Budyšin (SN/CoR). Z trójnej „Sławu“ skónči so zawčerawšim, njedźelu, poslednje předstajenje lětušeho ptačokwasneho programa SLA „Dejmantne a hinaše ptački“ w Budyšinje. Něhdźe 1 600 přihladowarjow móžachu wuměłcy na dohromady jědnaće zarjadowanjach w Hornjej a Delnjej Łužicy witać. Předstajenja w Choćebuzu, Nowej Niwje, Slepom, Kulowje, Bukecach, Budyšinje a wječorne w Chrósćicach běchu wupředate.
Program je so přihladowarjam jara spodobał, wosebje „Cyganska reja“ a reja „Do pasa“ (wobě choreografowanej wot Juraja Kubánki). Chór přeswědči ze šlagromaj „Słónco a kwětki“ (Jurij Winar/Jurij Brězan) a „Prěnja lubosć“ (Beno Njekela/Ludwik Kola) kaž tež ze zabawnym spěwom „Europska jědźna karta“ (Willi Maertens/Karsten Sprenger, Milenka Rječcyna). Wosebje so publikumej lubješe, zo chór tele spěwy tež scenisce na jewišću interpretowaše. Braška Jurij Šiman wjedźeše lóštnje po programje a wědźeše tež ze skečomaj Wita Bejmaka přeswědčić.