Malešecy/Plusnikecy (SN/MiR). Iniciatiwna skupina „Skała Plusnikecy“ wuhotowa wčera w Malešecach nalětni swjedźeń. W Plusnikecach při zornowcu Čertowy kamjeń zetka so nawječor něhdźe połsta wobydlerjow ze wsy a wokoliny. Dźěći Malešanskeje pěstowarnje „K wódnemu mužej“, kotraž je w nošerstwje Serbskeho šulskeho towarstwa, běchu tam hižo připołdnju pobyli. Zhromadnje z rěčnicu iniciatiwneje skupiny Luisu Dutschmann a dr. Richardom Bíglom, kiž zaběra so ze starymi słowjanskimi a tak tež serbskimi nałožkami, donjesechu wone tam hadlenu, postawu ze słomy a trundlow, kotruž běchu zhromadnje paslili. Wčera wječor su ju z małej ceremoniju spalili. „Chcemy dopominać na stary nałožk, kotryž běchu Serbja na dnju jenakeje dołhosće dnja a nocy něhdy pěstowali“, rozjasni dr. Bígl. „Hadlenu ze wsy njesucy su naši předchadnicy zymu wuhnali a nalěćo witali.“ Nadźija wšitkich wobdźělenych nětko je, wobnowić na tym městnje staru tradiciju. Zdobom přitomni wobkedźbowachu, kak słónco so chowajo do škałoby Čertoweho kamjenja swěćeše. Na tym běchu Serbja něhdy změnu počasa spóznali.