Budyšin (SN/CoR). Něhdźe 40 hosći wi­taše direktorka Budyskeho Serbskeho muzeja Christina Boguszowa wčera w swojim domje na knižnej premjerje wobrazoweju zwjazkow k wuspěšnej wustajeńcy historiskich fotografijow „Wotmolowane – Mit Licht gemalt“. Dotal je sej 2 300 ludźi přehladku wo započatkach fotografije we Łužicy wobhladało. Hač do kónca přichodneho tydźenja je wustajeńca hišće přistupna.

Jednaćelka Ludoweho nakładnistwa Domowina Marka Maćijowa přepoda wčera – jónu Hornjej, jónu Delnjej Łužicy wěnowacej so – knize „Wotmolowane – Mit Licht gemalt“ wudawaćelej Jürgenej Maćijej kaž tež awtorkam Andreji Pawlikowej, dr. Mariji Měrćinowej, Dorje Liersch, Martinje Nowakojc a Ines Neumannojc. Nimo toho dźakowaše so wuhotowarce Isy Bryccynej a lektorce Katrin Čornakec. Před dźesać lětami bě LND rjad zwjazkow historiskich čornoběłych wobrazow pod nawodom Budyskeho fotografikarja Jürgena Maćija zahajiło. „Zo staj runje zwjazkaj z najstaršimi wobrazami barbnej, ma wěstu ironiju“, Marka Maćijowa zwurazni.