Hnujacej koncertaj we wuběrnej interpretaciji
Chrósćicy (bn/SN). Dohromady 800 wopytowarjow dožiwi njedźelu kaž tež wčera w Chróšćanskej farskej cyrkwi oratorij „Serbski rekwiem“ Korle Awgusta Kocora. Koncertaj běštej wot Załožby za serbski lud spěchowany projekt, kotryž je Pančičansko-Kukowski chór Lipa zhromadnje z komornym orchestrom Sinfonietta Drježdźany a ze štyrjomi hóstnymi spěwnymi solistami – serbskej sopranistku Danielu Hazec, mecospranistku Stephanie Hauptfleisch z Drježdźan, słowakskim tenorom Patrikom Horňákom a tuchwilu na wysokej šuli „Carl Maria von Weber“ w Drježdźanach studowacym baritonom Johannesom Hochreinom – pod wuměłskim nawodom Judith Kubicec wuspěšnje zwoprawdźił. Ze słowami „Wjeselu so, zo mamy wospjet móžnosć, sej tajkule hnujacu twórbu z našeho ludu naposkać“ witaše farar Měrćin Deleńk připosłucharjow. Nimo toho wón připowědźi, zo so wobaj koncertaj za planowane wudaće cejdejki nahrawatej.
