Budyšin (SN/mwe). Wot pjatka do njedźele wotmě so w hali na Budyskim Trělnišću nadkonfesionalna konferenca Momentum. Na njej wobdźěli so 13 swobodnych křesćanskich wosadow, kotrež su tež jako powšitkownowužitne towarstwa Budyskeho wokrjesa zapisane. Hosćićelka zarjadowanja bě Budyska wosada Jozuwy. Něhdźe 600 přewažnje młodych ludźi z Budyšina, Ochranowa a wokoliny, z Wojerowskeje kónčiny, Kodersdorfa, Lubija, Žitawy a Běłeje Wody zwurazni na zarjadowanjach we wobłuku Momentuma swoje wěrywuznaće, zo bychu Bohu a jeho synej Jězusej hołdowali.

Pod hesłami kaž „Lubosć Wumóžnika je triumfowała“, „Kaž wón tež ja z rowa stanu“ abo „Jězuso, dźakuju so, zo sy nas wumóžił a zo njejsmy hižo winicy“ so holcy a hólcy druhdy samo hač do ekstazy spěwajo modlachu. K tomu běchu sej tež rěčnikow a prědarjow, mjez druhim ze Šwicarskeje, přeprosyli, prědowacych jim požadosć za „darjenjom, wodaćom abo sebjepytanjom bjez hrěcha“.