Budyšin (SN/at). Zwyša-li so klětu renty, dyrbi po wšěm zdaću dalšich 54 000 rentnarjow dochodowy dawk płaćić. Stat móže z dalšimi dochodami 300 milionow eurow ličić. To wuchadźa z wotmołwy zwjazkoweho financneho ministerstwa na prašenje frakcije Lěwicy w zwjazkowym sejmje. Ministerstwo piše dale, zo rozsudźa wo dokładnym zwyšenju rentow wot 1. julija 2018 hakle klětu w měrcu. Tuchwilu je rěč wo tym, renty na wuchodźe wo 3,2 procentaj a na zapadźe wo tři procenty zwyšić.

Tamna strona klětušeho zwyšenja renty je, zo su něhdźe 4,4 miliony wuměnkarjow winowate, na rentu dawk płaćić, skoro dwójce telko kaž w lěće 2005. Wosebje we wuchodnej Němskej překroči wjace rentnarjow bjezdawkowy minumum eksistency, kotryž wučinja 2018 za samostejacych 9 000 eurow a za poriki 18 000 eurow. Štóž leži z lětnej bruttorentu minus pawšale za wabjenske kóšty (102 euraj) a minus wosobinskeje rentoweje bjezdawkoweje sumy nad zakładnym­ bjezdawkowym přinoškom (klětu 9 000 eurow), je winowaty, financnemu zarjadej dawkowu deklaraciju zapodać.­