Słyšenje wo wjelku w krajnym sejmje přewjedli
Drježdźany/Budyšin (SN/BŠe). Peticija Delanskeje iniciatiwneje skupiny za wobmjezowanje wobstatka wjelkow njese prěnje płody. Zawčerawšim su zapósłancy Sakskeho krajneho sejma zjawnje wo tym diskutowali. Na słyšenje běchu sej fachowcow přeprosyli, kotřiž wěcywustojnje wo temje rěčachu. Wšako dźe wo to pruwować, hač su žadanja peticije woprawdźe trěbne a přesadźomne.
Mjez přihladowarjemi słyšenja bě čłon mjenowaneje iniciatiwneje skupiny Tilo Žur z Róžanta. Jemu běchu wuprajenja profesora za dźiwinowu ekologiju Techniskeje uniwersity Drježdźany Svena Herzoga wažne. Po jeho słowach je wobstatk wjelkow w Sakskej dosahacy. Runje tak wědomostnik měnješe, zo móže so kóždy wjelk z problemom stać. „Kaž nazhonjenja runje pola wowčerja Měrćina Justa w Konjecach pokazuja, je wjelk inteligentne zwěrjo, kotrež spěšnje wuknje“, Tilo Žur wuswětla. Tak su kompromisy trěbne, we wěstych padach wjelki tež třěleć směć.