serbsku ludowu kulturu zastupowaše na prěnim městnje jeho předsyda Eberhard Zobel z Kamjenca. Tež Budyšanka Weronika Suchowa a dale agilny prócowar wo zachowanje serbskeje kultury a pěstowanje nałožkow Helmut Kurjo z Blunja zasa­hnyštaj do diskusije, hdyž dźěše wo debjenje jejkow. Kruh dźěła wuspěšnje a ma swoje etablěrowane projektowe dźěło, w kotrymž so tradicije dale haja, ale runje tak nowe ideje w praksy wu­pruwuja a wot jury posudźuja. W diskusiji so wujewi, kak wulki jejkamolowanski wobłuk je, štož so wězo jara wita. Ale mamy dalše ludowotworićelske wobłuki.