Budyšin (CS/SN). Budyska Marje-Marćina cyrkej bě nimale hač na poslednje městno wobsadźena, jako předstajichu tam wčera na pokutnym dnju gospelowy oratorij „Our father in heaven“.

Cyrkwinski hudźbny direktor Michael Vetter, kiž měješe hudźbny nawod na starosći, na spočatku rjekny, zo běchu sinfonisku twórbu hižo před lětom wuspěšnje předstajili. Tehdy dyrbjachu zajimcow samo zaso domoj pósłać. Tak móža zajimcy oratorij lětsa hnydom dwójce dožiwić, a to hišće raz sobotu, 25. nowembra, na symsnym městnje. Kaž Vetter podšmórny, hodźi so twórba Ralfa Grösslera perfektnje k pokutnemu dnjej. Wšako je jeje wosebitosć, so stej pokuta a modlitwa wobsahowje w cyłym kruchu prezentnej. Na přikładźe modlaceho so oratorij pokazuje, zo drje njezbožo njemóžemy přeco wobeńć. „Mamy pak móc modlitwy w formje Wótčenaša, zo bychmy so k Bohu wołali, a mamy jeho připrajenje, zo nas wusłyši.“ Sinfoniska rapsodija „Our father in heaven“ 1958 rodźeneho Ralfa Grösslera dožiwi swoju prapremjeru w nowembrje 2009 w Bayerskej.