Berlin/Washington (dpa/K/SN). Po tym zo je prezident USA Donald Trump ze swojim twjerdošijnym wustupowanjom na prěnim wopyće Europy hromadu črjopow zawostajił, wobradźejo schadźowanju NATO kaž tež zeńdźenju G 7 faktisce bjezwuslědkosć, pyta Europa nětko naležnje za naprawami. Nawodni němscy politikarjo rěča za wuše zhromadne dźěło europskich statow.
Zwjazkowa kanclerka Angela Merkel (CDU) składnostnje swojeho zetkanja ze šefom CSU Horstom Seehoferom bjez kóždeho tajenja rjekny: „Na USA njemóžemy so hižo spušćeć.“ Za trěbne wona tohodla ma, zo „my Europjenjo swój wosud do swójskich rukow wozmjemy. Časy, w kotrychž smy so móhli dospołnje na druhich spušćeć, su wšak nimo.“ W USA su Mnichowsku narěč kanclerki z wulkej kedźbnosću registrowali. W někotrych wažnych medijach je wona na čole stała, wšelcy komentatorojo pak maja ju za přehnatu. Nowina Washington Post měni, zo „Merkel namjetuje nowy kapitl w poćahach mjez USA a Europu“.