Flensburg (SN/MkWj). Južnoschleswigske wolerske zjednoćenstwo (SSW) – politiske zastupnistwo danskeje mjeńšiny w Němskej – chce so dale za mjeńšinowe naležnosće zasadźeć, hačrunjež drje přichodnje hižo w knježerstwje zastupjene njebudźe. Tole wuchadźa z wotmołwy SSW na naprašowanje Serbskich Nowin po njedźelnych wólbach w najsewjernišim zwjazkowym kraju, při kotrychž su ludźo dotalnu knježerstwowu koaliciju SPD, Zelenych a SSW wotwolili. „Nazhonjenja minjenych 60 lět nas wuča, zo móže SSW tež jako opozicija w tym wubłuku wuspěšny być“, piše Per Dittrich, nowinski rěčnik SSW, w nadawku frakcije strony w krajnym semje.
Dokładne přičiny wólbneje poražki strona SSW tuchwilu analyzuje. „Woprašowanja běchu hač naposledk pokazali, zo je wjetšina wobydlerjow Schleswigsko-Holsteinskeje z politiku koalicije dosć spokojom. CDU pak bě we wólbnym boju stajnje hišće wjace přilubjała. Smy drje podhódnoćili, zo móža tajke lubjenja, kotrež njejsu w dalokej měrje pjenježnje ani podkładźene, naladu wolerjow woprawdźe změnić“, SSW piše.
