Varnsdorf (MěCu/SN). Milan Hrabal je wčera wječor čěskim a serbskim zajimcam we Varnsdorfskej měšćanskej bibliotece nowu publikaciju „Příběhy o vodě“ předstajił. Je to přełožk němskeje knižki Jurja Brězana „Geschichten vom Wasser“, kotraž bě 1986 w Berlinskim nakładni­stwje Neues Leben wušła. Čěske wudaće nasta z podpěru fondsa čěsko-němskeho přichoda. Podpěraćel a zastupjer Europskeho parlamenta Jaromír Kohlíček bě wčera wječor přitomny. Milan Hrabal je knihu zhromadnje z Ilonu Martinovskej přełožił. We wotměnje z Adelu­ Pondělíčkovej čitaše wón wujimki z nowostki. Někotre pasaže z němskeho wudaća předstaji Waltraud Benová.