Wažny dźěl stawiznow poručenje

pjatk, 04. nowembera 2016
artikl hódnoćić
(0 )
Wobydlerjo noweho Rogowa su wčera ze swojimi hosćimi na załoženje tamnišeho archiwa zhubjenych wosow a cyrkwinskeho centruma spominali. Nimo dopomnjenkow na čas boja přećiwo wotbagrowanju stareho Rogowa a nastaća archiwa je přitomnych najbóle čitanje Jurja Kocha ze swojeho dźenika dopomnjenkow na wotbagrowanu wjes hnuło. Foto:  Ines Neumannojc Wobydlerjo noweho Rogowa su wčera ze swojimi hosćimi na załoženje tamnišeho archiwa zhubjenych wosow a cyrkwinskeho centruma spominali. Nimo dopomnjenkow na čas boja přećiwo wotbagrowanju stareho Rogowa a nastaća archiwa je přitomnych najbóle čitanje Jurja Kocha ze swojeho dźenika dopomnjenkow na wotbagrowanu wjes hnuło. Foto: Ines Neumannojc

Archiw zhubjenych wsow a cyrkwinski centrum wobstejitej dźesać lět

Rogow (HA/SN). Wot lěta 1924 su w Hornjej a Delnjej Łužicy wjac hač 135 wsow a wjesnych dźělow – zwjetša serbskich – wuhla dla wotbagrowali. Něhdźe 25 000 ludźi zhubi tak swoju domiznu. Tónle wažny dźěl łužiskich a předewšěm serbskich stawiznow předstajeja w stajnymaj wustajeńcomaj w nowym Rogowje. Wjac hač 300 wobydlerjow je we wjesnym dźělu wokrjesneho města Baršća nowu domiznu namakało, po tym zo bě jasne, zo Rogow w lětach 2004 do 2006 Janšojskeje jamy dla wotbagruja.

Runje před dźesać lětami wotewrěchu w nowym Rogowje archiw zhubjenych wsow (AVO) a Cyrkwinski centrum za infor­maciju a zetkawanje. Zhromadnje z hosćimi su wobydlerjo wsy wčera na to spominali. Předsyda załožby Rogow a wjesny předstejićer Bernd Siegert, kiž steješe we wjac hač 15lětnym boju wo zachowanje stareho Rogowa na čole hibanja, wuzběhny, zo njeńdźe we wustajeńcomaj jenož wo wosud Rogowa, ale zo ma so předstajić wosebje młódšim generacijam wulce brizantna tematika wuhloweje a energijoweje industrije we Łužicy, kotraž je wšak dale aktualna. Předewšěm dźakowaše so wón Domowinje a wosadźe, kotrejž stej Rogowčanow w ćežkim boju podpěrałoj.

Župan Domowinskeje župy Delnja Łužica Harald Koncak rozprawješe wo wojowanjach Rogowčanow přećiwo wotbagrowanju, wo špatnej politice braniborskeho knježerstwa a parlamenta w naležnosći kaž tež wo nastaću archiwa. Pjeć lět běchu dźěłali, doniž njemóžachu z AVO 14. oktobra 2006 městnosć wopominanja a rozmyslowanja kaž tež informowanja wo Serbach a jich rěči wotewrěć. Je to zhromadny projekt Domowiny, Baršća, załožby Rogow a Vattenfalla. Něhdźe 10 000 ludźi je wustajenišćo dotal wopytało.

Wjelelětna fararka w starym a nowym Rogowje Dagmar Wellenbrink powědaše, kak běchu w nowym Rogowskim Božim domje załožili cyrkwinski centrum. W nim předstajeja dohromady 27 cyrkwjow, kotrež buchu wuhla dla zničene abo přesadźene. Za wuhotowanje dźakowaše so wona předewšěm serbskej wuměłči Marion Kwicojc a serbskemu fararjej Dieterej Schüttej.

Jara hnujace přitomnym bě, zo je serbski spisowaćel Jurij Koch wčera ze swojeho dźenika wo dožiwjenjach w starym Rogowje čitał.

Zastupjer města Baršća skedźbni na to, zo dyrbjeli přichodnje wšitke muzeje a dalše historiske wopomnišća w měsće lěpje hromadźe dźěłać. Dale wón připowědźi, zo chce město AVO a cyrkwinski centrum w Rogowje dale podpěrać. Bernd Siegert a Harald Koncak staj wčera braniborske knježerstwo chětro raznje kritizowałoj. Na přeprošenje na wčera-wšu swjatočnosć do noweho Rogowa njebě wone docyła reagowało.

wozjewjene w: Kultura
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND